Widar Skogan šaddá Eanandoallodirektoráhta boazodoaluossodaga ođđa direktevra

Skogan dovdá bures eanandoalu, go son lea earret eará boanda ja lea leamaš stáhtačállin Eanandoallu ja biebmodepartemeanttas ráđđehusmolsuma rádjái diimmá čavčča.

– Mii leat ilus go Widar lea váldán vuostá  virggi. Mii oažžut buori jođiheaddji geas lea vásáhus movt hábmet eanandoallopolitihkka ja son lea guhka bargan eará máŋggabealálaš politihkalaš bargguid. Dat lea earenoamáš ávkkálaš midjiide min ráđđeaddidoaimmaide eanadoallo- ja biebmodepartemeantta hárrái. Skoganis lea iešguđetlágán rollain maid leamaš lagaš oktavuohta boazodoaluin ja dovdá dan ealáhusa bures, dadjá adm. Direktevra Jørn Rolfsen Eanandoallodirektoráhtas.

Skoganis lea oahpaheaddji oahppu ja vel mediaoahppu ja biologiija. Son lea leamaš earret eará oahpaheaddji, rektor, fylkkaráđđi Tromssas ja sus lea olu politihkalaš vásáhus suohkan ja fylkkadikkis. 

Son lea boanda ja sus lea badjel 20 jagi vásáhus sávzadoalus ja mielkebuvttadeamis. 

Ođđa direktevrras,Widar Skoganis, šaddá bajimus ovddasvástádus hálddašit ja ovddidit daid guovddáš boazodoallopolitihkalaš gaskaomiid , ja maid Boazodoallostivrra, Boazodoallu ovddidanfoandda ja mearkaáššiid váiddalávdegotti čállingoddedoaimmaid. 

Skogan boahtá Liv Berit Hætta sádjái go son manná eará virgái Eanandoallodirektoráhtas.