Kva kan dekkjast og ikkje dekkjast med skogfond

Tynning

Midlar frå fondet kan brukast til

• dekking av underskot, viss tynningsarbeidet går med underskot

Skogeigar må kunne dokumentere at kostnadane ved tynning er større enn inntektene. Viss skogeigar har fått tilskot, skal dette reknast som inntekt og avsetjing til skogfond kan ikkje reknast som kostnad.

Kostnadar til førehandsrydding og stubbebehandling blir ikkje rekna som tynningskostnad, men kan dekkjast av skogfond med skattefordel som eigne tiltak.

Inngjerding

Midlar frå fondet kan brukast til

• Inngjerding av spesielt verdifulle skogkulturfelt for å unngå skadar frå beitedyr på felta.

Midlar frå fondet kan ikkje brukast til

• inngjerding med hensikt å halde husdyr inne

Administrasjon og planlegging av skogkultur

Midlar frå fondet kan brukast til

• Administrasjon og planlegging av skogkulturarbeid, anten det er skogeigaren sjølv eller andre som står for dette.

Når arbeidet utførast av skogeigarandelslag, entreprenør eller tilsvarande, er det som regel desse som også står for administrasjon og planlegging av tiltaka.

Kostnadane med dette vil då normalt inngå i og komma fram som ein del av einings- og totalkostnaden på fakturaen til skogeigar. I slike tilfelle vil som regel ikkje skogeigaren sjølv ha kostnadar med administrasjon og planlegging som kan framførast og dekkjast med skogfond.

Når arbeidet blir utført av skogeigaren sjølv eller med eigne tilsette, kan skogeigaren sin eigen administrasjon og planlegging reknast inn som ein del av kostnaden med tiltaket og dekkjast med skogfond.

Når arbeidet blir utført av skogeigarandelslag, entreprenør eller tilsvarande, og det er gjort avtale om at skogeigar skal utføre delar av administrasjonen og planlegginga som er knytte til tiltaket, kan skogeigar sitt arbeid og kostnadar med dette inngå og dekkjast med skogfond. Det må kunne dokumenterast kva skogeigaren sitt arbeid og tilknytte kostnadar omfattar i slike tilfelle. Normalt vil det kome fram av skogeigar si bestilling/ avtale med den som har utført oppdraget.

Generelt gjeld det at kostnadane med administrasjon og planlegging av skogkulturtiltak skal stå i eit rimeleg forhold til arbeidskostnadane med sjølve tiltaket.

Midlar fra fondet kan ikkje brukast til

• Skogeigar sitt eige arbeid med å bestille og/eller innhente pris/tilbod på skogkulturtiltak frå skogeigarandelslag, entreprenør eller tilsvarande.
• Ordinær skogforvaltning som aktivitetsplanlegging, kontroll av skogtilstanden og etterkontroll av utførte aktivitetar.

Plantebor, ryddesag, motorsag og liknande

Midlar frå fondet kan ikkje brukast til

• kjøp av teknisk utstyr
• Når utstyret blir brukt til føremål som kan dekkjast med skogfond, eksempelvis ungskogpleie, kan kommunen likevel godkjenne eit visst påslag for utstyrskostnadar i timepris eller kostnad per dekar.

Førebyggje skader på skog

Midlar frå fondet kan brukast til

• kostnadar med omsyn til å førebyggje og redusere risiko for skogskadar

Bruk av skogfond til slike tiltak vil som oftast ikkje vere aktuelt, anna enn ved skadar av eit visst omfang og når slike tiltak blir oppfordra til og tilrådde av styresmaktene.

Aktuelle skadeførebyggjande tiltak for å avgrense og om mogleg hindre vesentlege skadar på skog kan vere stubbebehandling mot skogsråte og andre soppskadar, tiltak mot borkbiller og andre skadeinsekt og tiltak mot andre skadegjerarar.

