Boazodoallošiehtadusa njuolggadusat

1. Kapihtal. Oppalaš mearrádusat

§ 1-1. Ulbmil

Boazodoalu Ovddidanfoanda galgá ekonomalaš gaskaomiid geavaheamis váikkuhit ovddidit boazoealáhusa boazodoallopolitihkalaš ulbmiliid ektui.

§ 1-2. Oktasašmearrádusat buot doarjjaortnegiidda

1. kapihttala mearrádusat gustojit buot doarjjaortnegiidda dán njuolggadusa mielde, jus eará ii leat mearriduvvon.

Doaibmajahki mearkkaša dán njuolggadusas áigodat cuoŋománu 1. beaivvi rájes njukčamánu 31. beaivvi rádjái.

§ 1-3. Boazodoalu Ovddidanfoandda stivra

Njealji olbmo stivra hálddaša Boazodoalu Ovddidanfoandda. Stivra nammaduvvo guovtti jahkái hávális. Eanandoallo- ja biebmodepartemeanta nammada guokte miellahtu ja guokte várrelahtu. Norgga Boazosápmelaččaid Riikkasearvi nammada guokte miellahtu ja guokte várrelahtu.

Foandastivra disponere oasi Boazodoalu Ovddidanfoandda oppalaš juolludusas.

Eanandoallodirektoráhta lea foandastivrra čálli.

§ 1-4. Ekonomalaš rámmat

Boazodoalu Ovddidanfoandda ekonomalaš rámmat ja eavttut mearriduvvojit Stuoradikki boazodoallošiehtadusa proposišuvnnaid ja jahkásaš stáhtabušeahta meannudeamis.

Foandastivra sáhttá hilgut ekonomalaš doarjjaohcamiid foandda ruđalaš dili vuođul.

Foandastivra sáhttá bidjat njuolggadusaid ja mearridit doarjjameriid ovttaskasortnegiidda mat gullet foandda vuollái, gč. § 1-6 nuppi lađđasa.

Foandastivrra doaibma galgá čuovvut stáhta ekonomiijahálddašeami gustovaš njuolggadusaid.

0 Rievdaduvvon njuolggadusa bokte geassemánu 22. beaivvi 2021 nr. 2306 (fápmui boahtán suoidnemánu 1. b. 2021).

§ 1-5. Raporteren

Eanandoallodirektoráhta galgá oažžut Boazodoalu Ovddidanfoandda jahkeraportta ovdal njukčamánu 15. b. juohke jagi. Raporttas galgá sisttisdoallat maŋemus jagi rehketdoallu mii lea veardádallojuvvon bušeahtain ja ovddit jagiid rehketdoaluiguin, ja doaimma fágalaš árvvoštallama.

Rehketdoallu fievrreduvvo reaidoruhtaprinsihpa mielde ja Riikkarevišuvdna lea revisora.

0 Rievdaduvvon njuolggadusa bokte geassemánu 22. beaivvi 2021 nr. 2306 (fápmui boahtán suoidnemánu 1. b. 2021).

§ 1-6. Doaibmaviidodat

Boazodoalu Ovddidanfoandda ekonomalaš doarjja sáhttá addojuvvot čuovvovaš ortnegiid vuođul

1. doarjja mearkkašahtti boazovahágiid ovddas lihkohisvuođaid geažil, gč. 2. kapihttala,
2. boazodoallorusttegiidda, maiddái gárddiide/áiddiide ja njuovahagaide, gč. 3. kapihttala,
3. boazodolliid duođaštuvvon goluid buhtadussii, kurssaid/lassioahpu ja sullasaččaid oktavuođas, gč. 4. kapihttala,
4. doarjja meahccemánáidgárddiide, gč. 5. kapihttala, ja
5. doarjja orohatplánaid ovddideapmái orohagaide main váilu orohatplána, gč. 6. kapihttala, ja
6. juridihkalaš veahkki orohagaide ja siiddaide, gč. kapihtal 7.

Ekonomalaš doarjja sáhttá muđui juolluduvvot eará doaibmabijuide, mat leat njuolggadusaid ulbmila mielde, gč. § 1-1, nugo

1. boazodoalu guohtunvuoigatvuođa sihkkarastimii, dása gullá maiddái doarjja orohagaid bargui sihkkarastit boazodoalloeatnamiid,
2. boazodoalu geavatlaš doaibmabijuide,
3. čađahit strukturdoaibmabijuid orohagain gos dárbbašuvvojit doaibmabijut maiguin heiveha boazologu ja resursaávkkástallama,
4. fágalaš doaibmabijuide mat ovdánahttet boazodoalu, nugo bagadallamii, kurssaide, guohtuniskkadeapmái, plánemii ja nálledikšumii,
5. lassiealáhusaid ja áigumušaid ovdánahttimii, main lea oppalaš kultuvrralaš mearkkašupmi boazosápmelaččaide,
6. doaimmaide mat ovddidit dásseárvvu ja nissonolbmuid dili boazodoalus,
7. 1-2 beaivásaš gelbbolašvuođa loktejeaddji kurssaid/lassioahpu heiveheapmái,
8. doarjjan boazodoalloealáhusa doaimmaide mat čuvvot dálkkádatrievdamiid,
9. dutkamii ja máhttogaskkusteapmái,
10. diliid láhčimii nu ahte boazoeaiggádat geain leat hedjonan doaibmanávccat sáhttet oassálastit boazobargguin,
11. doarjja boares áiddiid ja gárddiid rádjamii, ja
12. 15 000 ruvdnosaš stipeanda olbmuide geain lea sierra mearka čállit boazodollui guoskevaš masterčállosa.

