For eigedommar i kommunar med nullgrenseforskrift kan det vera buplikt på eigedommar som elles er halde unna det. Formålet med slike forskrifter er å hindra at eigedommar som bør brukast til heilårsbustad blir brukte til fritidsformål. Kommunar med nullgrenseforskrift har bestemt at reglane om konsesjonsfridom utan buplikt heilt eller delvis ikkje gjeld. Dersom eigedommen ligg i ein kommune med nullgrenseforskrift, kan ein sjekka forskrifta for å finna ut om ho gjeld for eigedommen.
Sjå oversikt over kommunar med nullgrenseforskrift
Ei forskrift om nedsett konsesjonsgrense kan gjelda følgjande eigedommar:
- utbygd eigedom som er eller har vore i bruk som heilårsbustad
- eigedom med busetnad som ikkje er teken i bruk som heilårsbustad under dette eigedom under oppføring regulert til bustadformål
- ubygd tomt regulert til bustadformål
Forskrifta til kommunen kan fastsetjast for eitt eller fleire av alternativa.
Konsesjonsfridommen kan setjast ut av kraft for heile kommunen eller eit nærare definert område. Dette kjem fram i forskrifta.
Dersom forskrifta gjeld for eigedommen, må ervervar søkja konsesjon dersom ho eller andre ikkje skal bu på eigedommen. Skal buplikta oppfyllast, kan ervervar overta konsesjonsfritt. Buplikta gjeld for heile eigartida. Konsesjonsfridommen blir stadfesta ved eigenerklæring.
Konsesjonsfridom for nær slekt
Nullgrenseforskrifta kan også innehalda unntak frå slektskapsunntaket. Det betyr at nær slekt ikkje kan overta konsesjonsfritt. Dei fleste kommunar som har forskrift om nedsett konsesjonsgrense har ikkje sett slektskapsunntaket ut av kraft. Det betyr at nær slekt kan overta konsesjonsfritt. Nær slekt kan overta konsesjonsfritt viss
- overdreg har hatt tinglyst heimel til eigedommen i minst fem år før overdraginga
- overdreg har konsesjonsforholdet sitt i orden
Ved erverv av eigedom som blir regulert av forskrift, kan ervervet vera konsesjonsfritt med eller utan buplikt. Ervervar skal då fylla ut eigenerklæring om konsesjonsfridom i kommunar med nedsett konsesjonsgrense.
Dersom eigedommen ikkje kan ervervast konsesjonsfritt, må ervervar søkja konsesjon.
Upersonleg buplikt
Buplikta kan oppfyllast av deg sjølv eller andre i di eigartid. Buplikta blir oppfylt ved at du eller nokre andre er registrerte som busett på eigedommen i Folkeregisteret. Dersom du eller andre ikkje skal bu på eigedommen, må du søkja konsesjon.
Konsesjonsvurderinga ved nullgrenseforskrift
Det skal givast konsesjon utan buplikt når:
- det ikkje er nødvendig å hindra at eigedommen blir bruk til fritidsformål
- eigedommen berre kan avhendast som heilårsbustad til ein pris som er lågare enn prisnivået for tilsvarande heilårsbustader i området
I vurderinga av om det er nødvendig å hindra at eigedommen blir brukt til fritidsformål, legg kommunen mellom anna vekt på
- plasseringa av eigedommen
- om området der eigedommen ligg har karakter av å vera eit utprega fritidsområde
- arten og standarden til busetnaden
- kor lang tid det har gått sidan eigedommen vart brukt som heilårsbustad
- kor lang tid eigedommen vart brukt som heilårsbustad
- om det er pårekneleg at andre vil kjøpa eigedommen for å bruka han til heilårsbustad
Forskrifta gjeld ikkje
Dersom den utbygde eigedommen er større enn 100 dekar eller har meir enn 35 dekar fulldyrka eller overflatedyrka jord, kjem ikkje nullgrenseforskrifta til bruk.
