Rennesøy

I bratte hellingar mot kystlinja er det tørrbakkar, eng og lauvtrelundar med svært høgt artsmangfald – eit  resultat av langvarig drift, godt jordsmonn og klima. Ein finn 480 planteartar her, mange truga og sjeldne, og fem som ikkje finst andre stader i Noreg. Områda har ei bruks- og busettingshistorie på omlag 6000 år, mellom dei eldste i landet. Denne finn ein att i gravhaugar, piggsteingardar, steingardar, gamle ferdselsårer, nausttufter og torvhus. Kystlyngheiområda, resultat av brenning og beitedyr gjennom generasjonar, vert haldne i hevd. Områda ligg lett tilgjengeleg for friluftsopplevingar og dei merka turstiane i områda er mykje brukt av turgåarar.