Kompensasjon for riving og opprydding av pelsdyrhus

Du kan søkje kompensasjon for faktiske kostnader fråtrekt vidaresal og attvinning av materialar, for riving og opprydding av pelsdyrhus.

Dette gjeld

• riving og fjerning av bygningar, grunnmur og støypt flate
• fjerning av infrastruktur som ligg under bakkenivå 
• opprydding i samband med rivinga

Etter riving og opprydding skal arealet vere planert berrmark.

• Kompensasjon blir gjeve til pelsdyroppdrettarar som heldt pelsdyr for pelsdyrproduksjon 15. januar 2018.
• Kompensasjon kan også bli gitt til eigarar av pelsdyrhus som var leigde ut til pelsdyroppdrettarar som heldt pelsdyr 15. januar 2018.
• Pelsdyrproduksjonen må vere avslutta på vedtakstidspunktet. Produksjonen blir rekna som avslutta når det ikkje lenger blir halde levande pelsdyr i pelsdyrverksemda og pelsdyroppdrettaren har sendt frå seg skinna til auksjonshus.
• Kompensasjonen kan ikkje brukast til å drive handel med skinn.
• For at søknaden skal bli vurdert, må søknaden og planen for riving og opprydding vere fullstendig utfylt.
• Dersom riving og opprydding krev løyve etter anna regelverk, er søkjaren sjølv ansvarleg for å hente inn slike løyve.

I tillegg til søknaden skal du fylle ut ein eigen plan for riving og opprydding. Du skal også leggje ved fleire vedlegg. Vi tilrår at du har dette klart når du registrerer søknaden.

Gå til skjemaet Kompensasjon for riving og opprydding av pelsdyrhus via Altinn, for å søkje. Her blir du beden om å logge inn. Du finn informasjon om korleis du loggar inn, på nettsidene til Altinn.      

Søknadsfrist: 31. desember 2025.

• kven som søkjer
• kontonummer
• opplysningar om pelsdyrproduksjonen
• opplysningar om eigedom og eigarskap
• opplysningar som er knytte til kostnader for riving og opprydding
• kva for ein statsforvaltar som skal behandle søknaden, det vil seie der driftssenteret ligg
• eventuelle kommentarar

I tillegg til søknadsskjemaet må du fylle ut skjemaet Plan for riving og opprydding av pelsdyrhus (LDIR-286) og laste det opp i søknaden.

I dette skjemaet skal du registrere

• situasjonskart (oversikt over arealet det blir søkt for og påverka bygningar)
• tilbod på riving- og opprydding frå tenestetilbydar / oversikt over eigeninnsats
• skildring av infrastrukturen (til dømes planteikning)
• plan for / dokumentasjon på vidaresal
• plan for avfallshandtering
• opplysning om forventa tidspunkt for ferdigstilt opprydding

Når du trykkjer på «Send inn», blir søknaden automatisk send til statsforvaltaren. Dersom du brukar papirskjema, sender du søknaden med vedlegg til statsforvaltaren der driftssenteret ligg.    

Dersom du har kryssa av for at du ønskjer kvittering, får du dette tilsendt på e-post. Om du får kvittering på søknader som er sende som e-post eller vanleg post, er avhengig av rutinane hos kvar enkelt statsforvaltar.

Når statsforvaltaren har fått søknaden, sjekkar dei opplysningane du har sendt inn. Dersom dei treng meir informasjon kan dei be om dette.

Det er statsforvaltaren som behandlar søknaden og gjer vedtak. For å få kompensasjon må planen du har sendt med for riving og opprydding, godkjennast. Statsforvaltaren vurderer derfor planen i samband med søknadsbehandlinga.

Dersom rivings- og oppryddingsarbeidet heilt eller delvis er sett ut til ein tenestetilbydar, vil statsforvaltaren vurdere om kostnadene som er førte opp i tilbodet, er rimelege ut frå innhald og karakter for arbeidet. Dersom kostnadene verkar urimeleg høge, kan statsforvaltaren be deg hente inn tilbod frå fleire tenestetilbydarar.

Søknaden kan bli teke ut i kontroll. Du pliktar å godta kontroll, gje nødvendige opplysningar og hjelpe til med å gjennomføre kontrollen. Kontrollar kan gjere at saksbehandlinga tek lengre tid.

Du får svar på søknaden i innboksen din i Altinn. Dersom du har sendt papirsøknad, får du svar i e-post eller som brev i posten.

Får du kompensasjon, må du du sende oppmoding til statsforvaltaren for å få betalt ut pengane. Kompensasjonen blir betalt ut i samsvar med føresetnadene i vedtaksbrevet. 

Du kan klage på vedtaket. Send klaga til statsforvaltaren. Landbruksdirektoratet vil behandle klagesaka dersom ikkje statsforvaltaren omgjer vedtaket.     

Klagefrist: 3 veker.

Dersom det er gjort feil i utbetalingar, er gjort regelbrot eller du har gjeve feil opplysningar, kan Landbruksdirektoratet krevje tilbakebetaling og/eller avkorte kompensasjonen.