Båatsoelatjkoen mieriedimmieh

§ 1. Ulmie

Dåarjoe sïjtebielide jïh båatsoesiebride edtja viehkiehtidh nænnoes båatsoem, kvaliteetem jïh produktiviteetem eevtjedh jïh sïjsebaalhkam jieliemisnie lissiehtidh.

0 Jarkelamme mieriedimmine ruffien 22.b. 2021 nr. 2269 (faamosne snjaltjen 1.b. 2021).

§ 2. Dåarjoeryöknedimmien boelhke

Dåarjoeryöknedimmien boelhke daan mieriedimmien mietie (dåarjoejaepie) lea båatsoejaepie, mij voerhtjen 1.b. raejeste dovne njoktjen 31.b. vaasa, jis ij mij akt jeatjah fïereguhtene njoelkedassesne tjåadtjoeh.

§ 3. Sïejhme dåarjoeeaktoeh

Dåarjoe daan mieriedimmien mietie maahta båatsoesiebride jallh sïjtebielien åvtehkasse vadtasovvedh jis:

1. båatsoesiebrie jallh sïjtebielien åvtehke lea bïevnesem båatsoen bïjre dåarjoejaapan deelleme, jïh
2. båatsoesiebrie jallh sïjtebielien åvtehke lea skaehtielååjkes doekemebaalhkam bearkoedoekemistie bovtseste jïjtse mïerhkesne åtneme unnemes 50 000 kråvnine eksklusijve vielieaarvoemaaksoe minngemes kalenderejaepien.  Doekemebaalhkah bovtseste mij lea leekesovveme jallh doekesovveme Nöörjen ålkolen eah skaehtielååjkes doekemebaalhkine ryöknesovvh daan mieriedimmien mietie, jis bovtse ij leah öörnegen nuelesne ålkoelaanten gïetedimmie, jïh 
3. sïjtebielien åvtehke ij aalterepensjovnem dåastoeh almetjetrygden njoelkedassi mietie gïehtelimsjaepien gosse ohtseme lea faamosne. Ektie sïjtebielesne båarasommes paarrebielie jallh ektieårroje maahta læjhkan aalterepensjovnem dåastodh.

Baalte dåårrehtimmiebielieh eah maehtieh dåarjoem daan mieriedimmien mietie åadtjodh.

0 Jarkelamme mieriedimmine ruffien 22 b. 2021 nr. 2269 (faamosne snjaltjen 1. b. 2021), ruffien 20 b. 2022 nr. 1115 (faamosne snjaltjen 1. b. 2022), ruffien 21. b. 2023 nr. 1014 (faamosne snjaltjen 1. b. 2023).

§ 4. Sjïere bovtsetaalen bïjre

Jis edtja dåarjoem dåastodh dellie sïjten bovtsetaale njoktjen 31.b. dåarjoejaepien tjuara bijjemes bovtsetaalen mietie årrodh maam lea jååhkesjamme åtnoenjoelkedassine vihtiestamme.

Jis sïjten bovtsetaale lea stuerebe goh vihtiestamme bovtsetaale, sïjtebielien åvtehke maahta læjhkan dåarjoem åadtjodh jis:

1. sïjte lea giehpiedimmiesoejkesjem dorjeme båatsoelaaken § 60 mietie gåalmede lïhtse, jïh sïjtebielien bovtsetaale lea daan soejkesjen mietie, jallh
    
