Boazodoallošiehtadusa njuolggadusat

§ 1. Ulbmil

Ulbmil riidoeastadeaddji doaibmabijuid doarjagiin lea unnidit riidduid boazodoalu ja eará eanandoalu gaskka, ja riidduid gávpogiid ja bohccuid gaskka.

0 Rievdaduvvon njuolggadusa bokte geassemánu 20. b. 2019 nr. 767 (fápmui boahtán suoidnemánu 1. b. 2019).

§ 2. Oassebealit

Oassebealit dán njuolggadusa mielde leat boazodoallu orohaga dahje siidda bokte nuppe bealde, ja juogo eanandoallu ja/dahje eará guoskevaš bealli fas nuppe bealde.

0 Rievdaduvvon njuolggadusa bokte geassemánu 20. b. 20019 nr. 767 (fápmui boahtán suoidnemánu 1. b. 2019).

§ 3. Doarjjaeavttut

Go bealit leat ovttaoaivilis, de sáhttá addojuvvot doarjja hukset áiddiid mat suddjejit bargojuvvon eatnamiid, dikšojuvvon guohtumiid, gilvvavuvddiid ja huksejuvvon guovlluid bohccuid guohtuma vuostá. Lea doarjjaeaktun ahte áidi máŧasdollojuvvo ja ahte eatnamat mat galget suddjejuvvot, áimmahuššojuvvojit.

Sáhttá addojuvvot doarjja daid áiddiid dárbbašlaš máŧasdoallamii mat ožžot dohkkehuvvot loahpparaportta 2023 rájes. Sáhttá ohcat doarjaga máŧasdoallamii áramusat 5 jagi maŋŋel go áidedoaimma loahpparaporta lea dohkkehuvvon. Áidi galgá leat anus, buori ortnegis ja galgá leat jotkkolaččat máŧasdollojuvvon. Sáhttá addojuvvot 10 ruvnno máŧasdoallandoarjja guđege áidemehtera nammii.

Sierra diliin sáhttá addojuvvot doarjja maiddái eará doaibmabijuide, mat váidudit riidduid boazodoalu ja eará beliid gaskavuođas. Go leat doaibmabijut eará beliid ektui go eanandoalu, de galgá nuppi beali ruhtadeapmi leat čielggaduvvon guđege doaibmabiju dáfus ovdal go ohcan ovddiduvvo.

Erenoamáš oktavuođain sáhttá juolluduvvot doarjja helikoptera geavaheapmái, jus boazodoallu háliida dan.

Ohccojuvvon doaibmabijus ferte leat dohkkehuvvon gollomeroštallan badjel 5 000 ruvnno. Dábálaččat galget golut juogaduvvot dássálaga beliid gaskka.

Sáhttá addojuvvot doarjja gitta 90 proseantta rádjai dohkkehuvvon gollomeroštallamis.

Jus iežas bargu lea oassin gollomeroštallamis, de lea diibmomáksu 210 ruvnno.

0 Lasihuvvon njuolggadusa bokte geassemánu 20. b. 2019 nr. 767 (fápmui boahtán suoidnemánu 1. b. 2019), rievdaduvvon njuolggadusaid bokte geassemánu 22. b. 2021 nr. 2272 (fápmui boahtán suoidnemánu 1. b. 2021), geassemánu 20. b. 2022 nr.1092 (fápmui boahtán suoidnemánu 1. b. 2022), geassemánu 21. b. 2023 nr. 1012 (fápmui boahtán suoidnemánu 1. b. 2023).

§ 4. Erenoamážit áidedoaibmabijuid birra

Áidedoaibmabijuide, maidda eananeaiggáda bealde leat máŋga berošteaddji, galget sii ásahit šiehtadusa huksenbarggu čađaheami ja boahttevaš máŧasdoallama birra. Šiehtadus galgá mearridit man stuora oassi vejolaš huksengoluin gullá guđege oassebeallái, ja mo sii galget juogadit máŧasdoallama bargguid ja goluid. Šiehtadus sáhttá gulahuvvot giddehussan guoskevaš eatnamiidda. 