0 Rievdaduvvon njuolggadusa bokte geassemánu 22. beaivvi 2021 nr. 2306 (fápmui boahtán suoidnemánu 1. b. 2021), geassemánu 20. b. 2022 nr. 1091(fápmui boahtán suoidnemánu 1. b. 2022), geassemánu 21. b. 2023 nr. 1010 (fápmui boahtán suoidnemánu 1. b. 2023).

§ 1-7. Oktasašeavttut

Boazodoalu Ovddidanfoandda doarjaga oažžuma eaktun lea ahte doaibmabidju ovddida orohaga ja guovllu boazodoalu. Go lea dárbbašlaš, de ferte doaibmabiju váikkuheapmi guohtumiid guorbamii ja birrasii muđui árvvoštallot.

Lea eaktun doarjjaoažžumii dán njuolggadusa mielde ahte ohccojuvvon doaibmabidju čuovvu áigges áigái gustovaš lágaid ja láhkaásahusaid.

0 Rievdaduvvon njuolggadusa bokte geassemánu 22. beaivvi 2021 nr. 2306 (fápmui boahtán suoidnemánu 1. b. 2021).

§ 1-8. Gáibádusat ohcamii

Doarjjaohcan Boazodoalu Ovddidanfoandda olis galgá sáddejuvvot Eanandoallodirektoráhtii ovdal almmuhuvvon áigemeari.

Jus lea ráhkaduvvon sierra ohcanskovvi ortnegii, de galgá dát geavahuvvot. Dárbbašlaš duođaštusat galget biddjojuvvot ohcama mielde.

§ 1-9. Áššegieđahallan

Eanandoallodirektoráhta gieđahallá ohcama ja ráhkada evttohusa Boazodoalu Ovddidanfoandda stivrii.

Ohcama mearrida foandastivra. Doarjjamearrádusas sáhttet mearriduvvot sierra eavttut. Jus lea jietnadássivuohta, de lea jođiheaddjis duppaljietna. Foandastivra sáhttá sirdit mearridanválddi Eanandoallodirektoráhtii.

0 Rievdaduvvon njuolggadusaid bokte geassemánu 29. b. 2020 nr. 1422 (fápmui boahtán suoidnemánu 1. b. 2020), geassemánu 22. beaivvi 2021 nr. 2306 (fápmui boahtán suoidnemánu 1. b. 2021).

§ 1-10. Máksin

Eanandoallodirektoráhta máksá 50 proseantta doarjagis doarjjamieđiheami oktavuođas jus eará ii leat mearriduvvon ovttaskas ortnega dáfus. Loahppa máksojuvvo maŋŋel go Eanandoallodirektoráhta lea dohkkehuvvon sisasáddejuvvon rehketdoalu ja duođaštusaid.

Geavakeahtes, juolluduvvon doarjja máhcahuvvo Boazodoalu Ovddidanfondii.

0 Rievdaduvvon njuolggadusa bokte geassemánu 22. beaivvi 2021 nr. 2306 (fápmui boahtán suoidnemánu 1. b. 2021).

§ 1-11. Dieđihangeatnegasvuohta ja bearráigeahčču

Doarjjaoažžut leat dán njuolggadusa mielde geatnegahtton addit buot dieđuid maid boazodoalloeiseválddit oidnet dárbbašlažžan doarjjaortnegiid hálddašeami olis.

Boazodoalloeiseválddit sáhttet čađahit báikkálaš bearráigeahču doarjjaoažžu luhtte.

§ 1-12. Boasttu máksimiid njulgen

Boazodoalloeiseválddit sáhttet njulget boasttuvuođaid máksojuvvon doarjagiin, juogo maŋŋelmáksimiid bokte dahje doarjaga ruoktotmáksingáibádusa bokte doarjjaoažžus.

§ 1-13. Unnideapmi ja doarjaga dollen.

Jus ohcci fuollameahttumit lea addán boasttu dahje váilevaš dieđuid doarjjaohcamis mii lea dahje livččii sáhttán dagahit ahte doarjja máksojuvvo eahpevuoiggalaččat, de sáhttá doarjja ollásit dahje belohahkii unniduvvot.

Jus doarjjaoažžu boazodoalloeiseválddiid mearrádusa mielde doaibmá dahje lea doaibman fuollameahttumit dahje eaktodáhtolaččat boazodoalloealáhusa lágaid dahje njuolggadusaid vuostá, de sáhttá doarjja ollásit dahje belohahkii dollejuvvot dassážii go dilli lea njulgejuvvon. Jus rihkkuma olis lea leamaš roavva fuollameahttunvuohta dahje eaktodáhtolašvuohta, de sáhttá doarjja ollásit dahje belohahkii unniduvvot.