Fagleg beredskapsplan for stor granborkbille beskriv aktuelle skadeførebyggjande tiltak mot billeåtak. Eit viktig, førebyggjande tiltak er å ta ut skog som er skadd av til dømes vindfelling, snøbrekk, tørke osv. – før den skadde skogen blir yngleplass for borkbillene.

Ved opprydding og uttak av skadd skog som gir inntekt i form av ein virkesverdi, vurderer vi at berre underskotet bør kunne dekkjast med skogfond (i likskap med tynning). Å dekkje heile driftskostnaden kan potensielt føre til økonomisk uforsvarlege investeringar, jf. skogfondforskrifta §§ 4 og 1.

Ved bruk av kjemiske middel, skal desse vere godkjende av Mattilsynet.  

Opprydding i vindfelt skog

Midlar frå fondet kan brukast til

• opprydding i vindfelt i skog når dette inngår som eit naudsynt og tilrådd tiltak for å førebyggje skadar på skog, jf. føregåande.

Som regel vil dette først bli aktuelt ved vindfellingar av eit visst omfang i ein kommune eller region.

Ved opprydding og uttak av vindfelt skog som gir inntekt i form av ein virkesverdi, vurderer vi at berre underskotet bør kunne dekkjast med skogfond (som for tynning). Å dekkje heile driftskostnaden kan potensielt føre til økonomisk uforsvarlege investeringar, jamfør forskrift om skogfond o.a. §§ 4 og 1.

Flaterydding 

Midlar frå fondet kan brukast til

• flaterydding som er naudsynt for å få opp tilfredsstillande forynging etter hogst

Ryddinga må vere utført på ein fagleg forsvarleg måte, som mellom anna inneber å bevare livsløpstre, kantsoner og sumpskog, i bartreforynging også slik at minst 10 prosent lauvinnblanding kan sikrast i det nye bestandet.

Førehandsrydding før hogst har som oftast sin hovudmotivasjon i å forenkle drifta og å senke driftsprisen. Det er ein kostnad som ikkje kan dekkast med skogfond. Dersom flaterydding er naudsynt for å sikre tilfredsstillande forynging etter hogst, og arbeidet blir utført som ein del av førehandsryddinga før hogst, kan den delen av kostnaden som er knytt til flaterydding dekkjast med skogfond.

Planlegging og byggeleiing av skogsveganlegg

Midlar frå fondet kan brukast til

• Planlegging og byggeleiing av skogsveganlegg

Planlegging av eit skogsveganlegg startar ved utarbeiding av byggeplan for vegen. Alt forberedande arbeid før den tid er ein del av skogeigaren si ordinære drift og forvalting av eigedomen og kan ikkje dekkjast med skogfond.

Planlegging (byggeplan) og byggeleiing blir ofte sett bort til vegplanleggjarar eller andre med tilsvarande kompetanse. I slike tilfelle vil ikkje skogeigaren sjølv ha kostnadar med dette som kan framførast og dekkjast med skogfond.

Når skogeigaren sjølv står for planlegging og/eller byggeleiing, kan det skje til einingskostnadar (kr/time) som elles er vanleg for eige arbeid ved refusjon frå skogfond. I slike tilfelle må skogeigaren kunne dokumentere omfanget av arbeid og kostnadar.

Når innhaldet og omfanget av arbeidet er avtalt med bakgrunn i byggeplan eller tilsvarande, vil behovet for byggeleiing og oppfølging under anleggsfasen vanlegvis vere avgrensa.

Generelt gjeld det at kostnadane med planlegging og byggeleiing skal stå i eit rimeleg forhold til kostnadane med bygging av skogsvegen.

Midlar frå fondet kan ikkje brukast til

• Dei delane av arbeidet før, under og etter anlegg som er ein del av skogeigaren si ordinære drift og forvalting av eigedomen, til dømes søknadar og synfaringar i forkant, møter i vegforening, innhenting av tilbod/ anbod, rekneskap, rekneskapssamandrag og etterkontroll.

