Njuolggadusat boazomearkkaid birra Tromssas

1. Váldi

Mearkalávdegoddi sáhttá mearridit dievasmahtti njuolggadusaid mearkkaid birra, movt mearkavuogádat galgá leat Tromssas.

Mearkalávdegottis lea boazodoallolága § 38 vuosttaš lađđasa goalmmát cealkaga vuođul, ovddasvástádus gozihit ahte mearkkas lea dakkár hápmi ahte ii sáhte seahkanit dahje boastut geavahuvvot. Mearkalávdegoddi galgá, seammas go bearráigeahččá ahte boazodoallu doaimmahuvvo vuohkkasit ja skihkalaččat, vuhtiiváldit mearkka árbevirolaš geavaheami ja hámi, earret eará galget bearraša árbevirolaš mearkkat doalahuvvot, geahča boazodoallolága § 38 vuosttaš lađđasa njealját cealkaga.

Tromssa boazoguohtunguovllus leat sihke julevsámi ja davvisámi mearkaárbevierut. Dáid mearkaárbevieruid galgá vuhtiiváldit mearkkaid dohkkeheamis.

Tromssa mearkalávdegoddi lea skábmamánu 8. beaivvi 2018 mearridan njuolggadusáid mearkkaid birra.

Njuolggadusat leat dohkkehuvvon Boazodoallostivrras cuoŋománu 15. beaivvii 2020.

2. Mearkasánit

2.1 Váldosánit

Váldosánit leat stuora časkkástagat maid álkit oaidná bohcco bealjis: gieška, hoaŋka, gaskat, guobir, skivdnji ovddal/maŋil, lottigazza ja “gaskat ja nihtta”.

2.1.1

Geaiggobealjis (go eai leat váldosánit) lea vatnja nanu sátni ja dovdomearkka, ja dahká geaiggobealjis mearkka váldohámi mihtilmasvuođa ja earenoamášvuođa.

2.2 Smávvasánit

Rievdadusat mat bohtet lassin váldosániide: ceahkes, sárggaldat, vatnja, luddestat ja moskoráigi/ráigi.

2.2.1

Geaiggobealjis (go eai leat váldosánit) lea luddestat bealljegeažis dehalaš ja nanu dovdomearkka mii dahka váldohámi mihtilmasvuođa ja earenomášvuođa.

2.3 Geaiggobeallji

Geaiggobealjji (go eai leat váldosánit) ja jalgat (go eai leat smávvasánit) dahkaba mearkaoali ja mearkkaid seamma ládje go mearkkat main leat váldosánit ja smávvasánit.

3. Definišuvnnat

3.1 Vuođđomearka

Álgomearka almma maŋŋil addojuvvon rievdadusaid haga.

3.2 Mearkaoalli

Váldosánit ja smávvasánit váldosániid sisa, mat dahket mearkka váldohámi mihtilmasvuođa.

Bearraša mearkaoalli lea vuolgán soga vuođđomearkas ja jotkojuvvon go leat doalahuvvon váldosánit ja smávvasánit váldosániid sisa.

3.3 Árbevirolaš sohkamearka

Árbejuvvon mearka mii lea rievddatkeahtta fievriduvvon ovddeš buolvvas dálá bulvii bearraša siskobeal.

3.4 Rievdadusmearka

Spesifihkka mearka mas leat smávva sátneerohusat mat earuhit dan eará mearkkain gullevaš seamma vuođđomerkii.

4. Vuođđoprinsihppa mearkaárvvoštallamis

Vuođđoprinsihppa lea ahte ođđa mearkkas ferte leat seamma mearkaoalli go su mearkkas gean bokte ohccis lea boazodoalloriekti boazodoallolága § 32 mielde, ja rievdadusaidguin (smávvá sániidguin) dasto earuha mearkka sierralágánvuođa (rievdadusmearka).

Rievdadusmearkka galga ohcat sisačállit dan siidii/orohahkii gosa mearka mas ohca rievdadusa gullá.

Jus ohcá mearkka náittosguoibmái/ovttasássái gii ii olat mearkavuoigatvuođa gaibadusaid boazodoalolága § 32, 1. ja 2. lađđa bokte, muhto oažžu mearkavuoigatvuođa boazodoalolága § 32, 3. lađđasa bokte, de galga sutnje ohcat rievdadus náittosguimmi/ovttasássi mearkkas.

5. Spiehkasteapmi vuođđoprinsihpas

5.1

Mearkalávdegoddi sáhttá árvvoštallat spiehkastit vuođđoprinsihpas jus buot čuovvovaš eavttut leat ollašuvvon:

Váhnemiid mearkaoalit galget leat dievvan,
Rievdadusa galgá ohcat mearkas mii lea gullevaš fuolkái bajásmanni linnjás, ja
Rievdadusa galgá ohcat mearkas mii lea/lea leamaš anus seamma siiddas/orohagas gosa ohcii galga gullat.

Čujuhuvvo NOU 2001:35, pkt 9.4.2.1:

“mearka sáhttá maid leat rievdadus fuolkki njuola bajásmanni linnjás, nugo váhnenváhnemiid, ednuid/čeziid/egiid ja siesáid/muoŧŧáid/goaskkiid mearkkain.”