§ 1-14. Ruoktotmáksin- dahje unnidanmeari sisagáibideapmi

Máksojuvvon ruđa ja doarjjavuođu erohus, mii lea mearriduvvon máksojuvvot ruovttoluotta § 1-12 mielde dahje unniduvvot § 1-13 mielde, sáhttá gáibiduvvot máksojuvvot ruovttoluotta doarjjavuostáváldis dahje dollejuvvot boahttevaš doarjjamáksimiin.

Gáibádusat boazodoalloeiseválddiin sáhttet dollejuvvot doarjjamáksimiin doarjjavuostáváldái.

Jus doarjjavuostáváldi ii lean várrogas buori jáhkus máksima hárrái, de sáhttet reanttut gáibiduvvot dan áiggi rájes go ruoktotmáksingáibádus lea ollen doarjjavuostáváldái. Jus lea roavva fuollameahttunvuohta dahje eaktodáhtolašvuohta, de sáhttet reanttut gáibiduvvot dan áiggi rájes go eahpevuoiggalaš doarjja lea máksojuvvon. Reantojuolgi galgá leat seamma go dat reantojuolgi maid Finánsadepartemeanta áigges áigái mearrida § 3 mielde lágas b. juovlamánu 17. b. 1976 nr. 100 reanttuid maŋŋonan máksimiid je. birra.

§ 1-15. Váidinvejolašvuohta

Mearrádusa dán njuolggadusa mielde sáhttá váidit Eanandoallo- ja biebmodepartementii hálddašanlága njuolggadusaid mielde.

2. Kapihtal. Doarjja mearkkašahtti boazovahágiid oktavuođas lihkohisvuođaid geažil

§ 2-1. Ulbmil

Ulbmil doarjagiin lea veahkkin gokčat vahágiid maid guoskevaš siidaoasit ja boazosearvvit gillájit mearkkašahtti boazovahágiid oktavuođas lihkohisvuođaid geažil.

0 Rievdaduvvon njuolggadusaid bokte geassemánu 22. beaivvi 2021 nr. 2269 (fápmui boahtán suoidnemánu 1. b. 2021), geassemánu 22. beaivvi 2021 nr. 2306 (fápmui boahtán suoidnemánu 1. b. 2021).

§ 2-2. Definišuvdna

Lihkuhisvuođain oaivvilduvvo dán kapihttalis vuorddekeahtes ja fáhkka dáhpáhus, man geažil ollu bohccot duššet ja man boazoeaiggát ii livčče govttolaš árjjaiguin sáhttán hehttet. Dát sáhttá ovdamearkan leat heavvaneapmi, muohtauđas, firron ja fáhkka dávddat.

Massimat lássahuvvan guohtumiid, guohtumiid guorbama, unnán njuovvama dahje boraspiriid geažil eai rehkenastojuvvo lihkohisvuohtan dán kapihttalis. 

Ealu sturrodat ovdal massimiid mearkkaša dat boazolohku mii lei maŋemus almmolaččat dárkkistuvvon lohkamis. Jus dákkár lohkan ii leat čađahuvvon maŋemus doaibmajagis, de biddjo maŋemus boazodoallodieđáhusa boazolohku vuođđun.

§ 2-3. Doarjjaeavttut

Doarjja sáhttá juolluduvvot ovttaskas dollui/boazosearvái jus čuovvovaš eavttut leat devdojuvvon

1. massin lea deaividan lihkohisvuođa geažil, gč. § 2-2,
2. eará ortnegat eai buhtte massima,
3. massin mii ovtta ja seamma lihkuhisvuođas dahká unnimustá 10 proseantta ealu sturrodagas ovdal massima. Sáhttá sorjjakeahttá das addot doarjja jus lea massán unnimusat 150 heakka.

Dattege ii juolloduvvo doarjja go massá unnit go 10 heahkka.

4. massojuvvon bohccot c-bustáva mielde leat duođaštuvvon § 2-4 mielde,
5. siidaoassi/boazosearvi dakkaviđe dieđihii vahága stáhtahálddašeaddjái. Siidaoassi ferte dasa lassin dieđihit vahága orohatstivrii.
6. siidaoassi /boazosearvi lea álggahan dárbbašlaš doaibmabijuid maiguin eastada/unnida vahága,
7. siidaoassi lea ožžon doaibma-/buvttadanvuoittu¹ unnimusat ovtta golmma maŋemus jagis,
8. siidaoasis leat boazolohku doaibmajagis mii addá vuoigatvuođa oažžut doarjaga doaibmajagis siidaosiid ja boazoservviid doarjjanjuolggadusa vuođul § 4.

0 Rievdaduvvon njuolggadusa bokte juovlamánu 21. b. 2020 nr. 3044 (fápmui boahtán ođđajagemánu 1. b. 2021), geassemánu 22. beaivvi 2021 nr. 2269 (fápmui boahtán suoidnemánu 1. b. 2021).

1 Gč. Njuolggadusa doarjaga birra siidaosiide ja boazoservviide § 10.

§ 2-4. Duođašteapmi

Stáhtahálddašeaddji, šibitdoavttir, almmolaš bearráigeahččoeiseváldi dahje dáid ovddasteaddji galgá duođaštit massojuvvon bohccuid logu geahčadeami ja ráppiid lohkama bokte.

