Tilskot til skogsdrift med taubane, hest og andre driftsmetodar

Kommunen fastset det enkelte år kva for driftsopplegg i skogbruket kommunen kan gje tilskot til.

Det driftsopplegget som det er vanlegast å gje tilskot til, er skogsdrift med taubane.

I delar av landet gjev ein også andre driftstilskot som kompensasjon for ulike driftsulemper – til dømes tilskot til lang terrengtransport, vekslande driftssystem og anna.

Kva for tiltak ein gjev tilskot til, og tilskotssatsane, kan variere mellom kommunane, fylka og landsdelane.

• Skogeigarar som har meir enn 10 daa produktiv skog, kan få tilskot. Denne grensa kan fråvikast dersom søknaden gjeld tiltak i samarbeid mellom fleire eigedommar.
• Ved fellestiltak skal det vere inngått ein skriftleg avtale mellom deltakarane om fordeling av kostnader og ansvar, og eventuelle vilkår for seinare oppfølging og vedlikehald.
• Skogeigaren må ha fått førehandsgodkjenning av tiltaket frå kommunen.
• Det må vere gjennomført miljøregistrering.
• I område der det ikkje er gjort ordinære miljøregistreringar, skal føre-var-tiltaka som er nedfelte i Norsk PEFC skogstandard gjennomførast.
• I tillegg må skogeigaren halde seg innanfor kommunen sine eigne
  • søknadsfristar
  • retningslinjer
  • vilkår

 Ta kontakt med landbrukskontoret i din kommune for å få meir informasjon.

Den som planlegg drifta (skogeigaren eller skogbruksleiaren), må melde inn tiltaket til kommunen. Alle tiltak etter denne tilskotsordninga må ha ei førehandsgodkjenning frå kommunen før tiltaket/drifta kan setjast i verk.

Bruk skjemaet Søknad om tilskot til drift med taubane, hest o.a. (LDIR-916) for å søkje.    

Hugs å sjekke søknadsfristen hos kommunen. 

• kven som søkjer, og opplysningar om utbetalinga
• kva du søkjer tilskot til

Send søknaden med relevante vedlegg til kommunen din.

Om du får stadfesting på søknaden du har sendt inn, er avhengig av rutinar hos kvar enkelt kommune.

Når kommunen har fått søknaden, sjekkar dei opplysningane du har sendt inn. Dersom dei treng meir informasjon, kan dei be om dette.

Kommunen behandlar søknaden og gjer vedtak.

Søknaden kan bli teke ut i kontroll. Du pliktar å godta kontroll, gje nødvendige opplysningar og hjelpe til med å gjennomføre kontrollen. Kontrollar kan gjere at saksbehandlinga tek lengre tid. 

Du får svar på søknaden på e-post eller i brev i posten, normalt i løpet av 3 veker etter at søknaden er motteken.

Får du tilskot, blir pengane i hovudsak først betalte ut når arbeidet er fullført og sluttrekneskapen er godkjend av kommunen. Du kan også få utbetalingar etter kvart som delar av tiltaket eller prosjektet er utførte. Dette må godkjennast spesielt av kommunen.

Du kan sende ei oppmoding om utbetaling digitalt i Skogfondssystemet. Søknader du kan registrere utbetalingsoppmoding på, ligg på framsida under «Mine meldingar». Dersom du ikkje kan levere digitalt, kan du registrere via papirskjemaet Utbetalingsoppmoding for tilskot til drift med taubane, hest o.a. (LDIR-931) og sende til kommunen via e-post/brev.

Du kan klage på vedtaket. Klaga sender du til kommunen. Statsforvaltaren vil behandle klagesaka dersom ikkje kommunen gjer om vedtaket.      

Klagefrist: innan 3 veker etter motteke vedtak.

Omtrentleg tid for klagebehandling: normalt innan 4 veker.

Dersom det er gjort feil i utbetalingar, er gjort regelbrot eller du har gjeve feil opplysningar, kan Landbruksdirektoratet krevje tilbakebetaling og/eller avkorte tilskotet.