Gjødselsamvirke skal utvikle verdikjede for sirkulære gjødsel- og jordprodukt med utgangspunkt i om lag 4 000 tonn avvatna biorest årleg frå BIR sitt biogassanlegg på Voss og 5000 tonn hageavfall til kompostering. Prosjektet skal omforme råvarer med låg eller negativ verdi til dokumenterte produkt for landbruk, jordforbetring, dyrkingsmedium og anleggsjord. FoU-arbeidet koplar råvarekvalitet, prosessering, plantetilgjengelegheit, jordeffekt, marknadskrav, regelverk og forretningsmodell, slik at produkta får føreseieleg kvalitet og verdi.
Prosjektet svarar på utfordringar knytt til fosforoverskot, strengare gjødselregelverk, avsetning av organisk avfall og usikker tilgang på mineralgjødsel. Gjennom GjødselLab, agronomisk testing og marknadsdialog skal prosjektet utvikle produktløp som kan redusere behovet for mineralgjødsel, styrkje jordhelse og gi betre ressursutnytting. Risikoen er redusert fordi kundar og avsetningsløp er identifisert. Lokale bønder tek i dag imot flytande biorest og har vist interesse for fast biorest dersom kvalitet og regelverk er dokumentert. Anleggsgartnarar vil kjøpe jordforbetrings- og anleggsjordprodukt, og ein kompostprodusent er aktuell for mottak og distribusjon av overskotsmengder.
Prosjektet gir BIR avsetning og lågare risiko, HSK grunnlag for nye produkt og investeringar, og Voss Virka styrkt rolle som regional hub for sirkulær bioøkonomi. Samla skal prosjektet utvikle ein modell med overføringsverdi til andre biogassanlegg og regionar.