Massimat muohtauđđasa geažil sáhttet duođaštuvvot ráppiiguin maŋŋil go bievlá. Go lea veadjemeahttun dahje váttis ráppiid dievaslaččat duođaštit, de sáhttá vahága sturrodaga merošteapmi dohkkehuvvot doarvái buorren duođaštussan boazologu vuođul mii lei ovdal ja maŋŋil massima. Boazologu ovdal- ja maŋŋelmerošteami diekkár oktavuođas dahká stáhtahálddašeaddji.

0 Rievdaduvvon njuolggadusa bokte juovlamánu 21. beaivvi 2020 nr. 3044 (fápmui boahtán ođđajagimánu 1. b. 2021), geassemánu 20. b. 2022 nr. 1091, geassemánu 21. b. 2022 nr. 1121 (fápmui boahtán suoidnemánu 1. b. 2022).

§ 2-5. Doarjaga meroštallan

Foandastivra mearrida dárkilet njuolggadusaid doarjaga árvvoštallamii.

Doarjagis dollejuvvo iežasoassi, 10.000 ruvnno.

Sismiesit sáhttet dušše rehkenastojuvvot mielde massimii jus čoavjjehat massojuvvojit. Dalle galgá árvvoštusa mielde meroštit miessemassima, mii lea lassin ovdagihtii vurdojuvvon árramassimii, vurdojuvvon merkenproseantta vuođul.

0 Rievdaduvvon njuolggadusa bokte geassemánu 20. b. 2022 nr. 1091 (fápmui boahtán suoidnemánu 1. b. 2022).

§ 2-6. Sierragáibádus ohcamii

Doarjjaohcan mearkkašahtti boazovahágiid ovddas galgá sáddejuvvot nu johtilit go vejolaš, ja maŋemustá 12 mánu maŋŋel go lihkohisvuohta dáhpáhuvai. 

Ohcan galgá unnimustá sisdoallat

1. oppalaš čilgejumi massojuvvon bohccuin, mas sohkabealit ja agit bohtet ovdan (badjel 2 jagi, 1–2 jagi, čearpmat/miessi),
2. rábbeduođaštusa, gč. § 2-4,
3. čilgehusa das mii dáhpáhuvai ovdal massima,
4. čilgehusa álggahuvvon doaibmabijuin mat galget eastadit/unnidit vahága.

0 Rievdaduvvon njuolggadusa bokte geassemánu 21. b. 2023 nr. 1010 (fápmui boahtán suoidnemánu 1. b. 2023).

3. Kapihtal. Doarjja boazodoallorusttegiidda

§ 3-1. Ulbmil

Ulbmil doarjagiin lea veahkkin gokčat goluid boazodoallorusttegiid huksemiid, nuppástuhttimiid ja ođasmahttimiid oktavuođas.

0 Rievdaduvvon njuolggadusa bokte geassemánu 22. beaivvi 2021 nr. 2306 (fápmui boahtán suoidnemánu 1. b. 2021).

§ 3-2. Definišuvnnat

Boazodoallorusttegiiguin oaivvilduvvo bistevaš áiddit ja rusttegat, gč. Boazodoallolága § 24. Njuovahagaid dáfus sáhttá spiehkastit gáibádusas ahte galgá leat bistevaš.

0 Rievdaduvvon njuolggadusa bokte geassemánu 22. beaivvi 2021 nr. 2306 (fápmui boahtán suoidnemánu 1. b. 2021).

§ 3-3. Doarjjaeavttut

Doarjja boazodoallorusttegiidda sáhttá juolluduvvot siidaoassái, siidii, orohahkii ja boazosearvái.

Doarjja juolluduvvo dušše boazodoallorusttegiidda mat leat válddahallon mearriduvvon doaibmanjuolggadusain ja ráhkaduvvon orohatplánain. Boazoservviid dáfus galget boazodoallorusttegat leat válddáhallon mearriduvvon boazodoalloplánain.

Siidaoasit mat ohcet doarjaga, fertejit deavdit eavttuid mat leat Njuolggadusas doarjagiid birra siidaosiide ja boazoservviide § 3 ja § 4. Orohagat ja boazosearvvit mat ohcet doarjaga dán njuolggadusa vuođul, fertejit deavdit eavttuid mat leat Njuolggadusas orohagaide ja boazoservviide § 2-1.

Doarjja sáhttá juolluduvvot čuovvovaš doaibmabijuide:

a.  ođđa boazodoallorusttegiid huksemii,
b.  ásahuvvon boazodoallorusttegiid viiddideapmái, nuppástuhttimii dahje ođasmahttimii,  nu go ásahuvvon boazodoallorusttegiid dárbbašlaš nuppástusaide vai sáhttá geavahit ja lohkat elektrovnnalaš indiviidamearkkaid, ja
c.  boazodoallorusttegiid gaikumii go ii dieđe gii daid eaiggát dahje ovddasvástideaddji lea.

 Doarjja ii galgga juolluduvvot boazodoallorusttegiidda mat leat álggahuvvon dahje gárvvistuvvon ovdal go ohcan lea sáddejuvvon Eanandoallodirektoráhtii. 

