Boazodoallošiehtadusa njuolggadusat

§ 1. Ulbmil

Doarjja galgá veahkkin gokčat goluid mat bohciidit guoskevaš orohagain, siiddain ja siidaosiin dan geažil go váilu konvenšuvdna Norgga ja Ruoŧa gaskka boazoguohtumiid hárrái.

§ 2. Oppalaš eavttut

Doarjja sáhttá juolluduvvot orohahkii, siidii, siidaoassái dahje boazoeaiggádii geas lea leamaš boazoguohtunvuoigatvuohta Ruoŧa bealde heaittihuvvon boazodoallokonvenšuvnna mielde b. guovvamánu 9. b. 1972 nr. 1 bohccuid biebmamii ja/dahje sirdimii, boazofuođđariid fievrredeapmái ja eará dárbbašlaš doaimmaide bohccuid biebmama ja sirdima olis, čuovvovaš eavttuid vuođul:

1. Ohcci lea hehttehuvvon geavahit iežas árbevirolaš dálveguohtunguovlluid váilevaš boazoguohtunkonvenšuvnna geažil, dahje
2. ohcci lea gillán lassigoluid dan geažil go leat válljen geavahit iežaset árbevirolaš dálveguohtunguovlluid Ruoŧa bealde.

Fievrredeaddjis ja fievrrus mii geavahuvvo fievrredeapmái fertejit leat dárbbašlaš almmolašrievttalaš dohkkeheamit ortnegis jus galgá sáhttit fievrredit ealli bohccuid. 

0 Rievdaduvvon njuolggadusa bokte geassemánu 20. b. 2022 nr. 1095 (fápmui boahtán suoidnemánu 1. b. 2022).

§ 3. Doarjjameroštallan biebmamii

Doarjja mearriduvvo 450 ruvdnui guđege bohcco nammii.

§ 4. Doarjjameroštallan johtimii

Doarjja bohccuid sirdimii mearriduvvo 0,25 ruvdnui guđege bohcco nammii guđege kilomehteris.

0 Rievdaduvvon njuolggadusa bokte geassemánu 20. b. 2022 nr. 1095 (fápmui boahtán suoidnemánu 1. b. 2022)

§ 5. Doarjaga ráddjejumit

Doarjja ii sáhte juolluduvvot stuorát boazolohkui go dan boazolohkui maid orohagas lei lohpi atnit guohtuneatnamiin heaittihuvvon boazodoallokonvenšuvnna mielde.

Jus ohcci lea siida, siidaoassi dahje boazoeaiggát, de meroštallojuvvo doarjja gorrelogu mielde ohcci boazologu, orohaga boazologu ja dan boazologu ektui maid orohagas lei lohpi atnit dálveguohtuneatnamiin Ruoŧas heaittihuvvon boazoguohtunkonvenšuvnna mielde.

Dán galgá oktiiheivehit eará fievrredanruhtademiin, ovdamearkka dihte vahátunnideaddji doaibmabijuiguin gč. njuolggadusa doarjaga birra boraspirevahágiid eastadandoaimmaid birra ja riidoeastadeaddji doaibmabijuid birra § 5 nuppi lađđasa a-bustáva.

0 Lasihuvvon njuolggadusa bokte geassemánu 20. b. 2022 nr. 1095.

§ 6. Ohcan ja duođašteapmi

Ohcan sáddejuvvo Eanandoallodirektoráhtii ovdal njukčamánu 31. beaivvi. Mielddusin ohcamii gáibiduvvo duođaštus das ahte fievrredeaddjis leat dárbbašlaš dohkkeheamit fievrredit ealli bohccuid.

Ohcci ferte addit rehketdoalu oktan biebman- ja/dahje fievrredangoluid duođaštusaiguin ovdal suoidnemánu 1. beaivvi.

0 Rievdaduvvon njuolggadusa bokte geassemánu 20. b. 2022 nr.1095 (fápmui boahtán suoidnemánu 1. b. 2022, ovdal § 5).

§ 7. Dieđihangeatnegasvuohta ja bearráigeahčču

Doarjjaoažžut leat dán njuolggadusa mielde geatnegahtton addit buot dieđuid maid
boazodoalloeiseválddit oidnet dárbbašlažžan doarjjaortnegiid hálddašeami olis, dahje vai
boazodoallošiehtadus devdojuvvo.