2. båatsoeståvroe lea proporsjonaale giehpiedimmiem bovtsetaaleste nænnoestamme båatsoelaaken § 60 mietie gåalmede lïhtse, jïh sïjtebielien bovtsetaale lea daan giehpiedimmien mietie, jallh
3. staatehaaltoje lea bijjemes bovtsetaalem fïerhten sïjtebealan nænnoestamme båatsoelaaken § 60 mietie vïjhtede lïhtse baalte mieriedimmine, jïh sïjtebielien bovtsetaale lea dan mietie, jallh
4. sïjtebielieh sïjtesne leah latjkoem dorjeme joekedimmien bïjre bovtsetaaleste båatsoelaaken § 60 mietie govhtede lïhtse, jïh sïjtebielien bovtsetaale lea daan latjkoen mietie, jallh
5. sïjte lea bijjemes bovtsetaalem fïerhten sïjtebealan vihtiestamme båatsoelaaken § 60 mietie njealjede lïhtse, gusnie summe sïjtebielien bovtsetaaleste ij leah stuerebe goh sïjten vihtiestamme bijjemes bovtsetaale, jïh sïjtebielien bovtsetaale lea dan mietie, jallh  
6. sïjtebielie ij bokstaavijste a-e feerhmesovvh, jïh ij leah sov bovtsetaalem lissiehtamme dehtie bovtsetaaleste maam sïjtebielie utni jaepien åvtelen sïjte don vihtiestamme bijjemes bovtsetaalen bijjelen bööti.

0 Jarkelamme mieriedimmine ruffien 29 b. 2020 nr. 1427 (faamosne snjaltjen 1. b.2022), goeven 21.b. 2020 nr. 3044 (faamosne tsïengelen 1.b. 2021), ruffien 20. b. 2022 nr. 1115 (faamosne snjaltjen 1. b. 2022). 

§ 5. Ryöknedimmie dåarjoste

Jis lea bijjemes bovtsetaalem sïjtebielide vihtiestamme, jïh sïjtebielie ij eaktojde bovtsetaalen bïjre illh § 4 mubpene lïhtsesne bokstaave a-e, sïjtebielien åvtehke maahta læjhkan dåarjoem åadtjodh daan vuarjasjimmien mietie:

1. jis lissiehtimmie lea gaskem 1 jïh 10 bovtsh, dåarjoe geahpene 1000 kråvnajgujmie fïerhten bovtsen åvteste mij sïjtebielien vihties bovtsetaalen bijjelen båata,
2. jis lissiehtimmie lea gaskem 11 jïh 20 bovtsh, dåarjoe geahpene 2000 kråvnajgujmie fïerhten bovtsen åvteste mij sïjtebielien vihties bovtsetaalen bijjelen båata,
3. jis lissiehtimmie lea gaskem 21 jïh 30 bovtsh dåarjoe geahpene 3000 kråvnajgujmie fïerhten bovtsen åvteste mij sïjtebielien vihties bovtsetaalen bijjelen båata.

Jis ij leah bijjemes bovtsetaalem sïjtebielide vihtiestamme, jïh sïjtebielie lea sov bovtsetaalem lissiehtamme guktie dïhte strijrie § 4 mubpene lïhtsesne bokstaave f, sïjtebielien åvtehke maahta læjhkan dåarjoem åadtjodh daan vuarjasjimmien mietie:

1. jis lissiehtimmie lea gaskem 1 jïh 10 bovtsh, dåarjoe geahpene 1000 kråvnajgujmie fïerhten bovtsen åvteste mij bovtsetaalen bijjelen båata maam sïjtebielie utni don jaepien åvtelen sïjte dan vihties bijjemes bovtsetaalen bijjelen bööti
2. jis lissiehtimmie lea gaskem 11 jïh 20 bovtsh, dåarjoe geahpene 2000 kråvnajgujmie fïerhten bovtsen åvteste mij bovtsetaalen bijjelen båata maam sïjtebielie utni don jaepien åvtelen sïjte dan vihties bijjemes bovtsetaalen bijjelen bööti
3. jis lissiehtimmie lea gaskem 21 jïh 30 bovtsh dåarjoe geahpene 3000 kråvnajgujmie fïerhten bovtsen åvteste mij bovtsetaalen bijjelen båata maam sïjtebielie utni don jaepien åvtelen sïjte dan vihties bijjemes bovtsetaalen bijjelen bööti

Jis lissiehtimmie bovtsetaaleste lea vielie goh 30 bovtsh dåarjoe ij maehtieh vadtasovvedh.

§ 6. Ohtsemen krïevenassh

Båatsoesiebrie jallh sïjtebielien åvtehke mij dåarjoem åhtsa edtja ohtsemegoerem nuhtjedh maam Laanteburriedirektoraate lea vihtiestamme. Ohtseme staatehaaltoejasse seedtesåvva dennie båatsoedajvesne sïjtebielie jallh båatsoesiebrie govlehtuava.