Golut máŧasdoallamii ja golut gaskaboddosaš áiddiide ja rusttegiidda maid sáhttá sirdit eai leat doarjjavuoigaduvvon golut, gč. § 3-4. Doarjja ii sáhte juolluduvvot rusttegiidda mat leat ožžon doarjaga riidoeastadeaddji doaimmaid njuolggadusa vuođul boazodoalu ja eará guoskevaš beali gaskkas.

Doaibma ferte leat čađahuvvon 3 jagi sisa juolludusbeaivvi rájes.

0 Rievdaduvvon njuolggadusaid bokte geassemánu 29. b. 2020 nr. 1422 (fápmui boahtán suoidnemánu 1. b. 2020), geassemánu 22. b. 2021 nr. 2269 (fápmui boahtán suoidnemánu 1. b. 2021), geassemánu 22. b. 2021 nr. 2306 (fápmui boahtán suoidnemánu 1. b. 2021), geassemánu 20. b. 2022 nr. 1091 (fápmui boahtán suoidnemánu 1. b. 2022), geassemánu 21. b. 2023 nr. 1010 (fápmui boahtán suoidnemánu 1. b. 2023).

§ 3-4 Doarjjavuoigaduvvon golut

Doarjjavuoigaduvvon golut leat ávnnasgolut (dávvirat mat leat seainnis gitta), fievrredeapmi, erenoamášbarggut ja iežas bargu.

Erenoamáš oktavuođain, dán vuolde dalle go hukse stuorát rusttegiid, de sáhttá láigohuvvon konsuleantaveahkki rehkenastojuvvot doarjjavuoigaduvvon gollun. Njuovvan- ja gárderusttegiid oktavuođas sáhttet maiddái luodda-/biilabisánan- ja čáhce-/rufegolut rehkenastojuvvot mielde. Erenoamášbargun logahallojuvvojit elektrihkkár-, bohccebargi- ja eará dakkár barggut, mat gustovaš mearrádusaid mielde gáibidit erenoamáš gelbbolašvuođa.

0 Rievdaduvvon njuolggadusaid bokte geassemánu 22. b. 2021 nr. 2306 (fápmui boahtán suoidnemánu 1. b. 2021).

§ 3-5 Doarjjavuođđu

Doarjjavuođđu lea ohccojuvvon prošeavtta buot doarjjavuoigaduvvon goluid submi. Doarjjavuođđu meroštallojuvvo netto ávnnasgoluid vuođul (earret lassiárvodivada). Ohcciide geain ii leat vuoigatvuohta geassit eret sisaboahtti lassiárvodivada, váldojuvvo lassiárvodivat mielde doarjjavuođu meroštallamii.

Iežas barggu diibmomáksu lea 210 ruvnno. Iežas bargu sáhttá dahkat eanemustá 50 proseantta doarjjavuođus.

0 Lasihuvvon njuolggadusa bokte geassemánu 22. b. 2021 nr. 2306 (fápmui boahtán suoidnemánu 1. b. 2021). Rievdaduvvon njuolggadusa bokte geassemánu 21. b. 2023 nr. 1010 (fápmui boahtán suoidnemánu 1. b. 2023).

§ 3-6. Doarjaga rehkenastin

Sáhttá addot doarjja gitta 35 proseantta doarjjavuođus go ohcci lea siidaoassi/siida ja gitta 50 proseantta go ohcci lea orohat/boazosearvi, oktasašorohat dahje unnimusat guokte orohaga/boazosearvvi searválaga. Njuovvanrusttegiidda mat leat čielgasit sirrejuvvon eará rusttegiin sáhttá addot doarjja gitta 25 proseantta doarjjavuođus. Doarjjavuođu vuolit rádji lea mearriduvvon 20.000,- ruvdnui.

Erenoamáš oktavuođain sáhttá Boazodoalo Ovddidanfoandda stivra spiehkastit dán mearrádusa vuosttaš lađđasis.

0 Lasihuvvon njuolggadusa bokte geassemánu 22. beaivvi 2021 nr. 2306 (fápmui boahtán suoidnemánu 1. b. 2021).

§ 3-7. Sierragáibádus ohcamii

Doarjjaohcan sáddejuvvo sierra skoviin Eanandoallodirektoráhta.

Mielddusin boazodoallorusttegiid doarjjaohcamii gáibiduvvo ceggenlohpi, spesifiserejuvvon čilgehus buot doaibmabiju goluin, čielga ruhtadanplána ja rusttega tevnnegat, main leat mihtut. Golut mat eai leat doarjjavuđogat, gč. § 3-4, galget almmotge váldot mielde gollogeahčastahkii.

Njuovahaga huksemii/viiddideapmái dahje ođasmahttimii galgá biddjot mielde spesifiserejuvvon gávpeplána unnimusat 3 jahkái, ja maiddái almmolaš dohkkeheamit.

Boazodoallorusttegiid dáfus mat mákset badjel 150.000,- ruvnno, galgá sáddejuvvot čálalaš jearaldat unnimusat golmma fállái doarjjavuoigaduvvon goluid hárrái, gč. § 3-2.

