Njuolggadus doarjagii njuovvan- ja buvttadangáibádussii oassin doaibmanjuolggadusain
Láhkavuođđu: Eanandoallo- ja biebmodepartemeantta mearridan geassemánu 22. b. 2026 boazodoallolága geassemánu 15. b. 2007 nr. 40 § 82a vuođul ja čađahan dihte Stuoradikki jahkásaš mearrádusa boazodoallošiehtadusa olis.
§ 1. Ulbmil
Doarjja galgá láhčit dili lassánan buvttadeapmái ja ekologalaš guoddevaš boazolohkui.
§ 2. Doarjjaeavttut
Doarjja sáhttá juolluduvvot orohagaide ja boazoservviide mat:
a. leat mearridan njuovvan- ja buvttadangáibádusaid doaibmanjuolggadusain, vrd. boazodoallolága § 57 goalmmát lađas nummár 3, ja
b. ožžot orohatdoarjaga, vrd. juovlamánu 21. b. 2022 nr. 2468 njuolggadusa doarjaga birra orohagaide ja boazoservviide, ja
c. leat ráhkadan, mearridan ja doallan orohaga njuovvanplána.
§ 3. Doarjaga máksomearri
Orohagat ja boazosearvvit sáhttet oažžut gitta 35 000 ruvdnosaš doarjaga. Orohagat main leat ovcci dahje eambbo siidaoasit sáhttet oažžut lassin 15 000 ruvnno.
§ 4. Gáibádusat ohcamii
Ohcci galgá geavahit ohcanskovi man Eanandoallodirektoráhtta lea mearridan. Ohcan galgá sáddejuvvot stáhtahálddašeaddjái ovdal suoidnemánu 15. beaivvi dan jagi go orohat lea čuvvon njuovvanplána.
§ 5. Dieđihangeatnegasvuohta ja dárkkisteapmi
Doarjjavuostáiváldit dan njuolggadusa mielde leat geatnegahtton addit buot dieđuid maid boazodoalloeiseválddit dárbbašit hálddašan dihte doarjjaortnegiid, dahje olahan dihte boazodoallošiehtadusa.
Boazodoalloeiseválddit bearráigehččet ahte doarjjamáksámušat leat riekta, ja sii oidnet girjedoalu, gulahallama ja fuomášumiid mat gullet doarjagii.
§ 6. Boasttomáksimiid divvun
Boazodoalloeiseválddit sáhttet divvut boasttuvuođaid máksojuvvon doarjagiin, juogo lassimáksima bokte dahje ruoktotmáksingáibádusa bokte doarjjaoažžu bealis.
§ 7. Unnideapmi ja doarjaga dollen
Jus ohcci fuollameahttumit lea addán boasttodieđuid dahje váilevaš dieđuid ohcamis, mat leat dahje livčče sáhttán dagahit ahte doarjja máksojuvvo eahpevuoiggalaččat, de sáhttá doarjja ollásit dahje belohahkii unniduvvot.
Jus doarjjaoažžu fuollameahttumit dahje eaktodáhtolaččat doaibmá dahje lea doaibman boazodoalloealáhusa lágaid dahje njuolggadusaid vuostá, de sáhttá doarjja ollásit dahje belohahkii dollejuvvot dassážii go dilli lea njulgejuvvon. Jus rihkkuma olis lea roavva fuollameahttunvuohta dahje eaktodáhtolašvuohta, de sáhttá doarjja ollásit dahje belohahkii unniduvvot.
§ 8. Ruoktotmáksin- dahje unnidanmeari sisagáibideapmi
Boazodoalloeiseválddit sáhttet gáibidit máksojuvvon oasi ja doarjjavuođu erohusa máksojuvvot ruovttoluotta, ruoktotmáksinmearrádusain § 6 mielde dahje unnidanmearrádusain § 7 mielde.
Boazodoalloeiseválddiid gáibádusat sáhttet dollejuvvot doarjjamáksimiin doarjjavuostáiváldái.
Jus doarjjavuostáiváldi ii lean várrogas buori jáhkus máksima hárrái, de sáhttet reanttut gáibiduvvot dan áiggi rájes go ruoktotmáksingáibádus lea ollen doarjjaožžui. Jus lea roavva fuollameahttunvuohta dahje eaktodáhtolašvuohta, de sáhttet reanttut gáibiduvvot dan áiggi rájes go eahpevuoiggalaš doarjja lea máksojuvvon. Reantojuolgi galgá leat seamma go dat reantojuolgi maid Finánsadepartemeanta áigges áigái mearrida § 3 mielde lágas b. juovlamánu 17. b. 1976 nr. 100 reanttuid maŋŋonan máksimiid je. birra.
§ 9. Váidinvejolašvuohta
Áššemearrádusa dan njuolggadusa mielde sáhttá váidit Eanandoallodirektoráhttii hálddašanlága mearrádusaid mielde.
§ 10. Fápmuiboahtin
Njuolggadus boahtá fápmui suoidnemánu 1. beaivvi 2026.