Tjuara ohtsemem dåarjoen bïjre deelledh suehpeden 31.b. åvtelen.

Sjïere veajkoej staatehaaltoje maahta dispensasjovnem vedtedh ohtsememiereste.

0 Jarkelamme mieriedimmiejgujmie  goeven 21.b. 2020 nr. 3044 (faamosne tsïengelen 1. b. 2021), ruffien 22.b.  2021 nr. 2269 (faamosne snjaltjen 1. b. 2021), ruffien 21. b. 2023 nr. 1014 (faamosne snjaltjen 1. b. 2023)

§ 7. Sjïere gïehtelimsdåarjoe noeride

Sïjtebielien åvtehke mij lea nuerebe goh 30 jaepien båeries tsïengelen 1.b. gïehtelimsjaepien, maahta gïehtelimsdåarjoem 40 000 kråvnaj raajan åadtjodh. Ektie sïjtebielesne båarasommes paarrebielie jallh ektieårroje maahta læjhkan bijjelen 30 jaepien båeries årrodh.

§ 8. Sjïere gïehtelimsdåarjoe nyjsenæjjide

Nyjsenæjjah mah sïjtebielien åvtehkinie oktegh tjåadtjoeh jïh båatsoem åejviejielieminie utnieh, maehtieh sjïere gïehtelimsdåarjoem 40 000 kråvnaj raajan åadtjodh.

Åejviejielieminie ryöknesåvva gosse unnemes 50 prosenth sïjtebielieåvtehken persovnebaalhkeste minngemes skaehtiereeknehlåhkosne skaehtielååjkes doekemebaalhkeste båetieh bearkoedoekemistie bovtseste jïjtse mïerhkesne. Nyjsenæjjah mah båatsoelïerehtæjjine orreme jaepien åvtelen sïjtebieliem åadtjoeji, maehtieh dåarjoem åadtjodh jis unnemes 50 prosenth baalhkeste barkoste båetieh goh lïerehtæjja daan jaepien.

0 Jarkelamme mieriedimmine ruffien 22.b. 2021 nr. 2270 (faamosne snjaltjen 1. b. 2021), ruffien 20. b. 2022 nr. 1115 (faamosne snjaltjen 1. b. 2022), ruffien 21. b. 2023 nr. 1014 (faamosne snjaltjen 1. b. 2023).

§ 9. Tseegkemedåarjoe

Almetje gie sïjtebieliem åådtje jallh sïjtebieliem jïjtsasse tseegkie åvtelen satne lea 35 jaepieh illeme, maahta tseegkemedåarjoem 120 000 kråvnaj raajan åadtjodh voestes jaepien tseegkemen mænngan, jïh 100 000 kråvnaj raajan fïerhten jaepien dej göökte minngebi jaepiej sertemen mænngan. Jis sïjtebielie tseegkesåvva jallh sertieståvva paarrebielide jallh ektieårroejidie ektesne, båarasommes paarrebielie jallh ektieårroje maahta læjhkan bijjelen 35 jaepien båeries årrodh gosse sertiestimmie dorjesovvi.

Dïhte guhte tseegkemedåarjoen bïjre åhtsa lutniestimmiem åtna baalhkakrïevenasseste § 3 nr. 2.

0 Jarkelamme mieriedimmine ruffien 22.b. 2021 nr. 2270 (faamosne snjaltjen 1. b. 2021), ruffien 20.b. 2022 nr. 1115 (faamosne snjaltjen 1.b. 2022).

§ 10. Produksjovnepreemije

Båatsoesiebrie jallh sïjtebielien åvtehke maahta produksjovnepreemijem 39 prosenti raajan  skaehtielååjkes doekemebaalhkeste åadtjodh eksklusijve vielieaarvoemaaksoe bearkoste jïh jeatjah skaehtielååjkes doekemebaalhkeste bovtseste mah båatsoeseabran jallh sïjtebielieåvtehkasse govlehtuevieh minngemes kalenderejaepien.