Boazodoallorusttegat mat dahket ollislaš ovttadaga, sáhttet čohkkejuvvot ovtta ohcamii, muhto eaktun lea ahte golut dalle spesifiserejuvvojit ohcama mildosiin guđege rusttega nammii.

0  Rievdaduvvon njuolggadusaid bokte geassemánu 29. b. 2020 nr. 1422 (fápmui boahtán suoidnemánu 1. b. 2020), geassemánu 22. b. 2021 nr. 2306 (fápmui boahtán suoidnemánu 1. b. 2021, ovdal § 3-5). 

§ 3-8. Raporteren

Doarjjaoažžu galgá jagi sisa maŋŋel go rusttet lea gárvvistuvvon, mii galgá sisttisdoallat rehketdoalu ja čilgehusa vejolaš erenoamáš eavttuid birra mat leat devdojuvvon. Raporta sáddejuvvo Eanandoallodirektoráhttii.

0  Rievdaduvvon njuolggadusa bokte geassemánu 22. b. nr. 2306 ((fápmui boahtán suoidnemánu 1. b. 2021, ovdal § 3-6), geassemánu 20. b. 2022 nr. 1091 (fápmui boahtán suoidnemánu 1. b. 2022).

4. Kapihtal. Kursagoluid buhtadeapmi

§ 4-1. Ulbmil

Ulbmil doarjagiin lea veahkkin fuolahit loktet gelbbolašvuođa boazodoalus dan bokte ahte juolludit doarjaga kurssaide ja lassiohppui.

§ 4-2. Buhtadeami eavttut

Boazoeaiggádat sáhttet oažžut buhtaduvvot goluid kurssaide, mátkkošteapmái ja orrumii kurssaid/lassioahpu oktavuođas maid ulbmil lea háhkat ja/dahje viidásetovdánahttit boazodoalli gelbbolašvuođa boazodoalu doaimmaheapmái.

Jus doarjja galgá sáhttit juolluduvvot de ferte boazoeaiggádis leat sierra mearka. Muđui ferte/fertejit boazosearvvi dahje siidaoasi jođiheaddji/jođiheaddjit duođaštit divatgeatnegahtton vuovdindietnasa iežas mearkka bohccuid biergovuovdimis unnimustá 50 000 ruvnno ovddas ekskl. lassiárvodivvaga.

Jus siidaoasi jođiheaddji/jođiheaddjit geat ohcet buhtadeami devdet eavttuid oažžut álggahandoarjaga siidaosiid ja boazoservviid njuolggadusa § 9 mielde, de ii gusto dienasgáibádus § 4-2 nuppi lađđasis.

0 Rievdaduvvon njuolggadusa bokte geassemánu 22. beaivvi 2021 nr. 2269 (fápmui boahtán suoidnemánu 1. b. 2021).

§ 4-3. Doarjaga meroštallan

Kurssa/lassioahpu oktavuođas sáhttá oažžut ruovttoluotta 50 proseantta duođaštuvvon goluin, 6 000 ruvnno rádjái jagis. 

§ 4-4. Gáibádusat ohcamii

Ruovttoluottamáksima ohcan sáddejuvvo Eanandoallodirektoráhtii 6 mánu sisa maŋŋel go kursa lea loahpahuvvon. Mielddusin sáddejuvvojit dat duođaštusat maid Eanandoallodirektoráhta oaidná dárbbašlažžan sáhttit hálddašit doarjjaortnega.

5. Kapihtal. Doarjja meahccemánáidgárddiide 

§ 5-1. Ulbmil

Ulbmil doarjagiin lea láhčit diliid nu ahte eanebut bearrašis sáhttet searvat stuorát boazobargguide orohagas, geassesiiddas, dálvesiiddas dahje boazosearvvis, ja veahkkin hukset mánáid máhtu dáid doaimmaid birra.

0 Rievdaduvvon njuolggadusa bokte geassemánu 22. beaivvi 2021 nr. 2269 (fápmui boahtán suoidnemánu 1. b. 2021).

§ 5-2. Definišuvnnat

Meahccemánáidgárddiin oaivvilduvvo organiserejuvvon ja áigeráddjejuvvon geahčču mánáid dáfus geat leat vuollel skuvlaagi áigodagain go leat stuorát boazobarggut. Dákkár mánnágeahčču ferte sisttisdoallat heivehuvvon oahpahusdoaimmaid boazodoalus.

§ 5-3. Meahccemánáidgárddi doarjaga eavttut

Doarjja mánáide meahccemánáidgárddis sáhttá juolluduvvot orohahkii, geassesiidii dahje boazosearvái gitta golmma vahkkui jagis stuorát boazobargguid oktavuođas. Dasa lassin sáhttá siidaoasi jođiheaddji dálvesiiddas ohcat doarjaga dán njuolggadusa mearrádusaid mielde.

Doarjja sáhttá juolluduvvot mánnágehččui dan orohaga, geassesiidda. dálvesiidda dahje boazosearvvi mánáid dáfus gos boazodoallodoaibma čađahuvvo. Doarjja juolluduvvo gitta dan mánu rádjái go mánná álgá skuvlii.