Nybygging og ombygging 

Midlar frå fondet kan brukast til

• nybygging og ombygging av skogsbil- og traktorvegar, inkludert velteplassar, som inngår i det permanente vegnettet og som er godkjende etter forskrift om planlegging og godkjenning av landbruksveier (landbruksvegforskrifta)

Midlar frå fondet kan ikkje brukast til

• enkle, midlertidige driftsvegar, anten dei krev godkjenning etter landbruksvegforskrifta eller ikkje 

Rydding/hogst av veglinje

Midlar fra fondet kan brukast til

• å dekkje underskot ved rydding/hogst av veglinje.

Underskot ved rydding/hogst av veglinje vil seie at kostnadane med tiltaket er høgare enn verdien av salbart virke frå ryddinga/hogsten.

Kjøp av andel i eksisterande veg

Midlar frå fondet kan brukast til

• kjøp av andel i eksisterande veg, når skogeigar har skog innanfor vegen sitt dekningsområde og kjøper seg inn som medeigar med fullverdig interesse.

Vedlikehald av skogsbilvegar og traktorvegar

Midlar frå fondet kan brukast til

• reparasjon av traktorveg som gir standardheving, der vegen blir klassifisert i ei betre vegklasse enn tidlegare

Opprustinga må vere godkjent av kommunen etter landbruksvegforskrifta.

Midlar frå fondet kan ikkje brukast til

• vedlikehald av traktorvegar, verken med eller utan skattefordel, da dette er å rekne som ein driftskostnad

Sumarvedlikehald

Midlar frå fondet kan brukast til

• årleg, løpande vedlikehald i form av høvling, skraping, slådding, salting og krattfjerning

Sumarvedlikehaldet kan dekkjast med inntil 4 kr/løpemeter veg per år med bruk av skogfond. Når vedlikehaldet ikkje blir utført årleg, eller ved større vedlikehaldsprosjekt som grusing, grøftereinsk, grøfteutviding og utskifting av stikkrenner, kan høgare kostnadar enn 4 kr/løpemeter dekkjast med skogfond, men det føreset førehandsgodkjenning frå kommunen. I tilfelle der vegen er skadd av ei plutseleg hending som flaum eller ras, kan høgare kostnad enn 4 kr/løpemeter dekkjast av skogfond utan førehandsgodkjenning. 

Pukking og knusing av stein og fjell

Midlar frå fondet kan brukast til

• produksjonskostnadar for knusing, når massane blir transporterte ut og tatte i bruk til godkjend vegbygging eller vegvedlikehald

Midlar frå fondet kan ikkje brukast til

• produksjonskostnadar for knusing når massane blir lagra for seinare bruk

Vegbom

Midlar frå fondet kan brukast til vegbom dersom bommen er eit sikringstiltak. Midlar kan ikkje brukast til bom med andre føremål. Den same differensieringa gjeld nøklar og låsesystem.

Vintervedlikehald

Midlar frå fondet kan brukast til

• tiltak om våren med klart føremål å hindre flaumskadar på vegen

Midlar frå fondet kan ikkje brukast til

• snøbrøyting, skraping og strøing på vinterstid, da dette er rekna som driftskostnadar

Reparasjon av skadar på veg

Midlar frå fondet kan ikkje brukast til

• utgifter til reparasjon av skadar på vegen som skuldast skogsdrift, da dette er rekna som driftskostnadar

Vegavgifter til vegforening 

Midlar frå fondet kan brukast til

• den delen av vegavgifta som går til sumarvedlikehald, når skogeigar sjølv er medeigar i vegen

Det er ein føresetnad at kommunen har innsyn i vegforeninga sitt budsjett og rekneskap, og kan kontrollere fordelinga mellom kostnadar til sumarvedlikehald og andre kostnadar.

Midlar frå fondet kan ikkje brukast til

• vegavgift for skogeigarar som ikkje sjølv er medeigar i vegen. Dette er å rekne som driftskostnadar.

Flaum, ras og andre uventa hendingar

Midlar frå fondet kan brukast til:

• reparasjon av skadar på skogsvegar som følgje av flaum, ras og andre uventa hendingar.