Sïjtebielien jeatjah båatsoeburride produksjovnepreemije ryöknesåvva doekemebaalhkijste bearkoste jïh jeatjah doekemebaalhkijste bovtseste mah båatsoeburride sïjtebielesne govlehtuevieh minngemes kalenderejaepien.

Doekemebaalhka bearkoste mij leekedimmiesijjesne leekesovveme edtja reektesovveme årrodh mieriedimmien mietie reektemen bïjre leekedamme bovtseste jïh våarhkoeveahkeste ihke daate maahta meatan årrodh våaroemisnie ryöknedæmman produksjovnepreemijeste.

Doekeme aalebovtsijste, jïh foeresjimmie- jïh leekedimmieåasah eah leah meatan goh våarome ryöknedimmesne produksjovnepreemijeste.

Doekemebaalhkah bovtseste mij lea leekesovveme jallh doekesovveme Nöörjen ålkolen ij skaehtielååjkes doekemebaalhkine ryöknesovvh voestes punktumen mænngan, jis bovtse ij leah ålkoelaanten bueriedimmieöörnegen nuelesne.

Produksjovnepreemije ij skaehtielååjkes doekemebaalhkan åvteste maaksasovvh mij lea bijjelen 650 000 kråvnah fïerhtene sïjtebielesne, jïh 1 250 000 kråvnah fïerhtene båatsoesiebresne.

Laanteburriedirektoraate maahta dispensasjovnem vedtedh baalhkaraasteste govhtede lïhtsesne gosse sïjtebielie orreje jïh abpe krievviem leekede.

0 Jarkelamme mieriedimmine ruffien 29.b. 2020 nr. 1247 (faamosne snjaltjen 1.b. 2020), ruffien 22. b. 2021 nr. 2269 (faamosne snjaltjen 1.b. 2021), ruffien 22.b. 2021 nr. 2270 (faamosne snjaltjen 1. b. 2021), ruffien 20.b. 2022 nr. 1115 (faamosne snjaltjen 1.b. 2022), ruffien 21. b. 2023 nr. 1014 (faamosne snjaltjen 1. b. 2023).

§ 11. Miesieleekedimmiedåarjoe

Båatsoesiebrie jallh sïjtebielien åvtehke maahta miesieleekedimmiedåarjoem 650 kråvnaj raajan åadtjodh fïerhten miesien åvteste maam lea leekedamme jïh reektehtamme mieriedimmien mietie reektemen bïjre leekedamme bovtseste jïh våarhkoeveahkeste. Leekedimmie tjuara dorjesovvedh leekedimmiesijjesne mij optiske gåhkoemöölemem åtnose vaalteme.

Maahta dåarjoem miesiej åvteste åadtjodh mah leah leekesovveme boelhken mïetsken 15. b. – njoktjen 31.b.

Maahta miesieleekedimmiedåarjoem aaj åadtjodh beelhkeme miesiej åvteste jïh miesiej åvteste mah teehpesuvvieh radioaktiviteeteråajvarimmiej gaavhtan.

0 Jarkelamme mieriedimmine ruffien 29.b. 2020 nr. 1427 (faamosne snjaltjen 1.b. 2020), voerhtjen 16.b. 2021 nr. 1187, ruffien 22.b. 2021 nr. 2269 (faamosne snjaltjen 1.b. 2021), ruffien 22.b. 2021 nr. 2270 (faamosne snjaltjen 1.b. 2021), ruffien 21. b. 2023 nr. 1014 (faamosne snjaltjen 1. b. 2023).

§ 12. Paarrebielie-/ektieårrojelissie

Dej veajkoej paarrebielieh/ektieårrojh bovtsigujmie gïehtelieh seamma sïjtebielesne, jïh gåabpatjahkh åvtehkinie tjåadtjoeh sïjtebieleste, sïjtebielie maahta lissie gïehtelimsdåarjoem 30 000 kråvnaj raajan åadtjodh. Gåabpegh paarrebielieh/ektieårrojh eah daarpesjh jïjtsh mïerhkem utnedh.