Doarjja iežas mánáid ja/dahje náittosguoimmi/ovttasássi mánáid gehččui sáhttá dušše juolluduvvot jus mánná/mánát leat oassin joavkkus ovttas eará mánáiguin, ja jus iežas mánát ja/dahje náittosguoimmi/ovttasássi mánát eai daga eambbo go 1/3 dán joavkkus.

0 Rievdaduvvon njuolggadusa bokte geassemánu 22. beaivvi 2021 nr. 2269 (fápmui boahtán suoidnemánu 1. b. 2021).

§ 5-4. Doarjaga sturrodat

Mánáide geat leat deavdán golbma jagi juolluduvvo gitta 1 000 ruvdnosaš doarjja guđege máná nammii vahkkui.

Mánáide vuollel golbma jagi juolluduvvo gitta 2 000 ruvdnosaš doarjja guđege máná nammii vahkkui.

0 Rievdaduvvon njuolggadusa bokte geassemánu 20. b. nr. 1091 (fápmui boahtán suoidnemánu 1. b. 2022).

§ 5-5. Sierragáibádus ohcamii ja ohcanáigemearri

Ohcan sáddejuvvo Eanandoallodirektoráhtii maŋemustá mánu maŋŋel go boazobarggut leat čađahuvvon.

Ohcci galgá čielggadit gii nammaduvvo mánnágeahččin, ja daid mánáid namaid ja riegádandáhtoniid geaidda guoská. Šiehtadus mánnágehččiin ja duođaštus ahte lea máksán mánnágeahču ovddas galgá biddjojuvvot mielddusin.

Ohcci galgá čielggadit makkár doaimmain mánát leat oassálastán, ja meahccemánáidgárddi álgin- ja loahpahandáhtona.

0 Rievdaduvvon njuolggadusaid bokte geassemánu 29. b. 2020 nr. 1422 (fápmui boahtán suoidnemánu 1. b. 2020), geassemánu 22. beaivvi 2021 nr. 2306 (fápmui boahtán suoidnemánu 1. b. 2021).

6. Kapihtal. Doarjja orohatplánaid ráhkadeapmái orohagaide main váilu orohatplána

0 Kapihtal lea ollislaččat rievdaduvvon njuolggadusa bokte geassemánu 22. b. 2021 nr. 2306 (fápmui boahtán suoidnemánu 1. b. 2021), ollislaččat rievdaduvvon geassemánu 21. b. 2023 nr. 1010 (fápmui boahtán suoidnemánu 1. b. 2023).

§ 6-1. Ulbmil

Doarjaga ulbmil lea veahkehit orohagaid main váilu dohkkehuvvon orohatplána ráhkadit dakkár plána.

0 Rievdaduvvon njuolggadusa bokte geassemánu 21. b. 2023 nr. 1010 (fápmui boahtán suoidnemánu 1. b. 2023).

§ 6-2. Doarjjaeavttut

Doarjja sáhttá juolluduvvot orohagaide main ii leat dohkkehuvvon orohatplána. Orohatplána galgá ráhkaduvvon boazodoallolága § 62 mielde.

0 Rievdaduvvon njuolggadusa bokte geassemánu 21. b. 2023 nr. 1010 (fápmui boahtán suoidnemánu 1. b. 2023).

§ 6-3. Doarjjavuoigaduvvon golut

Sáhttá addojuvvot gitta 20 000 ruvdnosaš doarjja mii galgá gokčat dárbbašlaš goluid váilevaš orohatplána ráhkadeami oktavuođas.

0 Rievdaduvvon njuolggadusa bokte geassemánu 21. b. 2023 nr. 1010 (fápmui boahtán suoidnemánu 1. b. 2023).

§ 6-4.  Gáibádusat ohcamii

Ohcan sáddejuvvo Eanandoallodirektoráhttii sierra skoviin.

Lea ohcci ovddasvástádus fuolahit ahte ohcan lea dievaslaččat ja riekta devdojuvvon.

0 Rievdaduvvon njuolggadusa bokte geassemánu 21. b. 2023 nr. 1010 (fápmui boahtán suoidnemánu 1. b. 2023).

§ 6-5. Raporteren

Doarjjaohcci galgá jagi sisa maŋŋel go orohatplána lea mearriduvvon sáddet raportta Eanandoallodirektoráhttii mas boahtá ovdan rehketdoallu ja mearriduvvon orohatplána.

0 Rievdaduvvon njuolggadusa bokte geassemánu 21. b. 2023 nr. 1010 (fápmui boahtán suoidnemánu 1. b. 2023).

7. Kapihtal. Doarjja juridihkalaš veahkkái orohagaide dahje siiddaide

0 Lasihuvvon njuolggadusa bokte geassemánu 20. b. 2021 nr. 1091 (fápmui boahtán suoidnemánu 1. b. 2022).

§ 7-1. Ulbmil

Doarjaga ulbmil lea veahkehit orohagaid nu ahte besset áimmahuššat iežaset guohtunvuoigatvuođaid.

0 Lasihuvvon njuolggadusa bokte geassemánu 20. b. 2022 nr. 1091 (fápmui boahtán suoidnemánu 1. b. 2022).

§ 7-2.  Doarjjaeavttut juridihkalaš veahkkái

Orohagat dahje siiddat sáhttet oažžut doarjaga juridihkalaš veahkkái boazodoalu guohtunvuoigatvuođaid áimmahuššama oktavuođas Norggas. Dákkár áššiid oktavuođas ii juolluduvvo doarjja nákkuide mat leat Norgga ja Ruoŧa beale boazodoaluid gaskka.

