Om tollkvotar

Som hovudregel kan alle føretak registrerte i einingsregisteret få tildelt kvoteandel. Somme kvotar fordelt ved søknad har spesifikke krav til deg som søkjar, og du kan lese meir om dette under kvotar fordelt etter søknad. I tillegg er det spesielle krav til kvotane for såfrø og eplesaft som vert fordelt på auksjon. Som du kan lese meir om under kvotar fordelt på auksjon. Privatpersonar kan ikkje få tildelt kvoteandel, med unntak av kvoten for islandshest.

Korleis får du kvoteandel

I dag vert dei fleste tollkvotane fordelte ved auksjon, og nokon vert fordelte etter søknad. Lurar du på kva fordelingsmetode som gjeld for tollkvoten du er interessert i, sjå oversikt over tollkvotane. Beskriving av dei ulike fordelingsmetodane finn du under avsnitta om auksjon og søknad.

Nokre kvotar for kjøt og plantar vert fordelte av Tolletaten etter «førstemann til mølla»-prinsippet. Redusert tollsats innanfor kvoten vert gitt automatisk ved fortolling.

Korleis bruke kvoteandel

For å kunne importere innanfor kvoteandelen din, treng du eit importløyve for tollkvotar (ITT) frå Landbruksdirektoratet.

Importløyvet bruker du ved fortolling hos Tolletaten. For dei aller fleste kvotane kan du vidareselje heile, eller delar av, din kvoteandel.

Import og uttak av kvoteandel

Dersom du har kjøpt kvoteandel på auksjon kan du ikkje søkje om uttak av denne før du har betalt fakturaen. Vi sender deg ein samla faktura for alle kvoteandelar du har fått tildelt i ein auksjonsrunde når runden er ferdig. For kvotar fordelt etter søknad kan du søkje om uttak av kvote så snart du har fått vedtak om tildeling.

For å kunne importere tildelt kvoteandel, treng du eit importløyve for tollkvotar (ITT). For å få ein ITT, må du søkje om uttak av kvote via søknadsskjema som du finn på vår side om å kjøpe tollkvote på auksjon. Søknad om uttak av kvote i Altinn vert automatisk svart på, og du får normalt ITT i løpet av få minutt.

Kvote med fleire varenummer

Nokre kvotar gjeld for fleire varenummer, og då må du spesifisere kva vare du skal importere slik at løyvet vert gyldig for rett varenummer. Du treng ikkje spesifisere varenummer for ostekvoten frå EU som gjeld heile posisjon 04.06.

Du kan få fleire ITT-er innanfor same kvoteandel, og treng ikkje å søkje om uttak for heile kvoteandelen med ein gong. Dette kan vere praktisk dersom du skal importere på fleire varenummer eller vidareselje delar av kvoteandelen.

Kvoteandelen er i dei fleste tilfella omsetteleg og kan seljast vidare til andre importørar. Sjølve salet av kvoteandelar går berre føre seg mellom aktørane, men salet må meldast til Landbruksdirektoratet for at importrettane skal overførast.

For å melde salet, gå til registrere sal av tollkvote. I denne tenesta kan du få oversikt over eigne tildelte kvoteandelar og kvoteuttak. Importen må skje i kvoteeigars namn. Kvoteandelar kan ikkje omsetjast etter slutten av kvoteperioden.