Dette gjeld også for reparasjon av skadar på skogsbilvegar som kan reknast som vegvedlikehald.

Reparasjonar som har karakter av gjenoppbygging/ opprusting, skal utførast slik at det som blir reparert (vegstrekning, bru, stikkrenne osv.) tilfredsstiller vegnormalen for den aktuelle vegklassa.

Midlar frå fondet kan ikkje brukast til:

• reparasjon av skader på traktorvegar som kan reknast som vedlikehald. Det er ikkje høve til å bruke skogfondsmidlar til vedlikehald av traktorvegar.

Eigenandelar ved erstatningsoppgjer etter naturskade

Naturskade på skogsvegar etter flaum, ras osv., kan få naturskadeerstatning etter nærmare reglar.

Dersom skogeigaren sin kostnad med istandsetjing av ein skogsveg i slike tilfelle er høgare enn erstatninga, kan skogeigar etter godkjenning frå kommunen få dekt eigenandelen sin (totalkostnad trekt frå erstatningsbeløpet) med skogfond. Dette gjeld ikkje for vedlikehaldsutgifter på traktorvegar. Dersom skogeigar sin kostnad med istandsetjing av ein skogsveg i slike tilfelle er høgare enn erstatninga, kan skogeigar etter godkjenning frå kommunen få dekt sin eigenandel (totalkostnad trekt frå erstatningsbeløpet) med skogfond. Dette gjeld ikkje for vedlikehaldsutgifter på traktorvegar.

Mellomfinansiering i påvente av utbetaling frå statens naturskadeordning 

Midlar frå fondet kan ikkje brukast til

• mellomfinansiering i påvente av utbetaling fra statens naturskadeordning

Ved likviditetsproblem kan skogeigar søkje om forskot på erstatningsbeløpet frå statens naturskadeordning. Det er ein føresetnad at det ligg føre eit vedtak i erstatningssaka, før eit forskot kan betalast ut. 

Byggjeplan

Midlar frå fondet kan brukast til

• utgifter til byggjeplan for skogsveg

Det er ein føresetnad at byggjeplanen er utarbeidd i tråd med gjeldande krav.

Programvare for skogbruksplan

Midlar frå fondet kan brukast til

• kjøp av programvare for oppdatering av skogbruksplanar og naudsynt oppgradering av programvara.

Midlar frå fondet kan ikkje brukast til

• avgifter for brukarstøtte

Digital skogbruksplan

Midlar frå fondet kan brukast til

• eingongsavgift for tilgang til digitale program og årlege avgifter i samanheng med oppdatering av data 

Oppdatering og revisjon av skogbruksplanar 

Midlar frå fondet kan brukast til

• fakturerte kostnadar til oppdatering av eksisterande skogbruksplanar

Det er ein føresetnad at arbeidet er gjennomført på ein fagleg god måte, og at arbeidet er dokumentert slik at det kan leggjast fram for kontroll. 

Eige arbeid med oppdatering av skogbruksplanen 

Midlar frå fondet kan ikkje brukast til

• eige arbeid ved oppdatering av skogbruksplan

Dette gjeld arbeid med kartlegging i felt og tilhøyrande kontorarbeid, som er å rekne som driftskostnader, på linje med til dømes aktivitetsplanlegging, kontroll av skogtilstanden og etterkontroll av utførte aktivitetar.

Oppdatering og revisjon av miljøregistreringar 

Midlar frå fondet kan brukast til

• fakturerte kostnadar til oppdatering og revisjon av miljøregistreringar

Det er ein føresetnad at arbeidet er gjennomført på ein fagleg god måte av personar med naudsynt kompetanse, og at arbeidet er dokumentert slik at det kan leggjast fram for kontroll. Endringar i miljøregistreringar i revisjonen skal rapporterast inn til Skogportalen (NIBIO). 

Avsetting og kartfesting av ‘Biologisk viktige område’ (BVO)

Midlar frå fondet kan brukast til

• Avsetting og kartfesting av ‘Biologisk viktige område’ (BVO) når dette inngår som ein del av skogbruksplanlegginga (BVO jf. PEFC kravpunkt 23).

