Norske jordleigeprisar aukar

Jordleigeprisane i Noreg aukar. Det er hovudtrenden i Landbruksdirektoratet si årlege undersøking. Gjennomsnittsprisen for leige av jord til potet- og grønsaksdyrking har auka betydeleg samanlikna med fjoråret. For beite har prisen i snitt auka med nokre kronar per dekar. Unntaka er for leige av jord til gras- og korndyrking, der prisen har falle noko. 

Her kan du lese meir om jordleigeundersøkinga 2025. 

Auka prisar 

Gjennomsnittsprisen for leige av jord til grønsaks- og bærdyrking har auka med nesten sju prosent det siste året. Gjennomsnittsprisen for leigejord til potetdyrking har auka med nesten seks prosent. Samstundes har prisen for leigejord til grasdyrking falle med ein prosent, mens prisen for leigejord til korndyrking er ein halv prosent lågare enn fjoråret. Gjennomsnittsprisen for å leige jord til innmarksbeite har auka med ein prosent. 

Det er store variasjonar i talmaterialet. Medan prisen har gått ned i nokre kommunar, har han auka i andre. 

- Høge jordleigeprisar er eit uttrykk for at det er stor interesse for å drive jordbruk fleire stader i landet. Samtidig er det fleire kommunar der interessa er lita, og utleigarane er nøgde med å leige ut gratis for å oppfylle driveplikta, seier rådgjevar Mikael Meland Leksen i Landbruksdirektoratet. 

Nær halvparten er leigejord 

48 prosent av alt areal i drift var leigejord i 2023, ifølgje tal frå SSB. Talet har auka betrakteleg dei siste 50 åra. 

Delen jordleige er størst i Troms og Finnmark, Agder, Vestfold og Telemark. Minst del jordleige er det i Rogaland, med 38 prosent. Rogaland er også regionen der jordleigeprisane er høgast i gjennomsnitt for alle formål. 

Stadig betre svarprosent 

Kjelda til gjennomsnittsprisane i undersøkinga er anslag frå landbrukskontora i kommunane. Landbruksdirektoratet har dei siste åra lagt mykje arbeid i å kontrollere dei innsendte tala og få inn svar frå flest mogleg kommunar. Dette bidreg til meir truverdige resultat. I år har svarprosenten auka frå 89 til 90 prosent. 

Likevel bør ein være varsam med å tolke årlege endringar i jordleigeprisane som reelle endringar i betalingsvilje for jord. Resultata er alltid påverka av kvaliteten på datamaterialet. Dette gjeld i størst grad for grønsaks- og potetjord. 

- Leigeprisane varierer kraftig både mellom kommunar og innanfor dei. Dessutan seier veldig mange av dei vi snakkar med i kommunane, at dei har lite oversikt over kontraktsprisar. Framleis er det for få bønder som sender kopi av jordleigeavtaler til kommunen, seier Leksen.