- Hjem
- Jordbruk
- Informasjon om straumstøtte
- Vatningslag
Vatningslag
Lag eller anna samanslutning registrert i Einingsregisteret, og som driv med vatning av jordbruksareal som blir disponert av minst to jordbruksføretak.
Oversikt over kva som gjeld for vatningslag
- Vatningslag må sende inn éin søknad for perioden april–juni, og éin søknad for perioden juli–oktober. Følgjande søknadsfristar gjeld:
- 30. september for perioden april–juni same år
- 31. desember for perioden juli–oktober same år
- I søknaden må du oppgi alle målepunkt(a) med straumforbruk til vatning av jordbruksareal, og straumutgiftene per månad. Viss føretaket har sikringsavtale, skal du også leggje ved dokumentasjon på resultatet av den finansielle sikringa i søknaden.
- Det blir gitt straumstøtte for straumutgifter til vatning av jordbruksareal.
- Målepunkt(a) må tilhøyre vatningslaget.
- For å gjere endringar må verksemda trekkje søknaden og sende ny (før fristen/før det er gjort vedtak).
- Utbetalingar skjer løpande etter behandling.
Spørsmål og svar om vatningslag
-
Det følgjer av straumstøtteforskrifta § 7 at støttebeløpet for vatningslag blir berekna på grunnlag av forbruk som er registrert på målepunkt som «tilhører» verksemda. At målepunktet må tilhøyre vatningslaget inneber at det må vere tilstrekkeleg tilknyting mellom straumutgiftene vatningslaget har til vatning av jordbruksareal, og målepunktet som blir oppgitt i søknaden om straumstøtte. I utgangspunktet vil det innebere at vatningslaget må vere nettkunde og eigar av målepunktet, og til dømes ikkje eitt av føretaka som er med i vatningslaget. Det er føretaket/verksemda som står på fakturaen frå nettselskapet, som blir rekna som nettkunde. Landbruksdirektoratet føreset at vatningslaget tek dei nødvendige stega som er moglege å gjennomføre for å bli nettkunde.
I nokre tilfelle vil det likevel ikkje vere mogleg for vatningslaget å bli nettkunde på målepunktet. Unntaksvis vil ein då konkret vurdere om det er ei tilstrekkeleg tilknyting mellom verksemda til vatningslaget og målepunktet. I slike tilfelle må vatningslaget kunne leggje fram dokumentasjon som viser at målepunktet har ei direkte kopling til vatninga av jordbruksareal, og at det er fakturaen frå straumselskapet som er avgjerande for straumutgiftene verksemda har. Det inneber til dømes at eventuelle påslag eigar av målepunktet tek i tillegg til straumutgiftene til vatningslaget, fell utanfor det verksemda kan få straumstøtte for.
-
Vatningslag kan få støtte for straumutgifter til «vanning» av jordbruksareal. Med jordbruksareal siktar ein til fulldyrka og overflatedyrka jord og innmarksbeite, slik det kjem fram av jordbruksavtalen pkt. 7.7.2, som igjen byggjer på FBK-AR5 (felles kartdatabase arealressurskart i målestokk 1:5 000).
Det er eit vilkår at arealet blir disponert av minst to jordbruksføretak.
-
Du skal oppgi straumforbruket og straumkostandane for alle målepunkta som blir brukte til føretakets vatning. Du skal berre føre opp det straumforbruket og dei straumutgiftene som knyter seg til vatninga. Straumforbruket oppgir du i talet på kilowattimar (kWt) som er brukt til vatning på målepunktet, for kvar månad du søkjer støtte. I tillegg oppgir du straumkostnadene (kr) du har hatt for det aktuelle forbruket, for kvar månad du søkjer støtte. Du skal ikkje inkludere meirverdiavgift eller nettleige i straumkostnadene du oppgir.
Straumforbruk og straumutgifter som går til andre føremål enn vatning, skal ikkje førast opp. Om du har eit målepunkt der delar av forbruket går til noko anna enn å vatne jordbruksareal, og du ikkje har undermålar som gir presise tal for dette forbruket, må du estimere kor mange kWt som går til vatning. Når du fyller ut søknadsskjemaet må du trekkje frå både forbruket og kostnadene som knyter seg til noko anna enn vatning.
Døme: Dersom det samla talet kWt for éin månad på eitt av målepunkta dine er 10 000 kWt, og 3 000 av desse kWt går til anna enn vatning, skal du oppgi 7 000 kWt som straumforbruk i søknaden. Total straumpris på straumfakturaen kan til dømes vere 9 000 kr, med ein spotpris på 90 øre/kWt. Som kostnad på dette målepunktet skal du i dette dømet føre opp 6 300 kr (7 000 kWt * 90 øre/kWt / 100).
Viss føretaket har ein prissikringsavtale, skal du laste opp resultatet av sikringsavtalen som vedlegg til søknaden. Du skal ikkje inkludere resultatet av sikringsavtalen når du oppgir månadlege utgifter i søknaden. Det blir gjort av Landbruksdirektoratet under saksbehandlinga. I tillegg må du laste opp fakturaer for månadene du søkjer om støtte.
Døme på faktura til eit føretak med prissikring, og utfylling av straumforbruk og utgifter i søknadsskjemaet:
-
Dersom du ønskjer å leggje til nye målepunkt eller fjerne eksisterande målepunkt, eller gjere andre endringar etter at du har sendt inn søknad, må du trekkje søknaden din og levere ein ny søknad. Dette gjer du ved å logge deg inn på same måte som då du leverte søknad, og vel «Eg skal» og deretter «Trekk søknad».
