– Mads Renander lea vyörtegs vitnije. Mijjieh eevre jearohke noere båatsoeburrijste gïeh sijhtieh bovtsigujmie gïehtelidh jïh seamma tïjjen ïedtjem utnieh mubpieh skreejrehtidh jïh båatsoem evtiedidh goh jieledefååjmies jieleme, laanteburrie- jïh beapmoeministere Nils Kristian Sandtrøen jeahta.
Åssjaldahke daan jaepien båatsoeburrine lea aktem båatsoeburriem åvtese lutnjedh jïh dïsse jååhkesjimmiem vedtedh, mij sov barkoen tjïrrh båatsosne jïh sov ïedtjine lea viehkiehtamme båatsoem nænnoestidh jïh positijvelaakan lutnjedh.
Laanteburrie- jïh beapmoedepartemeente, Nöörjen Båatsoesaemiej Rïjhkesiebrie (NBR) jïh Bovtsenbearkoen maarkedemoenehtse baalhkam joekedieh. NBR:n noeremoenehtse lea kandidaath buakteme daan jaepien baalhkese.
Baalhka lea vadtese jïh feelemestipende 15 000 kråvnine. Stipende edtja åtnasovvedh jeatjah båatsoesïjtine vïesehtidh, bovtsenbearkoesïeltine jallh jeatjah sjyöhtehke aktöörine mïnnedh.
Veeljememoenehtsen tjielkestimmie
Båatsoen leah gellie noere, tjiehpies jïh ïedtjije båatsoeburrieh mah positijvelaakan froskestellieh. Guktie dah viehkiehtieh båatsoem nænnoestidh jïh lutnjedh lea joekehts. Naakenh sijjen ïedtjem politihken tjïrrh nuhtjieh, mearan jeatjebh sosijaale medijah areenine nuhtjieh. Jeatjebh sijjen jieledem bovtsi luvnie jïh bijjene vaeresne nuhtjieh.
Daan jaepien båatsoeburrie – båatsoesaemie – lea tjarke våajnoes sov nænnoes ïedtjen gaavhtan, sov nænnoes maehtelesvoeti tjïrrh, jïh sov vaajnoen gaavhtan bovtsese jïh båatsose åarjelsaemien dajvesne. Dïhte seadtoes, ussjedihks jïh radtjehke, væjkele bovtsigujmie jïh eatnaminie, almetjigujmie jïh jeatjah kreekigujmie. Mads gaajhkh bielieh båatsosne haalvoe jïh jieledevuekiem bovtsen mietie.
Trollheimen sïjtesne bovtsigujmie gïehtele sjïere mierieeaktoej nuelesne. Vaarjelimmienjoelkedassh Trollheimen eatnemevaarjelimmiedajvesne gaertjiedimmieh biejieh man åvteste sïjte ij iktesth doh seamma nuepieh utnieh goh jeatjah båatsoedajvh. Dajve lea vihkeles åarjelsaemien gïelese, kultuvrese jïh aerpievuekien daajrose, jïh båatsoe lea vihkeles kultuvreguedtije regijovnesne. Læjhkan Mads daah haestemh positiviteetine jïh kreativiteetine dååste jïh raerieh vuajna. Dïhte nuepieh vuajna desnie gusnie jeatjebh gaertjiedimmieh vuajna, jïh ij bïllh orre vuekieh pryövedh jallh jïjtse geajnoeh vaedtsedh gosse dïhte maahta buerebe jïh nænnoesåbpoe båatsoem vedtedh.
Mads lea åehpies ihke satne fuelhkiem, slïekth jïh kraannasïjth vååksje, gusnie maaje barkoefaamojne, dååjrehtimmine jïh daajrojne viehkehte. Dïhte viehkine båata gosse jeatjebh viehkiem daarpesjieh, jïh lea meatan doh sosijaale ektiedimmieh jïh laavenjostoem båatsoeburriej gaskem nænnoestidh sïjteraasti dåaresth. Dan boerehksvoeten jïh veahkadihksvoeten gaavhtan dïhte vyörtegs almetjinie sjædta båatsoebyjresisnie.
Mads Renander lea båetijen aejkien tjirkije åarjelsaemien båatsosne. Dïhte nuepieh vuajna desnie gusnie jeatjebh heaptoeh vuejnieh. Mads lea madtjeldehtije jïh vyörtegs kandidaate Daan jaepien båatsoeburrine – båatsoesaemie - sjïdtedh.
