Forskrift om tilskot til avløysing ved sjukdom og fødsel mv.

DatoFOR-2014-12-19-1821
DepartementLandbruks- og matdepartementet
PublisertI 2014 hefte 18
Ikrafttredelse01.01.2015
Sist endretFOR-2022-11-18-1981 fra 01.01.2023
EndrerFOR-2006-11-08-1227
Gjelder forNorge
HjemmelLOV-1995-05-12-23-§3, LOV-1995-05-12-23-§18
Kunngjort06.01.2015   kl. 11.00
Rettet25.08.2015 (§ 5 tredje ledd første punktum)

Heimel: Fastsett av Landbruks- og matdepartementet 19. desember 2014 med heimel i lov 12. mai 1995 nr. 23 om jord (jordlova) § 3 og § 18.
Endra ved forskrifter 30 juni 2015 nr. 821, 4 juli 2018 nr. 1151, 17 des 2018 nr. 2120, 3 des 2019 nr. 1620 (i kraft 1 jan 2020), 10 juni 2020 nr. 1220 (i kraft 1 jan 2021, endringa endra ved forskrift 2 des 2020 nr. 2580), 21 des 2020 nr. 3044 (i kraft 1 jan 2021), 18 nov 2022 nr. 1981 (i kraft 1 jan 2023, endringa endra ved forskrift 15 des 2022 nr. 2235).
Rettingar: 25.08.2015 (§ 5 tredje ledd første punktum).

§ 1.Føremål

Føremålet med tilskott etter denne forskrifta er å medverke til å dekkje kostnadene til avløysing ved eigen eller barns sjukdom, svangerskap, fødsel, adopsjon eller omsorgsovertaking, og ved dødsfall.

§ 2.Forholdet til jordbruksavtalen og anna regelverk

Tilskotet vert utrekna med grunnlag i satsar, definisjonar, utmålingsreglar m.m. fastsett i jordbruksavtalen.

0Endra ved forskrift 4 juli 2018 nr. 1151 (i kraft 15 aug 2018).

§ 3.Generelle vilkår

Tilskot etter denne forskrifta kan gjevast til føretak som er registrert i Einingsregisteret og som driv vanleg jordbruksproduksjon. Etter § 7 kan tilskotet i staden gjevast til attlevande ektefelle, sambuar, forelder eller barn etter avdød jordbrukar.

Den personen som det vert søkt tilskot for må ha hatt næringsinntekt frå jordbruk, gartneri mv. frå føretaket i dei to siste inntektsåra som vedkomande har fått skatteoppgjer for per 1. januar i det året avløysinga finn stad. Dersom personen ikkje er innehavar må inntekta ha vore minimum ½ G i gjennomsnitt per år. For nye innehavarar som per 1. januar enno ikkje har fått skatteoppgjer for dei to fyrste åra etter oppstart krevst i staden at jordbruks- eller gartneridrifta i føretaket er egna til å gje dei positiv næringsinntekt over tid.

Tilskotet kan gjevast til dekking av dokumenterte utgifter til avløysing.

Som avløysing reknast ikkje arbeid utført av person som

1.har næringsinntekt frå føretaket eller nokon av føretaka i driftsfellesskapet,
2.er ektefelle eller sambuar til nokon som har næringsinntekt frå føretaket eller føretaka i driftsfellesskapet, eller
3.er under 15 år.
0Endra ved forskrifter 4 juli 2018 nr. 1151 (i kraft 15 aug 2018), 17 des 2018 nr. 2120 (i kraft 1 jan 2019).

§ 4.Tilskot ved sjukdom

Det kan gjevast tilskot ved sjukdom dersom den personen som det vert søkt tilskot til avløysing av er yngre enn 70 år og sjukemeldt frå arbeid i føretaket. Det kan òg gjevast tilskot utan at sjukemelding ligg føre, dersom personen i samband med eigen sjukdom eller skade har vore til naudsynt behandling, kontroll eller undersøking på sjukehus eller hos spesialist godkjend av det offentlege.

Tilskot etter første ledd stansar når det er utbetalt tilskot for personen i til saman 365 dagar i løpet av dei tre siste åra. Teljinga av dagar tek til på nytt kvar gong det er gått 26 samanhengande veker sidan den siste dagen i den føregåande perioden det har vore utbetalt tilskot for.

0Endra ved forskrifter 30 juni 2015 nr. 821, 4 juli 2018 nr. 1151 (i kraft 15 aug 2018).

