Boazodoalu areálageavahankárttaid ođasmahttin

Maid galgá ođasmahttit

Boazodoallodáhtát galget ođasmahttojuvvot jus leat rievdadusat

• guohtungeavaheamis
• čohkkenbáikkiin
• johtingeainnuin
• bálganbáikkiin
• guohtungárddiin
• áiddiin ja gárddiin

Oanehaččat ortnega birra

• Boazodoalu areálageavahankárta (boazodoallokárta) lea ealáhusa iežas govva das mo boazodoalloguovllut geavahuvvojit. Ovttas orohatplánain lea kárta dehálaš reaidu čalmmustahttit ja čájehit makkár areálaid boazodoallu dárbbaša.
• Orohagas lea, orohatstivrra bokte, ovddasvástádus iežas orohaga areálageavahankárttaid ođasmahttima ovddas.
• Orohatstivra galgá nammadit ođasmahttinovddasvástideaddji gii praktihkalaččat čađaha areálageavahankártta ođasmahttima ođasmahttinbálvalusas.

Dása berret ráhkkanit

Ovdal go don gii leat ođasmahttinovddasvástideaddji registreret ođasmahttimiid, de berret

• geahččan kártta ja rievdadusaid mat galget dahkkot ovttas orohagain jahkečoahkkimis dahje eará heivvolaš čoahkkimis
• ráhkadan manuskártta (kártaevttohus registrerema ráhkkaneapmái), ovttas orohatstivrrain
• bures ráhkkanan vai ođasmahttinbargu manná njuovžilit ođasmahttinbálvalusas

Fuomáš! Stáhtahálddašeaddji du guovllus galgá registreren ođasmahttinovddasvástideaddji iežas siskkáldas vuogádagas, de easka doaibmá ođasmahttinbálvalus.

Dat orohagat/boazosearvvit mat eai leat nammadan ođasmahttinovddasvástideaddji galget váldit oktavuođa stáhtahálddašeddjiin iežaset guovllus. Ođasmahttinovddasvástideaddji galgá ožžon oahpaheami bálvalusa geavaheamis ovdal go beassá dasa.

Logge sisa

Logge sisa bálvalussii Altinn:a bokte go áiggut ođasmahttit boazodoallodieđuid. Don gávnnat dieđuid sisabeassama birra Altinn:a neahttasiidduin.

Maid galggat registreret

Čovdosis galggat registreret vejolaš areálageavahanrievdadusaid du orohagas. Ođđa registreremiid dárbu rievddada orohagas orohahkii.

Sárggo areálageavahanrievdadusaid nu dárkilit go vejolaš. Álgge áinnas manuskárttain go deavddát dieđuid.

Teknihkalaš bagadus areálageavahankárttaid ođasmahttimii (nibio.no)

Fuomáš! Ođasmahttin sáhttá ádjánit. Mii ávžžuhit ahte don dagat rievdadusaid go dus lea buorre dilli.

Sádde

Go deaddilat “OK”, de sestojuvvojit dieđut rievdadanloggai maid stáhtahálddašeaddji sáhttá oaidnit.

Kvalitehtasihkarastin

Stáhtahálddašeaddji geahččá rievdadanlogga ođasmahttinbálvalusas ja sihkkarastá kvalitehta.

Jus kártaobjeakta ii leat sárgojuvvon riekta dahje eará sivaid geažil berre árvvoštallojuvvot ođđasit, de váldá stáhtahálddašeaddji oktavuođa orohaga ođasmahttinovddasvástideddjiin.

Almmuheapmi

Go dieđuid kvalitehta lea sihkkarastojuvvon, de stáhtahálddašeaddji bidjá dieđuid nehttii ja areálageavahankárta ođasmahttojuvvo kártabálvalusas kilden.no.