Stimuleringstilskot til kommunar
Stimuleringstilskotet skal bidra til å sikre tilfredsstillande tilgang til tenester frå dyrehelsepersonell i næringssvake område på dagtid, det vil seie innanfor ordinær arbeidstid. Med næringssvake område meiner vi område der behovet for dyrehelsetenester, og dermed innteningsgrunnlaget for veterinærar, ikkje er stort nok til etablering av ein berekraftig veterinærpraksis. Midla skal prioriterast til kommunar som har problem med å få stabil tilgang til veterinærtenester, og som legg planar for gode, lokale løysingar. Desse momenta blir lagde særleg vekt på ved prioritering av søknadene:
- at det er dårleg næringsgrunnlag for veterinærar
- at dyretalet er lågt og infrastrukturen krevjande
- at det er vanskeleg å rekruttere og halde på veterinærar
- at stimuleringstiltaket på tenleg vis kan bidra til å sikre tilfredsstillande tilgang til tenester frå dyrehelsepersonell
Kommunar som har utfordringar med å få nok veterinærar til å delta i klinisk veterinærvakt utanom ordinær arbeidstid, kan for 2023 stille krav om vaktdeltaking for at veterinærane skal kunne ta imot stimuleringstilskot. Ein føresetnad for å kunne stille eit slikt krav er at kommunane sin bruk av middel over ordninga er i tråd med føremålet med stimuleringstilskotet, som er å bidra til å sikre tilfredsstillande tilgang på tenester frå dyrehelsepersonell på dagtid.
Vedtak om stimuleringstilskot gjeld for det kalenderåret tilskotet er løyvd for. Stimuleringstilskotet kan ikkje nyttast til finansiering av andre ordningar som får øyremerkt støtte over statsbudsjettet eller jordbruksoppgjeret. Det er til dømes ikkje høve til å nytte tilskotet til vederlag for klinisk veterinærvakt utanom ordinær arbeidstid eller til å dekkje kostnader ved veterinærreiser.
Kommunar kan lyse ut ordninga
Kommunar som ønskjer å søkje om stimuleringstilskot, kan lyse ut ordninga på den måten dei finn hensiktsmessig, og setje ein frist for å søkje om slike middel frå kommunen:
- Kommunen bør gjere ordninga kjend for alle veterinærar som arbeider eller bur i området søknaden gjeld for, slik at alle veterinærar får same høvet til å søkje.
- Kommunen kan gjere ordninga kjend så snart det er sett av middel over statsbudsjettet til stimuleringstilskot for det komande kalenderåret. Normalt blir dette kunngjort i Prop. 1 S frå Landbruks- og matdepartementet, som kjem i oktober.
- Søknadsfristen må setjast så tidleg at kommunen rekk å gå gjennom søknadene før kommunen skal søkje om middlel frå statsforvaltaren.
Det finst ikkje eit eige søknadsskjema for å søkje om stimuleringstilskot frå kommunen.
Stimuleringstilskot til Svalbard
Stimuleringstilskot til Svalbard skal bidra til å sikre tilfredsstillande tilgang til tenester frå dyrehelsepersonell både innanfor og utanfor ordinær arbeidstid, men det er ikkje meint å skulle bidra til å etablere ei vaktteneste. Svalbard kan sidestillast med næringssvake område på fastlandet når det gjeld høvet til å ha tilgang til veterinærtenester. Desse momenta blir lagde særleg vekt på ved prioritering av søknadene
- at tiltaket på tenleg vis bidreg til å sikre tilfredsstillande tilgang til tenester frå dyrehelsepersonell gjennom heile året
- at midla blir fordelte på fleire søkjarar for å gjere veterinærdekninga mindre sårbar
Vedtak om stimuleringstilskot til Svalbard gjeld for det kalenderåret tilskotet er løyvd for.
Dette bør du førebu
I søknaden skal du skildre tiltaka du søkjer om støtte til, og grunngi søknaden. Vi anbefaler at du har skildring og grunngjeving klar når du skal fylle ut søknadsskjema, samt eventuelle vedlegg du ønskjer å laste opp i søknaden.
Dersom du fekk stimuleringstilskot i føregåande søknadsomgang, skal du rapportere om bruken av midla i søknadsskjema. Finn fram dokumentasjon som viser kva midla blei brukte til, og eventuelle vedlegg du eventuelt ønskjer å laste opp i søknaden.
Kommunar som går saman om å søkje om stimuleringstilskot, bør på førehand ha avtalt korleis eventuelle middel skal delast mellom dei.