Jus doarjaga ohcci ii eaiggáduša eatnama gosa rusttet galgá ceggejuvvot, de ferte doaibmabiju čađaheapmái vižžojuvvot čálalaš lohpi vuoigatvuođahálddolaččas.

Buot huksenbarggut galget čađahuvvot lágaid ja njuolggadusaide mielde, mat gustojit guovllus gosa rusttega áigu cegget.

Áiderusttegiidda ferte maid ráhkaduvvot bargoválddahus, masa kártii lea sárgojuvvon áidespáitu, ja gollomeroštallan ja ruhtadanplána. Gollomeroštallan sáhttá sisdoallat áidespáittu njáskangoluid, ávnnasgoluid ja fievrredan- ja bargogoluid áideceggema oktavuođas. Buhtadusat ja árvvoštallangolut eai galgga leat mielde gollomeroštallamis.

0 Rievdaduvvon njuolggadusaid bokte geassemánu 20. b. 2019 nr. 767 (fápmui boahtán suoidnemánu 1. b. 2019, ovddeš § 3), geassemánu 29. B. 2021 nr. 1424 (fápmui boahtán suoidnemánu 1. b. 2020).

§ 5. Áššegieđahallan

Boazodoalu ja eará eanandoalu riidduid oktavuođas galgá sáddet ohcama oktan dohkkehuvvon duođaštusaiguin, nugo namahuvvon 3.§:s, oktanaga sihke gildii ja stáhtahálddašeaddjái báikkálaš boazodoalloeiseváldin (báikkálaš instánssaide). Dat čađahit hálddahuslaš ovttasbarggu áššis ja sáddejit ohcama, sierranassii dahje oktasaččat, oktan cealkámušaideasetguin Trøndelága stáhtahálddašeaddjái. Ohcan boazodoalus ja eará bealis go eanandoalus muđui galgá sáddejuvvot stáhtahálddašeaddjái báikkálaš boazodoalloeiseváldin, mii sádde ohcama oktan cealkámušaidisguin Trøndelága stáhtahálddašeaddjái gieđahallamii. Cealkámušat galget sisttisdoallat evttohusa das guđet eavttut ovddidivčče ortnega ulbmila, ja maiddái evttohusa das guđe láhkai golut juogaduvvojit Eanandoalu Ovddidanfoandda ja Boazodoalu Ovddidanfoandda gaskka.

Guovlulaš soabahanráđđi1 sáhttá ovttas oassebeliiguin ovddidit doarjjaohcama njuolga Trøndelága stáhtahálddašeaddjái.

Go sádde ohcama Trøndelága stáhtahálddašeaddjái, de berre evttohit goappá báikkálaš ásahusas galgá leat prošeavtta čuovvolanovddasvástádus, gč. §§ 6 ja 7.

0 Rievdaduvvon njuolggadusa bokte juovlamánu 19. b. 2013 nr. 1602 (fápmui boahtán ođđajagemánu 1. b. 2014), suoidnemánu 1. b. 2015 nr. 832, geassemánu 20. b. 2019 nr. 767 (fápmui boahtán suoidnemánu 1. b. 2019, ovddeš § 4), juovlamánu 21. b. 2020 nr. 3044 (fápmui boahtán ođđajagimánu 1. b. 2021), geassemánu 22. b. 2021 nr. 2272 (fápmui boahtán suoidnemánu 1. b. 2021) .

1 Gč. Boazoguohtunguovllu soabahanráđi njuolggadusaid, addojuvvon čakčamánu 4. b.1997.

§ 6. Juolludanváldi

Trøndelága stáhtahálddašeaddji mearrida doarjjaohcamiid. Stáhtahálddašeaddji sáhttá ieš mearridit nammada go báikkálaš čuovvolanásahusa, gč. 4.

