Doarjja orohatplánaide

Don sáhtát ohcat doarjaga gokčat goluid ođđa orohatplána dahje boazodoalloplána ráhkadeapmái, dahje  ovdalaččas mearriduvvon orohatplána dahje boazodoalloplána rievdadeapmái.

Orohatplánat leat dehálaččat almmolaš eiseválddiide ja eará aktevrraide vai ožžot dieđuid boazodoalu birra iežaset guovlluin, nu ahte sis lea vejolašvuohta váldit vuhtii boazodoalu beroštumiid ja ovdánahttinvejolašvuođaid.

• Doarjja sáhttá juolluduvvot orohagaide ja boazoservviide mat ráhkadit orohatplána ja boazodoalloplána dahje rievdadit daid plánaid mat sis juo leat.
• Orohatplána galgá ráhkadit boazodoallolága § 62 mielde.
• Orohatplána dahje boazodoalloplána galgá leat dohkkehuvvon maŋemusat jagi maŋŋel go doarjja lea juolluduvvot. Eanandoallodirektoráhtta sáhttá dispenseret áigemearis erenoamáš oktavuođain.

Eanandoallodirektoráhtta ávžžuha ahte orohat geavaha orohatplánaid málle, mii lea ráhkaduvvon jagis 2024, go orohat ráhkada orohatplána.

Geavat skovi man Eanandoallodirektoráhtta lea ráhkadan go ozat doarjaga.

Muitte ahte dus lea jagi áigi dan rájes go Eanandoallodirektoráhtta dahká áššemearrádusa dassážii orohatplána galgá leat dohkkehuvvon.

Ohcamuššii galggat registreret

• Gii ohcci lea:
  Orohagas galgá stivra sáddet ohcamuša, dahje son guhte lea ožžon válddi sáddet ohcamuša orohaga ovddas.
  
  Boazoservviin galgá boazosearvvi jođiheaddji sáddet ohcamuša.
• Dieđut orohaga dahje boazosearvvi birra, das galgá maiddái orohaga dahje boazosearvvi namma ja organisašuvdnanummár
• Oktavuođadieđut
• Doaibmabiju čilgehus: Áigubehtet go ođđa orohatplána ráhkadit vai rievdadit orohatplána mii lea ovdalis dohkkehuvvon
• Vurdojuvvon goluid birra dieđut
• Kontonummár masá doarjja galgá máksojuvvot

Don it dárbbaš bidjat mildosiid ohcamuššii.

Sáddet ohcamuša

Skovvi ja ohcamuš galgá sáddejuvvot Eanandoallodirektoráhttii e-poasta bokte: postmottak@landbruksdirektoratet.no dahje poasta bokte dán čujuhussii: Eanandoallodirektoráhtta, Postboks 56, 7701 Steinkjer.

Go Eanandoallodirektoráhtta lea ožžon ohcamuša, de mii geahččat dieđuid maid leat sádden. Jus mii dárbbašit eambbo dieđut, de mii sáhttit daid bivdit oažžut.

Eanandoallodirektoráhtta meannuda ohcamuša ja dahká áššemearrádusa.

Ohcamuš sáhttá dárkkistuvvot. Dii lehpet geatnegahtton dohkkehit dárkkisteami ja addit dárbbašlaš dieđuid ja veahkkin čađahit dárkkisteami. Dárkkisteapmi sáhttá maŋidit áššemeannudeami.

Dii oažžubehtet vástádusa ohcamuššii Altinn bokte jus orohat dahje boazosearvi sáhttá oažžut reivviid e-gulahallama bokte dahje reivves. Dábálaččat oaččut vástádusa golmma vahkku sisa maŋŋel go mii leat ožžon ohcamuša.

Jus dutnje juolluduvvo doarjja, de máksojuvvo ruhta automáhtalaččat du kontui. Eanandoallodirektoráhtta dat máksá doarjaga.

50 proseantta doarjagis máksojuvvo dalle go juolluduvvo. Dat 50 proseantta mii báhcá máksojuvvo go Eanandoallodirektoráhtta lea ožžon ja dohkkehan raportta. Raporta galgá sisttisdoallat čilgehusa das ahte mo doarjja lea geavahuvvon ja dohkkehuvvon orohat- dahje boazodoalloplána.

Dii sáhttibehtet váidit áššemearrádusa. Váidaga galgá sáddet Eanandoallodirektoráhttii. Eanandoallo- ja biebmodepartemeantta meannuda váiddaášši jus Eanandoallodirektoráhtta ii rievdat áššemearrádusa.

Váidináigemearri: 3 vahkku dan rájes go don leat ožžon áššemearrádusa.

Jus ruhta lea boastut máksojuvvon, jus njuolggadusat leat rihkkojuvvon dahje don leat addán boasttudieđuid, de sáhttá Eanandoallodirektoráhtta gáibidit ruovttoluotta máksit doarjaga ja/dahje unnidit doarjaga.