Jis gåabpegh paarrebielieh/ektieårrojh bovtsem eekieh, dellie gåabpatjahkh tjuerieh bovtsem dennie sïjtebielesne eekedh mesnie leah åvtehkh. Gïehtelimsjaepien dah paarrebieline/ektieårroejinie sjïdtin, staatehaaltoje maahta dispensjovnem daehtie krïevenasseste vedtedh. 

Ij maehtieh paarrebielie-/ektieårrojelissiem åadtjodh jis akte paarrebielijste/ ektieårroejijstie minngemes skaehtiereeknehlåhkosne persovnebaalhkam båatsoen ålkolen utni vielie goh 250 000 kråvnah. Maaksoe tjirkijebarkoen åvteste båatsosne ryöknesåvva daennie ektiedimmesne goh baalhka båatsoste.

0 Jarkelamme mieriedimmine goeven 21.b. 2020 nr. 3044 (faamosne tsïengelen 1.b. 2021), ruffien 22.b. 2021 nr. 2270 (faamosne snjaltjen 1. b. 2021), ruffien 20.b. 2022 nr. 1115 (faamosne snjaltjen 1.b. 2022, aarebi § 12), ruffien 21. b. 2023 nr. 1014 (faamosne snjaltjen 1. b. 2023, aarebi § 13).

§ 13. Bievnemedïedte jïh gïehtjedimmie

Dah mah dåarjoem dåastoeh daan mieriedimmien mietie dïedtem utnieh gaajhkh bïevnesh vedtedh mejtie båatsoeåejvieladtjh vuejnieh daerpies juktie maehtedh dåarjoeöörnegidie reeredh, jallh maehtedh båatsoelatjkoem illedh.

Båatsoeåejvieladtjh vaaksjoeh dåarjoemaaksoeh leah reaktoe. Jis ohtsije gyhtjelassem dan bïjre åådtje, dïhte dïedtem åtna gaajhkh reeknehlåhkoeh, prievieh jïh tjaalegh dåarjoen bïjre deelledh. Båatsoeåejvieladtjh maehtieh revideereme reeknehlåhkoem krïevedh dejstie gïehtelimmijste mah revisjovnedïedtem utnieh.

0 jarkelamme mieriedimmine ruffien 20.b. 2022 nr. 1115 (faamosne snjaltjen 1.b.  2022, aarebi § 13), ruffien 21. b. 2023 nr. 1014 (faamosne snjaltjen 1. b. 2023, aarebi § 14).

§ 14. Reebleme bïevnesijstie

Ohtsemegïetedimmien jïh gïehtjedimmien sjïekenisnie dåarjoemaaksojste, båatsoeåejvieladtjh maehtieh bïevnesh byögkeles åejvieladtjijste reebledh.

0 Lissiehtamme mieriedimmine ruffien 21.b. 2023 nr. 1014 (faamosne snjaltjen 1.b. 2023).

§ 15. Staeriedimmie båajhtoeh maaksojste

Båatsoeåejvieladtjh maehtieh fiejlieh maakseme dåarjojne staeriedidh, goh minngiemaaksoe jallh krïebpesjimmine bååstedemaaksoen bïjre dåarjoedåastoejistie.

0 Jarkelamme mieriedimmine ruffien 20. b. 2022 nr. 1115 (faamosne snjaltjen 1.b. 2022, aarebi § 14).

§ 16. Åeniedimmie jïh vielie

Jis dåarjoedåastoje ov-våårege jallh eanghkoen båajhtoeh jallh faatoes bïevnesh ohtsemisnie vadteme, mah sijhtieh jallh leah sïjhteme våaromem vedtedh akten dåarjoemaaksose mïsse ij reaktam utnieh, maahta abpe jallh bielieh dåarjoste åeniedidh.