Go Trøndelága stáhtahálddašeaddji mieđiha ohcamii, de galgá mearridit mo juohkit goluid Eanandoalu Ovddidanfoandda ja Boazodoalu Ovddidanfoandda gaskka, ja dárbbašlaš eavttuid ortnega ulbmila vuhtii váldit. Galgá maid biddjojuvvot áigemearri barggu čađaheapmái. Investerendoaibmabijuid áigemearri lea dábálaččat guokte jagi.

Trøndelága stáhtahálddašeaddji sáhttá biehttalit doarjjaohcama, jus barggut leat álggahuvvon ovdal go ohcan lea mearriduvvon.

0 Rievdaduvvon njuolggadusa bokte juovlamánu 19. b. 2013 nr. 1602 (fápmui boahtán ođđajagemánu 1. b. 2014), suoidnemánu 1. b. 2015 nr. 832, geassemánu 20. b. 2019 nr. 767 (fápmui boahtán suoidnemánu 1. b. 2019, ovdal § 5), juovlamánu 21. b. 2020 nr. 3044 (fápmui boahtán ođđajagimánu 1. b. 2021).

§ 7. Máksin

Ohcci čálalaš gáibádusa vuođul ja báikkálaš čuovvolanásahusa ávžuma vuođul, gč. §§ 4 ja 5, sáhttá Trøndelága stáhtahálddašeaddji oassemáksit juolluduvvon doarjagis gitta 80 proseantta rádjai, go unnimustá vástideaddji oassi doaibmabijus lea čađahuvvon. 

Loahppa máksojuvvo go Trøndelága stáhtahálddašeaddji lea dohkkehan gárvvistanduođaštusa/loahpparaportta ja duođaštuvvon goluid rehketdoalločoahkkáigeasu. Doaimmain main lea rehketdoallodárkkistangeatnegasvuohta, gáibiduvvo goluid dárkkistuvvon rehketdoallu.

Sáhttá gáibiduvvot sihkarvuohta doarjaga ovddas, ii ge leat vejolašvuohta daguhit doarjjagáibádusa earáide oapmin dahje pántan.

0 Rievdaduvvon njuolggadusa bokte juovlamánu 19. b. 2013 nr. 1602 (fápmui boahtán ođđajagemánu 1. b. 2014), geassemánu 20. b. 2019 nr. 767 (fápmui boahtán suoidnemánu 1. b. 2019, ovddeš § 6), juovlamánu 21. b. 2020 nr. 3044 (fápmui boahtán ođđajagimánu 1. b. 2021). 

§ 8. Bearráigeahčču

Trøndelága stáhtahálddašeaddji galgá báikkálaš čuovvolanásahusa bokte gozihit doaibmabijuid mat ožžot doarjaga, gč. §§ 4 ja 5. Dát galgá bearráigeahččat ahte doarjjaeavttut čuvvojuvvojit. Doarjaga vuostáváldi ferte dohkkehit bearráigeahču dán oktavuođas ja lea geatnegahttojuvvon addit dárbbašlaš čuvgehusaid.

0 Rievdaduvvon njuolggadusa bokte juovlamánu 19. b. 2013 nr. 1602 (fápmui boahtán ođđajagemánu 1. b. 2014), geassemánu 20. b. 2019 nr. 767 (fápmui boahtán suoidnemánu 1. b. 2019, ovddeš § 7), juovlamánu 21. b. 2020 nr. 3044 (fápmui boahtán ođđajagimánu 1. b. 2021).

§ 9. Raporteren

Trøndelága stáhtahálddašeaddji galgá almmuhit doaibmabijuid gárvvistanduođaštusa/loahpparaportta ja rehketdoalločoahkkáigeasu beliide ja fylkka eanandoallo- ja/dahje boazodoalloeiseváldái.

Trøndelága stáhtahálddašeaddji raportere jahkásaččat Eanandoallo- ja biebmodepartementii doaibmabijuid birra maidda ohccojuvvo ruhtadeapmi doarjjaortnega bokte.