Orohagat dahje siiddat, mat ledje oassin heaittihuvvon boazoguohtunkonvenšuvnnas b. guovvamánu 9. b. 1972 nr. 1, sáhttet oažžut doarjaga juridihkalaš veahkkái duopmostuollogieđahallama oktavuođas Ruoŧas ja Norggas jus Ruoŧa beale boazodoallu geassá orohaga dahje siidda diggái čielggadit orohaga dahje siidda vuoigatvuođaid:

1. árbevirolaš guohtunguovlluid oktavuođas Ruoŧas, dahje
2. guohtunguovlluid oktavuođas Norggas.

Ii juolluduvvo doarjja nákkuide siskkáldasat Norgga beale boazodoalus dahje nákkuide Norgga beale boazodoalu ja Norgga dahje Ruoŧa boazodoalloeiseválddiid gaskka.

0 Lasihuvvon njuolggadusa bokte geassemánu 20. b. 2022 nr. 1091 (fápmui boahtán suoidnemánu 1. b. 2022).

§ 7-3. Doarjjavuoigaduvvon golut

Doarjja sáhttá juolluduvvot gokčat čuovvovaš goluid:

1. juridihkalaš veahki gitta 100 diimmu rádjái diggeášši oktavuođas vuosttaš riekteinstánssas, ja gitta 50 diimmu rádjái guđege váiddainstánssas. Doarjja rehkenastojuvvo duođaštuvvon diibmologuid mielde. Golut gokčojuvvojit áigges áigái gustovaš almmolaš dikkástallanmávssu mielde dan riikkas gos diggeášši čađahuvvo.
    
2. mátkki ja orruma, go dákkár golut leat leamaš mihtilmasat ja dárbbašlaččat duopmostuollogieđahallama oktavuođas. Mátkegolut gokčojuvvojit stáhta máksomeriid mielde. Orrungolut gokčojuvvojit rehkega mielde, ja
    
3. juridihkalaš veahki gitta 50 diimmu rádjái áššiin mat eai gieđahallojuvvo duopmostuolus.

0 Lasihuvvon njuolggadusa bokte geassemánu 20. b. 2022 nr. 1091 (fápmui boahtán suoidnemánu 1. b. 2022).

§ 7-4. Gáibádus ohcamii

Doarjjaohcan sáddejuvvo sierra skoviin Eanandoallodirektoráhttii. 

Mielddusin go ohcá doarjaga juridihkalaš veahkkái gáibiduvvo juridihkalaš veahki bargamušduođaštus. 

0 Lasihuvvon njuolggadusa bokte geassemánu 20. b. 2022 nr. 1091 (fápmui boahtán suoidnemánu 1. b. 2022).

§ 7-5. Duođašteapmi

Áššiin mat gieđahallojuvvojit duopmostuolus galgá doarjjaoažžu duođaštit buot doarjjavuoigaduvvon goluid golmma mánu sisa maŋŋel duomu cealkima guđege riekteinstánssas, gč. § 7-3 bustávva a ja b.

Áššiin mat eai gieđahallojuvvo duopmostuoluin galgá doarjjaoažžu duođaštit doarjjavuoigaduvvon goluid golmma mánu sisa maŋŋel go ášši lea loahpahuvvon, gč. § 7-3 bustávva c.

0 Lasihuvvon njuolggadusa bokte geassemánu 20. b. 2022 nr. 1091 (fápmui boahtán suoidnemánu 1. b. 2022).

§ 7-6. Ruoktotmáksin

Eanandoallodirektoráhta sáhttá ollásit dahje belohahkii gáibidit ruoktotmáksojuvvot doarjaga man ohcci ii leat duođaštan § 7-5 olis dahje jus ohcci oažžu dahje lea ožžon gokčojuvvot doarjjavuoigaduvvon goluid eará ládje.

Muđui gustojit dábálaš njuolggadusat boasttumáksimiid njulgema, unnideami ja dollema birra, ja sisagáibideami birra mat leat § 1-12 rájes § 1-14 rádjái.

0 Lasihuvvon njuolggadusa bokte geassemánu 20. b. 2022 nr. 1091 (fápmui boahtán suoidnemánu 1. b. 2022).

8. Kapihtal. Fápmuiboahtin

 0 Rievdaduvvon njuolggadusa bokte geassemánu 20. b. 2022 nr. 1091 (fápmui boahtán suoidnemánu 1. b. 2022, ovdal kapihtal 7).

§ 8-1. Fápmuiboahtin.

Dát njuolggadus boahtá fápmui suoidnemánu 1. b. 2019. Seammás heaittihuvvo Boazodoalu Ovddidanfoandda njuolggadus nr. 616 addojuvvon geassemánu 21. b. 2011.

0 Rievdaduvvon njuolggadusa bokte geassemánu 20. b. 20221 nr. 1091 (fápmui boahtán suoidnemánu 1. b. 2022, ovdal § 7-1).