– Mads Renander lea árvvolaš vuoiti. Mii dárbbašit nuorra boazodolliid geat áigot áŋgiruššat boazodoalu ovddas ja geat seammás beroštit movttiidahttit earáid ja ovddidit boazodoalu ceavzilis ealáhussan, dadjá eanandoallo- ja biebmoministtar Nils Kristen Sandtrøen.
Ulbmil bálkkašumiin jagáš nuorra boazodoallái lea loktet ja addit boazodoallái fuomášumi go lea iežas ealáhusdoaimmaid ja árjabidjama mielde nannen ja lokten boazodoalu positiivvalaččat.
Eanandoallo- ja biebmodepartemeantta, Norgga Boazosápmelaččaid Riikkasearvi (NBR) ja Bohccobierggu márkanlávdegoddi geigejit bálkkašumi. NBR nuoraidlávdegoddi dat lea ovddidan evttohasaid dan jagáš bálkkašupmái.
Vuoitun lea skeaŋkka ja 15 000 ruvdnosaš mátkkoštanstipeanda. Stipeandda galgá geavahit eará boazodoalloguovlluid, bohccobiergofitnodagaid dahje eará áigeguovdilis aktevrraid galledeapmái.
Jury ákkastallan
Boazodoalus leat máŋga čeahpes ja áŋgiris boazodoallit geat leat positiivvalaš vuogi mielde oidnosis. Sii válljejit nannet ja loktet boazodoalu iešguđet ládje. Muhtumat čájehit beroštumi politihkkii, ja earát ges geavahit sosiála mediaid arenan. Earáide lea boazu ja meahcci eallinláhkin.
Dan jagáš boazodoalli – Båatsoesaemi – lea čájehan erenoamáš áŋgiruššama, gealbbu ja beroštumi bohccuide ja boazodollui lullisámi guovllus. Son lea siivui, mášolaš ja barggán, ja sus lea lunddolaš čehppodat bohccuiguin, luonddus ja eatnamiin, olbmuiguin ja eará elliiguin. Mads nákce buot beliid boazodoalus ja dan eallinlági mii dan čuovvu.
Trollheimen sijtes lea boazodoallu sierra rámmaeavttuid vuolde. Suddjenmearrádusat Trollheimena eanansuodjalanguovllus mielddisbuktá ráddjejumiid mat dagahit ahte orohagas eai álo leat seamma vejolašvuođat go eará boazodoalloguovlluin leat. Guovllus lea stuorra mearkkašupmi lullisámegillii, kultuvrii ja árbedihtui, ja boazodoallu lea dehálaš kulturguoddi guovllus. Mads duste hástalusaid positiivvalaččat, kreatiivvalaččat ja dakkár vugiin ahte gávdná čovdosiid áššiide. Son oaidná vejolašvuođaid áššiide maiddá earát oidnet gáržžidusaid, ja son ii bala geahččalit ođđa vugiid dahje sierra bálgáid guorrat go dat sáhttá veahkehit boazoealáhusa šaddat buorebut ja ceavzileabbo.
Mads láve galledit bearraša, soga ja ránnjáorohagaid, ja son iluin juogada iežas bargonávccaid, vásáhusmáhtu ja árbedieđu earáiguin. Mads doarju go earát dárbbašit veahki, son lea veahkkin nanneme sosiála gaskavuođaid ja boazodolliid ovttasbarggu orohatrájiid gaskkas. Su árvvasvuohta ja veahkkáivuohta dahká ahte son lea árvvus adnojuvvon olmmoš boazodoallobirrasis.
Mads Renander ovddasta lullisámi boazodoalu boahtteáiggi. Son oaidná vejolašvuođaid gos earát oidnet hástalusaid. Mads lea movttiidahtti ja mávssolaš kandidáhtta Dan jagáš boazodoalli – Båatsoesaemie-bálkkašupmái.