0 Rievdaduvvon njuolggadusa bokte juovlamánu 19. b. 2013 nr. 1602 (fápmui boahtán ođđajagemánu 1. b. 2014), geassemánu 20. b. 2019 nr. 767 (fápmui boahtán suoidnemánu 1. b. 2019, ovddeš § 8), juovlamánu 21. b. 2020 nr. 3044 (fápmui boahtán ođđajagimánu 1. b. 2021).

§ 10. Ruoktotmáksin

Jus čuožžilit dilit mat leat vuostalága doarjjaeavttuiguin, de sáhttá Trøndelága stáhtahálddašeaddji mearridit ahte doarjja galgá unniduvvot, dahje ahte doarjja galgá ruoktotmáksojuvvot ollásit dahje belohahkii. Trøndelága stáhtahálddašeaddji sáhttá gohččut čađahit liigebargguid dahje divodemiid.

Go ruoktotmáksima gáibádus lea ovddiduvvon, de sáhttá dat dollejuvvot eará investerendoarjagis ja buvttadanlasáhusas, maidda guoskevaš olbmos lea vuoigatvuohta, dahje berrojuvvot dábálaš njuolggadusaid mielde. Doarjaga ruoktotmáksima gáibádus ii sáhte ovddiduvvot jus lea gollan badjel 10 jagi doarjaga máksima rájes.

0 Rievdaduvvon njuolggadusa bokte juovlamánu 19. b. 2013 nr. 1602 (fápmui boahtán ođđajagemánu 1. b. 2014), geassemánu 20. b. 2019 nr. 767 (fápmui boahtán suoidnemánu 1. b. 2019, ovddeš § 9), juovlamánu 21. b. 2020 nr. 3044 (fápmui boahtán ođđajagimánu 1. b. 2021).

§ 11. Dispensašuvdna

Eanandoallo- ja biebmodepartemeanta sáhttá sierra diliin ložžet njuolggadusa mearrádusaid.

0 Rievdaduvvon njuolggadusa bokte geassemánu 20. b. 2019 nr. 767 (fápmui boahtán suoidnemánu 1. b. 2019, ovdal § 10).

§ 12. Váidin

Mearrádusaid dán dán njuolggadusa mielde sáhttá váidit Eanandoallo- ja biebmodepartementii guovvamánu 10.b.1967 lága vuođul hálddahusáššiid gieđahallama birra (hálddašanlága) VI. kapihttala mielde. Váidda sáddejuvvo Trøndelága stáhtahálddašeaddji bokte.

Juovlamánu 15. b.2006 Gonagaslaš resolušuvnna nr. 1456, ii leat váidinvuoigatvuohta mearrádusaid hárrái maid Eanandoallo- ja biebmodepartemeanta lea dahkan dispensašuvdnaáššiin mat gusket doarjjaortnegiidda, gč. § 28.

0 Rievdaduvvon njuolggadusa bokte juovlamánu 19. b. 2013 nr. 1602 (fápmui boahtán ođđajagemánu 1. b. 2014), geassemánu 20. b. 2019 nr. 767 (fápmui boahtán suoidnemánu 1. b. 2019, ovddeš § 11), juovlamánu 21. b. 2020 nr. 3044 (fápmui boahtán ođđajagimánu 1. b. 2021).

§ 13. Fápmuiboahtin

Dát njuolggadus boahtá fápmui geassemánu 19. b. 2008. Seammás heaittihuvvo Njuolggadus doarjaga birra riidoeastadeaddji doaibmabijuide boazodoalu ja eará guoskevaš beali gaskavuođas, addojuvvon suoidnemánu 3. b. 1996 nr. 1467.

0 Rievdaduvvon njuolggadusa bokte geassemánu 20. b. 2019 nr. 767 (fápmui boahtán suoidnemánu 1. b. 2019, ovddeš § 12).