§ 5.Tilskot ved svangerskap, fødsel, adopsjon og omsorgsovertaking av barn

Det kan gjevast tilskot når den personen det vert søkt tilskot for er gravid og tek i mot svangerskapspengar, eller søkjer kan dokumentere med vedtak eller erklæring frå NAV at personen fyller dei medisinske vilkåra for rett til svangerskapspengar.

Det kan gjevast tilskot når den det vert søkt tilskot for:

1.tek i mot foreldrepengar etter folketrygdlova kapittel 14,
2.har fått eingongsstønad ved fødsel etter folketrygdlova kapittel 14, eller
3.har dagleg omsorg for eit barn og søkjar kan dokumentere
a.med avslagsvedtak eller erklæring frå Nav, at årsaka til at personen ikkje får foreldrepengar er at oppteningsvilkåra i folketrygdlova § 14-6 ikkje var oppfylte, og
b.med attest frå Folkeregisteret, at personen er registrert som far eller medmor til barnet og bur saman med barnet på same adresse.

Tilskot etter andre ledd nr. 2 kan gjevast for ei samanhengande periode tilsvarande mødrekvota og fellesdelen av foreldrepengeperioden ved fullt uttak av 100 % foreldrepengar. Tilskot etter andre ledd nr. 3 kan gjevast for ei samanhengande periode tilsvarande fedrekvota ved fullt uttak av 100 % foreldrepengar.

I samband med fødsel kan det gjevast tilskot for avløysing av faren i inntil 14 dagar dersom han bur saman med mora til barnet og føretaket ikkje tek i mot tilskot for avløysing av mor i desse dagane. Der adoptivforeldre og fosterforeldre tek over omsorga kan det òg ytast slikt tilskot til ein av foreldra. Dette gjeld likevel ikkje ved stebarnsadopsjon eller der barnet er over 15 år.

0Endra ved forskrifter 30 juni 2015 nr. 821, 4 juli 2018 nr. 1151 (i kraft 15 aug 2018), 3 des 2019 nr. 1620 (i kraft 1 jan 2020).

§ 6.Tilskot ved sjukdom hos barn

Det kan gjevast tilskot når den personen det vert søkt tilskot for må ivareta barn med sjukdom, og det finst dokumentasjon til dømes i form av legeerklæring for heile perioden det vert søkt tilskot for. Det kan og gjevast tilskot når den personen det vert søkt tilskot for følgjer barn til legeundersøking eller anna oppfølging i samband med sjukdom eller skade. Tilskotet kan gjevast til og med det kalenderåret barnet fyller 12 år.

Det kan gjevast tilskot når den personen det vert søkt tilskot for har barn med kronisk sjukdom, langvarig sjukdom eller har nedsett funksjonsevne og det derfor er ei markert auke i risikoen for at personen får fråvær frå arbeidet sitt i føretaket. Tilskotet kan gjevast til og med det kalenderåret barnet fyller 18 år. Det kan òg gjevast tilskot for å kunne delta i opplæring ved godkjend helseinstitusjon eller offentleg kompetansesenter for å kunne ta seg av og behandle barnet.

Tilskotet kan gjevast for inntil 20 dagar per år for kvar av foreldra. For einslege foreldre kan tilskot gjevast for inntil 40 dagar per år. Dersom vilkåra i andre ledd er oppfylt, kan det gjevast tilskot for inntil 30 dagar per år for kvar av foreldra eller inntil 60 dagar per år for einslege foreldre.

0Endra ved forskrifter 10 juni 2020 nr. 1220 (i kraft 1 jan 2021, endringa endra ved forskrift 2 des 2020 nr. 2580), 18 nov 2022 nr. 1981 (i kraft 1 jan 2023 og tilskot kan gjevast for avløysing frå og med denne datoen, endringa endra ved forskrift 15 des 2022 nr. 2235).

§ 7.Tilskot ved dødsfall

Attlevande ektemake/sambuar, barn eller foreldre til ein avdød person som dreiv eit føretak med vanleg jordbruksproduksjon, kan gjevast tilskot til avløysing i inntil 8 veker etter dødsfallet. Avdøde må ha hatt ei gjennomsnittleg næringsinntekt frå jordbruk, gartneri mv. frå føretaket på minimum ½ G dei to siste inntektsåra som føretaket har fått skatteoppgjør for pr. 1. januar i dødsåret.

Reglane i § 3 første og andre ledd gjeld ikkje for attlevande som nemnt i første ledd i paragrafen her.