Registrering av miljøverdiar ved bruk av føre-var-rutine

Midlar frå fondet kan brukast til

• utgifter knytte til eigedomar som må nytte føre-var-rutine før gjennomføring av hogst, viss eigedomen er i arealkategorien som fell utanfor krav til MiS-registreringar, jf. kravpunkt 22 om nøkkelbiotopar, i Norsk PEFC-Skogstandard 

Midlar frå fondet kan ikkje brukast til

• utgifter knytte til eigedomar som må nytte føre-var-rutine før gjennomføring av hogst, viss det allereie har vore tilbod om MiS-registreringar i området. Slike registreringar vil bli behandla som ordinære driftsutgifter

Registrering av tiurleikar før hogst

Midlar frå fondet kan brukast til

• kostnadar til registrering av tiurleik før hogst, når
  • kommunen på førehand har bekrefta at det ikkje finst eksisterande registreringar av tilstrekkeleg god kvalitet.
  • registreringane skjer som tiurleikområde, slik dette er beskrive i kravpunkt 25 i Norsk PEFC Skogstandard. 
  • ein gjer registreringar på heile eigedomen.
  • resultatet av registreringane leverast til kommunen for oppdatering av eksisterande viltkart

Handhalde datautstyr for registrering av skogbruksplandata i felt

Midlar frå fondet kan ikkje brukast til

• kjøp av teknisk utstyr

Digitale skogbruksplankart til bruk i GPS

Midlar frå fondet kan brukast til

• digitale skogbruksplankart til bruk i GPS

Kommunen vil vurdere i det einskilde tilfelle kva beløp som dekkjast med skogfond, ut frå ei vurdering av kva som er fagleg og økonomisk forsvarleg. Viss det digitale skogbruksplankartet involverer fleire skogeigarar er det føresett at eventuelle naudsynte avtalar om rettar til bruk av skogbruksplandata er inngåtte.

Landskapsplan

Midlar frå fondet kan brukast til

• utarbeiding av landskapsplan som skal synleggjere, avvege og vareta omsyn til biologisk mangfald, kulturminne, landskapsbilete og friluftsliv etter kravpunkt 4 i Norsk PEFC Skogstandard

Avverkingsanalysar

Midlar frå fondet kan brukast til

• utarbeiding av avverkingsanalysar som bereknar forventa eller potensielt avverkingskvantum under ulike føresetnader

Det er føresett at arbeidet er gjennomført på ein fagleg god måte, at planen tar omsyn til lokale driftsforhold og miljøverdiar, og at arbeidet er dokumentert slik at det kan leggjast fram for

Produksjon av juletre 

Midlar fra fondet kan brukast til

• etablering av felt for juletre- og pyntegrøntproduksjon, i etableringsfasen

Etableringsfasen er kalenderåret då plantinga skjer, pluss det påfølgjande kalenderåret. Kostnadar som er knytte til etablering av eit nytt juletrefelt, og kostnadar i forbindelse med reetablering for eit nytt omløp med juletre vurderast likt.

Midlar frå fondet kan ikkje brukast til

• kvalitets- og produksjonsfremjande tiltak

Førebuingskostnadar før planting

Midlar frå fondet kan brukast til

• førebuingskostnadar før planting som er naudsynte for å sikre god etablering

Dette gjeld til dømes ugrasnedkjemping og jordarbeiding.

Midlar frå fondet kan ikkje brukast til

• meir omfattande tiltak som utførast for å leggje til rette for rasjonell drift i produksjonsfasen

Dette gjeld til dømes fjerning av stubbar.

Drenering av juletrefelt

Midlar frå fondet kan brukast til

• drenering, når dette skjer i forbindelse med etablering

Opparbeiding av vegar i juletrefelt

Produksjon på juletrefelt er å rekne som skogproduksjon, og bruk av skogfond følger difor dei generelle retningslinene for bygging og vedlikehald av skogsvegar.

