4. Innhenting og samanstilling av kunnskap
Arbeidet med strategien krev innhenting av kunnskap om jordbruksareala til kommunen. Mykje kunnskap finst allereie i publiserte kartlag og statistikk. For annan kunnskap kan det vere nødvendig å gjere eit grundigare kartleggingsarbeid. Kommunen må sjølv vurdere kva kunnskapsgrunnlag som er nødvendig for å fastsette mål og tiltak i strategien.
Under er ei oversikt over verktøy som kan bli brukt for å innhente kunnskap for samanstilling til strategien. Kommunen må sjølv vurdere korleis kunnskapen skal bli samanlikna og vist.
Verktøy
NIBIOs arealrapport – eit verktøy for å generere ein rapport med kart og arealtal for ulike tema, under dette til dømes areal av dyrka og dyrkbar jord, skog og myr.
NIBIOs arealbarometer – viser produksjonsgrunnlaget for jord- og skogbruk. Kommunevis og fylkesvis.
NIBIOs jordsmonnkart – for areal som er jordsmonnkartlagde er det kartlag som deler jordbruksareala inn i tre klassar etter jordeigenskapar som er viktige for den agronomiske bruken av jorda.
NIBIOs kartlag om jordbruksareal som kan vere ute av drift – kartlaget baserer seg på om det er betalt ut produksjonstilskot på arealet eller ikkje. Slike areal kan vere ute av drift.
SSBs KOSTRA – KOSTRA står for kommune-stat-rapportering. I Statistisk sentralbyrås (SSB) statistikkbank ligg det kommunevis statistikk på omdisponering av dyrka og dyrkbar jord tilbake til 2005.
I tillegg til informasjon som finst i sentrale databasar, vil det vere verdifullt å innhenta kunnskap lokalt. Det vere seg frå bønder eller frå andre som har arbeidet sitt i tilknyting til jordbruket. Det kan vere nyttig å bruke ressursgruppa i dette arbeidet.
