Doarjja iešguđetlágan ovddidandoaimmaide

Don sáhtát ohcat doarjaga

• praktihkalaš doaibmabijuide boazodoalus
• čađahit strukturdoaibmabijuid orohagas
• fágalaš doaibmabijuide mat ovddidit boazodoalu
• láhčit dili 1-2 beaivásaš gealboloktenkursii/lassiohppui
• dálkkádatrievdamii guoskevaš doaibmabijuide boazodoalloealáhusa váste
• orohatplána hábmemii orohagaide main váilu orohatplána
• eará ovddidandoaimmaide

Buot eará doaimmaide leat sierra ohcanskovit BOF-njuolggadusaid vuođul.

Doaibmabidju galgá

• leat mielde ovddidit boazodoalloealáhusa boazodoallopolitihkalaš mihtuid ektui. Boazodoallopolitihkalaš mihtuid gávdná boazodoallolágas § 1 ja iešguđetlágan stivrendokumeanttain, ovdamearkka dihte Granavoldenplattformen, Stuoradiggedieđáhus 32 je.
• ovddidit boazodoalu orohagas dahje guovllus. Das oaivvilduvvo ahte doaibmabidju man áiggut čađahit galgá sáhttit ovdánahttit ja leat buorren alccat ja iežat siidaoassái, muhto maiddái earáide.
• oktiivástidit gustovaš lágaide ja njuolggadusaide.

Don galggat bidjat mielddusin dárbbašlaš mildosiid ohcamuššii. Makkár mildosiid galggat bidjat lea dan duohken ahte makkár doaibmabidjui ozat doarjaga.

Boazodoalu ovdánahttinfoanda

Geavat skovi Ohcamuš doarjagiidda Boazodoalu Ovdánahttinfoandda njuolggadusaid § 1-6 nuppi lađđasa vuođul (LDIR-669) ohcat doarjaga.

Iešguđetlágan ovdánahttindoaimmaid doarjagii ii leat ohcanáigemearri, ohcamušaid sáhttá sáddet birra jagi. Man olu ruhta foanddas lea mearrida ahte sáhttá go doarjja juolluduvvot.

• gii ohcci lea
• masa ozat doarjaga
• man olu doarjaga ozat
• dárkilis čilgehusa doaibmabijus
• doaibmabiju olggosgoluid bušeteren
• ruhtadanplána

Dasa lassin galggat bidjat mielddusin vejolaš fálaldagaid lágideddjiin dahje eará dokumeanttat mat sáhttet leat ávkin go du ohcamuš galgá meannuduvvot.

Sádde ohcamuša mildosiiguin Eanandoallodirektoráhttii e-poastta bokte čujuhussii postmottak@landbruksdirektoratet.no dahje poastta bokte čujuhussii Landbruksdirektoratet, Postboks 1450 Vika, N-0116 Oslo.

Go Eanandoallodirektoráhtta lea ožžon ohcamuša, de oaččut duođaštusa e-poastta dahje poastta bokte ahte ohcamuš lea joavdán. Reivves oaččut maiddái dieđu goas Boazodoalu Ovdánahttinfoanda sáhttá meannudit ohcamuša, dahje sáhttá go Eanandoallodirektoráhtta meannudit ohcamuša hálddahuslaččat.

Go Eanandoallodirektoráhtta lea ožžon ohcamuša, de sii isket dieđuid maid leat addán. Jus dárbbašit eanet dieđuid, de sáhttá direktoráhtta bivdit dus daid.

Eanandoallodirektoráhtta meannuda álggos ohcamuša. Sii dahket árvalusevttohusa man ovddidit Boazodoalu Ovdánahttinfoandda stivrii. Stivra árvvoštallá ohcamuša ja dahká loahpalaš mearrádusa áššis.

Eanandoallodirektoráhtta sáhttá meannudit hálddahuslaččat muhtun áššiid áirrasgotti bokte. Dat guoská áššiide main eai čuožžil prinsihpalaš čuolmmat ja main ohcansubmi lea vuollel 200 000 ruvnno.

Ohcamuš sáhttá dárkkistuvvot. Don leat geatnegahtton dohkkehit dárkkisteami, addit dárbbašlaš dieđuid ja veahkehit čađahit dárkkisteami. Dárkkisteapmi sáhttá maŋidit áššemeannudeami.

Dábálaččat váldá oaneheappot áiggi meannudit hálddahuslaš áššiid mat eai galgga Boazodoalu Ovdánahttinfoanddas meannuduvvot. Boazodoalu Ovdánahttinfoanddas leat dábálaččat njeallje čoahkkima jagis. Čoahkkindáhtoniid ja eará dieđuid gávnnat dáppe. Ohcamuša vástádus boahtá dutnje e-poasttas dahje reivves go ohcamuš lea meannuduvvon.

Jus dutnje juolluduvvo doarjja, de máksojuvvo 50 proseantta doarjagis automáhtalaččat báŋkokontui man ledjen čállán ohcanskovvái. Bázahusdoarjja máksojuvvo go rehketdoallu ja duođaštusat leat sáddejuvvon ja dohkkehuvvon. Jus it dárbbašan olles ohcansupmi, de ii máksojuvvo olles ohcansupmi dutnje.

Eanandoallodirektoráhtta dat máksá doarjaga.

Don sáhtát váidit mearrádusa. Váidaga sáddet Eanandoallodirektoráhttii. Eanandoallodirektoráhtta ráhkkanahttá váiddaášši Boazodoalu Ovdánahttinfoandda stivrii, geat dahket áššemearrádusa. Jus eai rievdat ášši bohtosa, de sáddejuvvo váidda Eanandoallo- ja biebmodepartementii geat dahket loahpalaš mearrádusa áššis.

Váidináigemearri: 3 vahku dan rájes go diehtu áššemearrádusa birra bođii dutnje

Jus lea boastut máksojuvvon, jus njuolggadusat leat rihkkojuvvon dahje don leat addán boasttudieđuid, de sáhttá gáibiduvvot ahte mávssát ruovttoluotta olles dahje oasi doarjagis.