Inngjerding mot vilt

Midlar frå fondet kan brukast til

• inngjerding som har som føremål å stenge viltet ute frå feltet, inkludert elektronisk viltavverjing der dette er mest føremålstenleg

Nedkjemping av ugras, sopp og lus

Midlar frå fondet kan brukast til

• ugrasnedkjemping som blir gjennomført i etableringsfasen
• nedkjemping av lus og sopp viss dette skjer i etableringsfasen

Gjødsling

Midlar frå fondet kan brukast til

• naudsynt gjødsling, viss dette skjer i etableringsfasen

Kvalitetsfremjande tiltak

Midlar frå fondet kan ikkje brukast til

• kvalitetsfremjande tiltak i produksjonsfasen, som forming og reduksjon av toppskot

Om bruttoverdi

Midlar som er avsette på skogfond skal vere baserte på bruttoverdien av virket. For juletre vil det seie verdien ved sal til grossist, men utan eventuelle kostnadar til transport, emballasje eller liknande. 

Kursutgifter

Midlar frå fondet kan brukast til

• kostnadar til kursavgift og kursmateriell ved kurs som er knytte til drift av skogen.
• autorisasjonskurs i sprøyting, til dømes kurs med Aktivt Skogbruk

Midlar frå fondet kan ikkje brukast til

• ordinære sprøytekurs der hensikta er å bli autorisert med sprøytesertifikat for jordbruksføremål
•  «timar» (løn) for tid ein sjølv har brukt på kurs

Kurs for mellombels tilsette 

Midlar frå fondet kan brukast til

• dokumenterte utgifter til kurs for mellombels tilsette kan dekkjast med skogfond

Det er ein føresetnad at kostnaden står i rimeleg forhold til kostnaden for skogsarbeidet som blir utført av den aktuelle arbeidstakaren.

Serviceavgifta frå skogeigarandelslaga 

Midlar frå fondet kan ikkje brukast til

• serviceavgifta frå skogeigarandelslaga

Jordskifte og oppmerking av eigedomsgrenser

Midlar frå fondet kan brukast til

• oppmerking av eigedomsgrenser og naudsynte handlangarutgifter ved jordskifte i skog.

Denne kostnaden inngår ofte som ein andel av gebyret frå jordskifteretten. Andre utgifter ved jordskifte kan ikkje dekkjast med skogfond.

Midlar frå fondet kan ikkje brukast til

• oppmerking av eigedomsgrenser og naudsynte handlangarutgifter når dette ikkje skjer ved jordskifte i skog.

Forsikring mot stormskadar og skogbrann

Midlar frå fondet kan brukast til

• forsikringspremie mot stormskadar og skogbrann. Dette gjeld også for brannforsikring av juletrefelt.

Midlar frå fondet kan ikkje brukast til

• ansvarsforsikring for skogsbilveg

Investering i alternative transportmetodar

Midlar frå fondet kan brukast til

• enkle driftsvegar, traséar for vinterdrift, fløytingsinnretningar og andre avverkingsfremjande investeringar i område der det er restriksjonar på vegbygging

Tilrettelegging for allmenn ferdsel på eigedomen 

Midlar frå fondet kan brukast til

• ekstra kostnadar ved skogbrukstiltak som legg til rette for ferdsel og framkomme, eller for å unngå konflikt ved framtidig drift ved å leggje til rette for ferdsel

Midlar frå fondet kan ikkje brukast til

• generelle ferdselstiltak som ikkje har nokon samanheng med drift av skogen

Reparere skadar etter drift 

Midlar frå fondet kan ikkje brukast til

• utbetring av midlertidige driftsvegar, terrengskadar og hjulspor
• opprydding av kvist i stiar og løyper

Normale omsyn under skogdrift er pålagde etter skogbrukslova, og reknast som driftskostnadar.

