Njuolggadus doarjaga birra boazodollui oasi ovddas bieggafámu árvolassáneamis
Láhkavuođđu: Eanandoallo- ja biebmodepartemeantta mearridan skábmamánu 26. beaivvi 2025 geassemánu 15. beaivvi 2007 nr. 40 lága vuođul boazodoalu birra (boazodoalloláhka) § 82a ja čađahan dihte Stuoradikki jahkásaš bušeahttamearrádusa.
§ 1. Ulbmil
Doarjja galgá veahkehit ahte siiddat, orohagat dahje čearut, maidda čuohcá bieggafápmobuvttadeapmi, ožžot oasi bieggafápmobuvttadeami árvolassáneamis.
§ 2. Eavttut
Doarjja sáhttá juolluduvvot orohahkii, siidii dahje čerrui mas leat vuoigatvuođat dakkár guovllus gos lea bieggafápmorusttet dahje dakkár guovllus gos bieggafápmorusttet lea lahkosis.
Doarjjaoažžu ferte deavdit eavttuid mat leat siiddaide dahje orohagaide boazodoallolágas, ja čearuide rádjeboazoguohtunlágas.
§ 3. Doarjaga meroštallan
Doarjja galgá leat 0,1 evrre juohke kWh nammii guoskevaš bieggafápmorusttega jahkásaš buvttadeamis, guokte jagi ovdal dan jagi go doarjja máksojuvvo.
Jus bieggafápmorusttet čuohcá máŋgga siiddaide, orohagaide dahje čearuide, de galgá doarjja juhkkojuvvot gorrelogu mielde siidda, orohaga ja čearu gaskkas mearriduvvon guohtunáiggiid vuođul dahje dan mielde ahte man galle jándora siida, orohat ja čearru geavahit guoskevaš guovllu.
§ 4. Ortnega hálddašeapmi
Eanandoallodirektoráhtta galgá máksit doarjaga bieggafápmorusttegiid geográfalaš sajádaga ja bieggafápmorusttega jahkásaš buvttadeami vuođul. NVE galgá juohke jagi ovdal njukčamánu 1. beaivvi sáddet čoahkkáigeasu Eanandoallo- ja biebmodepartementii bieggafápmorusttegiid jahkásaš buvttadeamis bieggafápmorusttegiin mat leat sámi boazoguohtunguovllus dahje sámi boazoguohtunguovllu lahkosis.
§ 5. Máksin
Eanandoallodirektoráhtta máksá doarjaga siidafondii jus siida lea doarjjaoažžu, dahje boazodoallofondii jus orohat lea doarjjaoažžu. Doarjja čearuide máksojuvvo čearu fondii.
§ 6. Dieđuid viežžan
Eanandoallodirektoráhtta sáhttá viežžat dárbbašlaš dieđuid árvvoštallan dihte eavttuid deavdima.
§ 7. Boasttomáksimiid divvun
Eanandoallodirektoráhtta sáhttá divvut boasttomáksojuvvon doarjaga, jogo maŋŋelmáksimiid bokte dahje doarjaga ruoktotmáksingáibádusa bokte doarjjaoažžus.
§ 8. Unnideapmi je.
Jus doarjjaoažžu lea addán boastto- dahje váilevaš dieđuid fuollameahttumit dahje eaktodáhtolaččat mii lea dahje livčče sáhttán dahkat vuođu doarjaga boasttomáksimii, de sáhttá doarjja dollejuvvot oalát dahje belohahkii.
Jus doarjjaoažžu fuollameahttumit dahje eaktodáhtolaččat doaimmaha dahje lea doaimmahan doalu dakkár vugiin mii rihkku boazodoalloealáhusa lágaid dahje njuolggadusaid, de sáhttá doarjja dollejuvvot oalát dahje belohahkii dassážii dilli lea njulgejuvvon. Jus njuolggadusaid rihkkumiid oktavuođas lea sáhka roavva fuollameahttunvuođas dahje eaktodáhtolašvuođas, de sáhttá doarjja unniduvvot oalát dahje belohahkii.
§ 9. Sisagáibideapmi
Differánsa máksojuvvon supmis ja vuoigaduvvon doarjagis áššemearrádusas dan njuolggadusa mielde sáhttá gáibiduvvot ruoktotmáksojuvvot doarjjaoažžus. Differánsa sáhttá maiddái gessojuvvot boahttevaš doarjjamáksámušain.
Jus doarjjavuostáváldi ii lean várrogas buori jáhkus máksima hárrái, de sáhttet reanttut gáibiduvvot dan áiggi rájes go ruoktotmáksingáibádus lea ollen doarjjavuostáváldái. Jus lea roavva fuollameahttunvuohta dahje eaktodáhtolašvuohta, de sáhttet reanttut gáibiduvvot dan áiggi rájes go eahpevuoiggalaš doarjja lea máksojuvvon. Reantojuolgi galgá leat seamma go dat reantojuolgi maid Finánsadepartemeanta áigges áigái mearrida § 3 mielde lágas b. juovlamánu 17. b. 1976 nr. 100 reanttuid maŋŋonan máksimiid je. birra.
§ 10. Váidin
Áššemearrádusa doarjaga birra sáhttá váidit Eanandoallo- ja biebmodepartementii hálddašanlága mearrádusaid mielde.
§ 11. Fápmuiboahtin
Dat njuolggadus boahtá fápmui dakkaviđe.