Søknadene blir fortløpande behandla, og vi baserer oss på dei opplysningane som kjem fram av innsendt søknadsskjema. Etter at søknadsfristen for perioden du har søkt om støtte er utgått, får du ikkje endra søknaden sjølv. Sjå spørsmålet nedanfor «Kva skal eg gjere dersom eg ikkje fekk sendt inn søknad/endra søknaden innan fristen?».
Viss søknaden er ferdig behandla og du har fått vedtak, kan du ikkje gjere endringar i søknaden.
-
I utgangspunktet mistar du moglegheita til å få straumstøtte dersom fristen for å søkje/endre søknaden er gått ut eller dersom innsend søknad er ferdigbehandla. Landbruksdirektoratet kan likevel i «særlige tilfeller» gi dispensasjon/unntak frå ein frist. Vi minner om at du framleis må sende inn søknad for periodar der fristen ikkje er gått ut via nettsidene våre/Altinn.
For å søkje om dispensasjon ber vi om at du gjer følgjande:
- Send førespurnad/søknad til stromstotte@landbruksdirektoratet.no, eller per post til Landbruksdirektoratet, Postboks 56, 7701 Steinkjer. Opplys gjerne tydeleg om at det er ein dispensasjonssøknad.
- Oppgi organisasjonsnummeret til føretaket.
- Oppgi kva periode det blir ønskt å søkje om/få støtte for (som du ikkje kan søkje om via nettsidene våre/Altinn sidan fristen er gått ut).
- Oppgi årsaka til at det ikkje vart søkt innan fristen og legg ved eventuell dokumentasjon som stadfestar dette (t.d. ei legeerklæring). Vi ber deg grunngi dispensasjonssøknaden så godt som mogleg.
Sensitive opplysningar må ikkje sendast per e-post, og eventuell dokumentasjon på fristoversitjinga som inneheld slike opplysningar kan sendast per post til Landbruksdirektoratet, Postboks 56, 7701 Steinkjer. Noter i dispensasjonssøknaden (e-posten) at dokumentasjon blir ettersendt per post.
Dispensasjonssøknader blir fortløpande behandla.
-
Straumstøtte til kvart enkelt vatningslag blir berekna etter følgjande formel frå og med 2025, jf. forskrifta § 7:
(dei faktiske kostnadene til føretaket per kWt – 75 øre per kWt eksklusive meirverdiavgift) * 0,80 * 1,25 * tal på kWt forbruk.
- Støtte blir berekna med grunnlag i føretakets faktiske straumkostnader. Nettleige og meirverdiavgift inngår ikkje i dei faktiske straumkostnadene.
- Alle målepunkta som tilhøyrer vatningslaget, og kor heile eller delar av straumforbruket går til vatning av jordbruksareal, skal registrerast i søknaden.
- Vatningslaget får berre støtte dersom gjennomsnittlege faktiske straumutgifter overstig 75 øre per kWt per månad eksklusive meirverdiavgift (73 øre t.o.m. oktober 2024, og 70 øre t.o.m. oktober 2023).
- Næringsdrivande kan få frådrag for inngåande mva. Som følgje av at meirverdiavgift blir teke i betraktning (verdien 1,25 i formelen), får føretaket i realiteten full dekning for dei faktiske kostnadene sine over 75 øre per kWt (73 øre t.o.m. oktober 2024, og 70 øre t.o.m. oktober 2023).
- I dei tilfella der vatningslaget har ein prissikringsavtale, og denne har direkte betydning for føretakets faktiske straumkostnader, skal resultatet av avtalen leggjast ved søknaden. Resultatet vil takast omsyn til når faktiske straumkostnader blir berekna av Landbruksdirektoratet.
- Straumstøtta blir berekna med utgangspunkt i opplysningane føretaket oppgir i søknaden om straumkostnader per månad, straumforbruk per månad og eventuelle prissikringsavtalar. Ved ein eventuell kontroll, kan føretaket bli bede om å dokumentere dei oppgitte opplysningane.
-
Dersom du ønskjer å klage på eitt eller fleire av vedtaka våre, ber vi deg om å gjere følgjande:
- Send skriftleg klage til stromstotte@landbruksdirektoratet.no, eller per post til Landbruksdirektoratet, Postboks 56, 7701 Steinkjer. Opplys gjerne tydeleg om at det er ei klage.
- Oppgi organisasjonsnummeret til vatningslaget.
- Oppgi kva vedtak du klagar på.
- Oppgi kvifor du klagar på vedtaket/vedtaka og legg ved eventuell dokumentasjon som kan vere relevant for oss når vi skal behandle klaga di. Vi ber deg grunngi klaga så godt som mogleg.
Sensitive opplysningar må ikkje sendast per e-post, og eventuell dokumentasjon som inneheld slike opplysningar kan sendast per post til Landbruksdirektoratet, Postboks 56, 7701 Steinkjer. Noter i klaga (e-posten) at dokumentasjon blir ettersendt per post.
Vi minner om at klagefristen er tre veker frå du fekk vedtaksbrevet (som hovudregel datoen vedtaksbrevet er datert).
Klager blir fortløpande behandla. Vi har for tida stor sakspågang, og ber om forståing for at det kan ta noko tid å få klaga behandla.
Kjem Landbruksdirektoratet til at vedtaket som er påklaga bør oppretthaldast (kjem til same resultat), vil klaga di sendast til Landbruks- og matdepartementet som klageinstans for endeleg behandling.