Midlertidige bruer

Midlar frå fondet kan brukast til

• ekstra arbeidstimar til entreprenør for å leggje på plass og fjerne brua ute i terrenget, når heile brukonstruksjonen blir fjerna etter bruk, og bekkebotn og -bankar ikkje skadast av tiltaket

Kostnaden bør ikkje overstige 5 000 kroner per bru, og ein føreset at den faktiske kostnaden for etablering av brua kjem fram på faktura frå entreprenør.

Midlar frå fondet kan ikkje brukast til

• kostnadar til tømmer, lemmar, matter eller anna materiell som nyttast for å byggje den midlertidige brua

Midlertidige bruer er enklare konstruksjonar som blir etablerte i samanheng med skogsdrifter for å unngå skadar ved kryssing av bekkar eller små elver. Ei midlertidig bru skal etablerast slik at vatnet renn fritt under brua i bruksperioden, og ei slik bru nyttast der ordinær kavllegging ikkje varetar omsyn til miljøverdiar i vassdraget på ein tilstrekkeleg måte. Behovet for eit slikt tiltak vurderast ut frå førekomsten av miljøverdiar nedstraums i vassdraget og eventuell erosjonsfare. 

Tapte inntekter ved å setje att tre, kantsoner og biologisk verdifulle biotopar 

Midlar fra fondet kan ikkje brukast til

• erstatning for å la vere å hogge

Skogeigar må kunne vise til ein konkret kostnad eller investering for å få refundert skogfond. 

Skjøtsel av kantsoner, kulturminne og biologisk verdifulle biotopar 

Midlar frå fondet kan brukast til

• skjøtsel av kantsoner, kulturminne og biologisk verdifulle biotopar, der bevaring av kantsoner, kulturminne og biotopar fordrar spesiell skjøtsel

Kan skogfond dekkje kostnadar ved frivillig vern 

Midlar frå fondet kan ikkje brukast til

• kostnadar ved frivillig vern, da dette er ein del av ein forhandlingsprosess Slike kostnadar dekkjast eventuelt av erstatningsutmålinga for frivillig vern.

Utarbeiding av landskapsplan

Midlar frå fondet kan brukast til

• utarbeiding av landskapsplan med omsyn til å synleggjere, avvege og vareta omsyn til biologisk mangfald, kulturminne, landskapsbiletet og friluftsliv etter kravpunkta i Norsk PEFC Skogstandard.

Bioenergitiltak

Midlar frå fondet kan brukast til

• varige investeringar for produksjon av varme kan dekkjast, slik som fyrhus, fyrkjele, flisinnmating og bygg for tørking/lagring av flis

Midlar frå fondet kan ikkje brukast til

• driftskostnadar eller laust utstyr til hogst, transport og flishogging
• kostnadar til leidningsnett eller installasjonar hos varmekjøpar

Bioenergianlegg  

Midlar frå fondet kan brukast til

• nye investeringar og etablering av ny varmeproduksjon
• utviding av varmeproduksjonen i eit eksisterande anlegg

Midlar frå fondet kan ikkje brukast til

• overtaking av eksisterande anlegg

Investeringar for produksjon av ved, pellets eller anna brensel 

Midlar frå fondet kan ikkje brukast til:

• investeringar for produksjon av ved, flis og pellets for levering, da dette ikkje reknast som produksjon av ferdig varme

Prosjekt der ein produserer varme i eit felles eigd anlegg 

Midlar frå fondet kan ikkje brukast til

• kjøp av aksjar og andelar i eit varmeanlegg
• investering i teknisk utstyr i eit felles varmeanlegg som er eigd av fleire

Varmeanlegg med fleire eigarar fell utanfor skogfondsordninga, uavhengig av korleis eigarskapen er organisert. Viss skogeigaren har eigarskapen til heile varmeanlegget, kan skogfond brukast til dei varige tekniske investeringane.

Om generelle føresetnader

Råstoff til varmeproduksjon

Varmeproduksjonen skal vere basert på råstoff frå eigen skog eller lokale skogressursar. Det kan nyttast andre energikjelder som tilleggsfyring, til dømes straum, olje, innkjøpt pellets og råstoff frå jordbruket, men berre som supplement i visse periodar. 