Jis dåarjoedåastoje ov-vååregelaakan jallh eanghkoen sov båatsojne gïehtele jallh lea sov båatsojne gïehtelamme ræjhtosne båatsoen laakigujmie jïh mieriedimmiejgujmie, maahta abpe jallh bieliem dåarjoste bååstede hööltedh goske tsiehkie staeriesovveme. Jis tjarke ov-vååregelaakan jallh eanghkoen dagkerh njoelkedassh mïedtelamme, maahta abpe jallh bielieh dåarjoste åeniedidh.

0 Jarkelamme mieriedimmine ruffien  20.b. 2022 nr. 1115 (faamosne snjaltjen 1.b. 2022, aarebi  § 15).

§ 17. Krïebpesjimmie bååstedemaaksoe- jallh åeniedimmiesummeste

Båatsoeåejvieladtjh maehtieh krïebpesjidh differanse bååstede maaksasåvva gaskem maakseme summe jïh dåarjoe mïsse dåastoje reaktam åtna, nænnoestimmien mietie bååstedemaaksoen bïjre § 15 mietie jallh åeniedimmien mietie § 16. Maahta aaj differansem vuestieryöknedh minngebe dåarjoemaaksojne.

Maahta krïevenassem båatsoeåejvieladtjijste vuestieryöknedh dåarjoemaaksojne dåarjoedåastoejasse.

Jis dåarjoedåastoje ij lij våårege buerie jaahkosne maaksoen bïjre, båatsoeåejvieladtjh maehtieh reentah krïevedh dehtie miereste krïevenasse bååstedemaaksoen bïjre lea dåastoejasse båateme. Jis tjarke ov-våårege jallh eanghkoen, båatsoeåejvieladtjh maehtieh reentah krïevedh dehtie miereste gosse dïhte ovreaktoe dåarjoe maaksasovvi. Edtja reentajuelkiem seamma reentajualkan bïejedh goh Finansedepartemeente fïerhten aejkien lea vihtiestamme § 3 mietie laakesne goeven 17.b. 1976 nr. 100 reentaj bïjre fer seenhte maaksosne jïh vielie.

0. Jarkelamme mieriedimmine ruffien 20.b. 2022 nr. 1115 (faamosne snjaltjen 1.b. 2022, aarebi § 16), ruffien 29.b. 2022 nr. 1238 (faamosne snjaltjen 1.b. 2022).

§ 18. Reereme, laejhteme jïh dispensasjovne

Laanteburriedirektoraate dåarjojde reerie daan mieriedimmien mietie. Staatehaaltoje nænnoestimmiem dåarjoen bïjre dorje.  Edtja ohtsemidie dej njoelkedassi mietie gïetedidh mah lin faamosne don båatsoejaapan mïsse dåarjoem åhtsa. Maahta staatehaaltojen nænnoestimmiem laejhtedh Laanteburriedirektoraatese laaken mietie goeven 10.b. 1967 gïetedimmievuekien bïjre reeremeaamhtesinie (reeremelaake).

Laanteburriedirektoraate maahta sjïere veajkoej dispensasjovnem mieriedimmien njoelkedassijste vedtedh.

Maahta nænnoestimmieh mejtie Laanteburriedirektoraate lea daan mieriedimmien mietie dorjeme Laanteburrie- jïh beapmoedepartemeentese laejhtedh laaken mietie goevten 10.b. 1967 gïetedimmievuekien bïjre reeremeaamhtesinie (reeremelaake).

0 Jarkelamme mieriedimmine goeven 21b. 2020 nr. 3044 (faamosne tsïengelen 1. b. 2021), ruffien 20.b. 2022 nr. 1115 (faamosne snjaltjen 1b. 2022, aarebi § 17), ruffien 21. b. 2023 nr. 1014 (faamosne snjaltjen 1. b. 2023).

§ 19. Faamoeaalkoe jïh sertiestimmienjoelkedasse

Mieriedimmie faamose båata snjaltjen 1.b. 2019. Seamma tïjjen mieriedimmie ruffien 19.b. 2012 nr. 592 heajhtasåvva dåarjoen bïjre sïjtebielide jïh båatsoesiebride.

0 Jarkelamme mieriedimmine ruffien 20. b. 2022 nr. 1115 (faamosne snjaltjen 1. b. 2022, aarebi § 18).