I år var det andre året eigar av landbrukseigedom med grunnkvote kunne selje 100 % av kvota si privat. Det var også mogleg å selje kvote til staten, dette var valfritt.
I 2024 er det kome inn mellom tre og fire gonger så mange søknadar som i fjor. Til samanlikning kom det inn 118 søknadar i 2022, som var eit normalår der ein måtte selje minst 40 % av kvotemengda til staten.
- Vi var førebudde på at det kom til å kome mange søknadar i år. Både endringar i skattereglar, og moglegheit til å selje 100 % privat i år har sannsynlegvis vore viktige drivarar til det høge søkartalet, seier seksjonssjef Maiken Wickstrøm i Seksjon pristilskot og produksjonsregulering.
Flest ynskjer å selje kumjølkkvote i Trøndelag
Tabellane viser kor mange søknadar om sal av ku- og geitemjølkkvote som er mottekne innanfor kvar produksjonsregion, og kor mykje dei søker om å selje privat og til staten (avrunda til nærmaste 1 000). Søknadar som vart sendt inn, men som seinare er trekte, er ikkje tekne med. Fristen for å søke om sal av grunnkvote for ku og geit var 1. august 2024.
Søknadar om sal av grunnkvote kumjølk 2024
| Produksjonsregionar ku | Søknadar om sal | Sal privat (liter) | Sal til staten (liter) |
| Agder | 37 | 2 769 000 | - |
| Møre og Romsdal | 82 | 7 309 000 | 44 000 |
| Nordland | 78 | 7 440 000 | - |
| Oslo og tidlegare Akershus fylke | 12 | 1 661 000 | - |
| Rogaland | 182 | 19 965 000 | - |
| Tidlegare Buskerud fylke | 18 | 1 241 000 | 80 000 |
| Finnmark fylke | 9 | 926 000 | - |
| Tidlegare Hedmark fylke | 81 | 7 802 000 | - |
| Tidlegare Oppland fylke | 145 | 11 460 000 | - |
| Telemark fylke | 11 | 756 000 | - |
| Troms fylke | 16 | 1 694 000 | - |
| Østfold og Vestfold Fylke | 23 | 2 670 000 | 75 000 |
| Trøndelag | 242 | 25 088 000 | - |
| Vestland | 113 | 7 932 000 | 29 000 |
| Totalt | 1 049 | 98 713 000 | 228 000 |
Søknadar om sal av grunnkvote geitemjølk 2024
| Produksjonsregionar geit | Søknadar om sal | Sal privat (liter) | Sal til staten (liter) |
| Nord-Norge | 6 | 277 000 | 51 000 |
| Sør-Norge | 27 | 1 041 000 | - |
| Totalt | 33 | 1 318 000 | 51 000 |
Endelege tal er venta i oktober
Landbruksdirektoratet er godt i gang med handsaminga av søknadane om sal, og vil kome tilbake med endelege tal i oktober så snart alle søknadane, og eventuelle dispensasjonar og klager er ferdig handsama.
- Vi har handsama søknadar fortløpande gjennom heile sommaren, og vore tilgjengelege for å hjelpe søkarane i prosessen undervegs. I skrivande stund er om lag 500 søknadar ferdigbehandla, seier Wickstrøm. Ho føyer til at vi er avhengige av at medeigarar og panthavarar på eigedommen samtykker i salet, før vi kan godkjenne det, og at svartida til desse difor også har noko å seie for kor lang tid det tek å få svar på søknaden.
Når endelege tal er klare i oktober, vert dette publisert på Landbruksdirektoratet sine sider for statistikk.
Ikkje mogleg å kjøpe grunnkvote frå staten i år
228 000 liter kumjølkkvote som vert selt til staten i år, vert ikkje seld ut att i år, men vert samla opp til omsetningsrunden i 2025.
Det er heller ikkje høve til å kjøpe grunnkvote for geit frå staten i 2024.