Boazodoalloeiseválddit gozihit ahte doarjjamáksimat leat riekta, ja galgá beassat oaidnit buot rehketdoaluid, čálašemiid ja dieđuid mat gusket doarjagii. Doaimmaid dáfus main lea
revišuvdnageatnegasvuohta sáhttet boazodoalloeiseválddit gáibidit reviderejuvvon rehketdoalu goluin.

Boazodoalloeiseválddit sáhttet čađahit báikkálaš bearráigeahču doarjjaoažžu luhtte.

0 Rievdaduvvon njuolggadusa bokte geassemánu 20. b. 2022 nr. 1115 (fápmui boahtán suoidnemánu 1. b. 2022, ovdal § 13).

§ 8. Boasttomáksimiid njulgen

Boazodoalloeiseválddit sáhttet njulget boasttovuođaid máksojuvvon doarjagiin, juogo maŋŋelmáksimiid bokte dahje doarjaga ruoktotmáksingáibádusa bokte doarjjaoažžus.

0 Rievdaduvvon njuolggadusa bokte geassemánu 20. b. 2022 nr. 1095 (fápmui boahtán suoidnemánu 1. b. 2022, ovdal § 7).

§ 9. Unnideapmi

Jus ohcci fuollameahttumit lea addán boasttu dahje váilevaš dieđuid doarjjaohcamis, mii lea dahje livččii sáhttán dagahit ahte doarjja máksojuvvo eahpevuoiggalaččat, de sáhttá doarjja ollásit dahje belohahkii unniduvvot.

Jus doarjjaoažžu boazodoalloeiseválddiid mearrádusa mielde doaibmá dahje lea doaibman fuollameahttumit dahje eaktodáhtolaččat boazodoalloealáhusa lágaid dahje njuolggadusaid vuostá, de sáhttá doarjja ollásit dahje belohahkii dollejuvvot dassážii go dilli lea njulgejuvvon. Jus rihkkuma olis lea leamaš roavva fuollameahttunvuohta dahje eaktodáhtolašvuohta, de sáhttá doarjja ollásit dahje belohahkii unniduvvot.

0 Rievdaduvvon njuolggadusa bokte geassemánu 20. b. 2022 nr. 1095 (fápmui boahtán suoidnemánu 1. b. 2022, ovdal § 8)

§ 10. Ruoktotmáksin- dahje unnidanmeari sisagáibideapmi

Máksojuvvon ruđa ja doarjjavuođu erohus, mii lea mearriduvvo máksojuvvot ruovttoluotta § 7 mielde dahje unniduvvot § 8 mielde, sáhttá gáibiduvvot máksojuvvot ruovttoluotta doarjjavuostáváldis dahje dollejuvvot boahttevaš doarjjamáksimiin.

Jus doarjjavuostáváldi ii lean várrogas buori jáhkus máksima hárrái, de sáhttet reanttut gáibiduvvot dan áiggi rájes go ruoktotmáksingáibádus lea ollen doarjjavuostáváldái. Jus lea roavva fuollameahttunvuohta dahje eaktodáhtolašvuohta, de sáhttet reanttut gáibiduvvot dan áiggi rájes go eahpevuoiggalaš doarjja lea máksojuvvon. Reantojuolgi galgá leat seamma go dat reantojuolgi maid Finánsadepartemeanta áigges áigái mearrida § 3 mielde lágas b. juovlamánu 17. b. 1976 nr. 100 reanttuid maŋŋonan máksimiid je. birra.

0 Rievdaduvvon njuolggadusa bokte geassemánu 20. b. 2022 nr. 1095 (fápmui boahtán suoidnemánu 1. b. 2022, ovdal § 9), geassemánu 29. b. 2022 nr. 1239 (fápmui boahtán suoidnemánu 1. b. 2022).

§ 11. Váidin

Stáhtahálddašeaddji mearrádusa sáhttá váidit Eanandoallodirektoráhtii hálddašanlága njuolggadusaid mielde.

0 Rievdaduvvon njuolggadusa bokte geassemánu 20. b. 2022 nr. 1095 (fápmui boahtán suoidnemánu 1. b. 2022, ovdal § 10).

§ 12. Fápmuiboahtin

Njuolggadus boahtá fápmui suoidnemánu 1. b. 2021.

0 Rievdaduvvon njuolggadusa bokte geassemánu 20. b. 2022 nr. 1095 (fápmui boahtán suoidnemánu 1. b. 2022, ovdal § 11.