I 2021 var det rapporterte norske utsleppet av ammoniakk 30 800 tonn NH3, der 95% var utslepp frå jordbrukssektoren og der husdyrgjødsel frå storfe og gris var store kjelder. Norge forplikta seg gjennom Gøteborgprotokollen til å redusere ammoniakkutsleppa til 23 000 tonn per år innan 2010. Nitrogen fordampa som ammoniakk kan ved nedfall bli omdanna til lystgass (N2O). Lystgass er ein drivhusgass og utsleppa inngår i jordbruket sitt utslepp av klimagassar. Tap av ammoniakk frå husdyrgjødsel fører dessutan til dårlegare utnytting av nitrogen og større behov for tilføring av nitrogen frå handelsgjødsel.
Utsleppsfaktorane vi bruker i den norske utsleppsrekneskapen er utvikla på bakgrunn av europeiske forsøk og målingar, med ei viss tilpassing til norske forhold. Klima, husdyrrom, gjødsellager og driftsforhold er annleis i Norge, og vi treng derfor nasjonale utsleppsfaktorar for å estimere utslepp og for å sette inn treffsikre utsleppsreduserande tiltak. SSB sine gjødselundersøkingar inngår som aktivitetsdata i modellane som estimerer utsleppa av ammoniakk og klimagassar. Når det gjeld husdyrrom blir utsleppsfaktoren for ammoniakk halvert dersom det er spaltegolv i staden for fast dekke. Bruk av strø er og tatt med, men utover dette er det lite differensiering. Prosjektet vil gjennom gardsbesøk i svine- og storfefjøs kartlegge forhold som ventilasjon, temperatur, luftfuktigheit, opphaldstid for gjødsel i husdyrrom, plassering av gjødsel på golv der det både er fast dekke og spaltegolv og type strø. Vi vil måle ammoniakk i husdyrrom for storfe og gris. Aktuelle tiltak for reduksjon av ammoniakktap vil bli vurdert utifrå resultata vi får i prosjektet.
Formidling til næring, rådgjevingsteneste, SSB og Miljødirektoratet.