§ 8.Søknad

Søkjar av tilskot skal nytte søknadsskjema fastsett av Landbruksdirektoratet.

Søknadsfristen er eitt år etter siste dag i den perioden det vert søkt tilskot for.

Tilskotet kan ikkje overdragast til eige eller pant.

0Endra ved forskrifter 30 juni 2015 nr. 821, 4 juli 2018 nr. 1151 (i kraft 15 aug 2018).

§ 9.Administrasjon, dispensasjon og klage

Landbruksdirektoratet administrerer tilskot etter denne forskrifta. Vedtak om tilskot gjerast av kommunen.

Landbruksdirektoratet og statsforvaltaren kan i særskilte høve dispensera frå vilkåra i § 3 andre ledd, § 4 t.o.m. § 7 samt § 8 andre ledd.

Vedtak som er gjort av kommunen kan klagast til statsforvaltaren. Vedtak som er gjort av statsforvaltaren kan klagast til Landbruksdirektoratet.

0Endra ved forskrifter 4 juli 2018 nr. 1151 (i kraft 15 aug 2018), 21 des 2020 nr. 3044 (i kraft 1 jan 2021).

§ 10.Kontroll og innhenting av opplysningar

Søkjaren av tilskot pliktar å gje alle opplysningar som kommunen, statsforvaltaren og Landbruksdirektoratet finn naudsynt for å kunne forvalte ordninga.

I samband med søknadshandsaming og kontroll av tilskotsutbetalingar kan kommunen, statsforvaltaren og Landbruksdirektoratet innhente opplysningar frå skatteetaten.

Kommunen, statsforvaltaren og Landbruksdirektoratet kontrollerer at utbetaling av tilskot er rett. Søkjaren pliktar å utlevere all bokføring, korrespondanse og oppteikningar som vedkjem tilskotet. Opplysningar gitt i samband med søknad om tilskot kan òg kontrollerast ved teljing og måling på dei eigedomar som føretaket nyttar i drifta.

0Endra ved forskrift 4 juli 2018 nr. 1151 (i kraft 15 aug 2018), 21 des 2020 nr. 3044 (i kraft 1 jan 2021).

§ 11.Avkorting ved regelverksbrot

Dersom føretaket aktlaust eller forsettleg driv eller har drive verksemda si i strid med anna regelverk for jordbruksverksemd, kan heile eller delar av det tilskotet som tilfell føretaket avkortast.

§ 12.Avkorting ved feilopplysningar

Dersom føretaket aktlaust eller forsettleg har gjeve feil opplysningar i søknaden som har eller ville danna grunnlag for ei urettmessig utbetaling av tilskot, kan heile eller delar av det tilskotet som tilfell føretaket avkortast. Tilskotet kan også avkortast dersom føretaket ikkje følgjer fristar som kommunen, statsforvaltaren eller Landbruksdirektoratet har sett for å kunne utføre kontrolloppgåvene i medhald av § 10.

0Endra ved forskrift 21 des 2020 nr. 3044 (i kraft 1 jan 2021).

§ 13.Tilbakebetaling og renter mv.

Dersom nokon, anten som følgje av manglande oppfylling av vilkåra i denne forskrifta eller av andre grunnar, har motteke ei utbetaling som ikkje var rettmessig, kan det feilutbetalte beløpet krevjast tilbakebetalt frå mottakaren eller motreknast i seinare utbetalingar av tilskot. Tilsvarande gjeld differansen mellom utbetalt beløp og redusert tilskot som følgje av vedtak om avkorting etter § 11 og § 12.

For tilbakebetalingskrav kan det krevjast renter når kravet ikkje vert innfridd ved forfall. Ved grov aktløyse eller forsett kan renter krevjast frå tidspunktet for utbetalinga av det urettmessige tilskotet. Størrelsen på renta følgjer rentesatsen fastsett med heimel i lov 17. desember 1976 nr. 100 om renter ved forsinka betaling m.m.

Krav frå offentlege styresmakter som spring ut av jordbruksverksemda til føretaket kan motreknast i seinare tilskotsutbetalingar til føretaket.

0Endra ved forskrift 4 juli 2018 nr. 1151 (i kraft 15 aug 2018).

§ 14.Iverksetjing

Forskrifta gjeld frå 1. januar 2015. Frå same tid blir forskrift 8. november 2006 nr. 1227 om tilskot til avløysing oppheva.