Lokalisering av bioenergianlegg  

Det er ikkje noko krav om at bioenergianlegget skal vere lokalisert på eigen eigedom. Anlegget må likevel vere plassert i nærområdet til eigedomen og optimalt i forhold til varmekjøparen. Det er kommunen som avgjer kva som naturleg høyrer til eigedommen sitt nærområde. Det kan variere med lokale forhold og type prosjekt. Beveger ein seg over kommunegrensa, vil ein som oftast vere utanfor nærområdet. 

75 prosent av varmeproduksjonen må vere eigna for levering til andre

For å kunne nytte skogfond er det ein føresetnad at prosjektet kan vise til realistiske planar om at 75 - 100 prosent av ferdig produsert varme skal seljast til andre. Grensa på 75 prosent er sett for at prosjekt skal kunne realiserast med skogfond, sjølv om noko av varmen går til eige bruk. Viss mei enn 25 prosent går til eige bruk, kan ingen av investeringane dekkjast av skogfond.

Varme som blir levert til bustadar som nyttast av skogeigar eller skogeigaren sin husstand til buføremål eller som kårhus, eller varme som blir levert til driftsbygningar som inngår i eigedomen sin ordinære landbruksproduksjon, reknast som varme til eigen bruk. Varme levert til bustadar og driftsbygningar som ein leiger ut til andre i eit ordinært leigeforhold reknast som varmelevering til andre. Levering av varme til verksemder organiserte som AS, ANS eller DA, som skogeigar har eigarandelar i, kan reknast som levering til andre når verksemda ikkje inngår i den ordinære landbruksproduksjonen på eigedomen.

Med ordinær landbruksproduksjon meinast her husdyrproduksjon og planteproduksjon med tilhøyrande lagerrom, som normalt ikkje skiljast ut frå verksemda på eigedomen som eigne AS. Eksempel på verksemd som kan dekkjast med skogfond, når verksemda er organisert som AS, ANS eller DA, er drift av verkstadar, turistbedrifter, småindustri, omsorgstilbod og liknande. 

Kommunen skal førehandsgodkjenne bioenergitiltak

Kommunen skal førehandsgodkjenne bioenergitiltak som skal dekkjast med skogfondsmidlar.

Skogfondet skal primært sikre eit berekraftig skogbruk der skogen blir forynga og skjøtta etter hogst. Ei bioenergiinvestering kan vere omfattande i forhold til skogen sin storleik og skogfondsreserve. Om det er klare behov for foryngingstiltak eller ungskogpleie, kan kommunen avgrense utbetalingar frå skogfondet til andre føremål og setje vilkår om at naudsynte skogkulturinvesteringar blir gjennomførte, før investeringar i bioenergitiltak med skogfond blir godkjente. 

Udekt investering

Midlar frå fondet kan brukast til

• udekte investeringar eller tiltak

Ei udekt investering er ei investering (tiltak) som er registrert på skogfondskontoen, men som av ulike årsaker ikkje blei dekt med skogfond da investeringa blei registrert på skogfondskontoen. 

Hovudregelen etter forskrift om skogfond o.a. § 12 er at ei udekt investering kan dekkjast med skogfond innan utgangen av kalenderåret etter at investeringa er registrert på skogfondskontoen.

Større udekte investeringar

For ‘større investeringar’ kan tidsfristen utvidast med 4 år ut over hovudregelen.

Investeringar i nyanlegg og ombygging av skogsvegar (skogfondforskrifta § 11.2), skogbruksplanar (§ 11.5) og bioenergitiltak (§ 11.6) reknast som ‘større investeringar’ og slike får utan vidare utvida frist for å dekkje investeringa med skogfond.

For andre ‘større investeringar’ som kan dekkjast med skogfond (til dømes større investeringar i skogkultur), kan kommunen etter søknad gi tilsegn om utviding av tidsfristen med 4 år. Slik søknad må vere framsett innan utgangen av kalenderåret etter at investeringa er registrert på skogfondskontoen.